ନୂଆଦିଲ୍ଲୀ, ୧।୫: ନ୍ୟାଶନାଲ ହେରାଲ୍ଡ ମାମଲା ପୁଣି ଥରେ ଜାତୀୟ ରାଜନୀତିର କେନ୍ଦ୍ରବିନ୍ଦୁ ପାଲଟିଛି। କଂଗ୍ରେସ ନେତା ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ବିରୋଧରେ ଏନଫୋର୍ସମେଣ୍ଟ ଡାଇରେକ୍ଟୋରେଟ (ଇଡି) ୫୦୦୦ କୋଟି ଟଙ୍କାର ସମ୍ପତ୍ତି ଅନୁଚିତ ଭାବେ ହସ୍ତାନ୍ତର ଅଭିଯୋଗ ଆଣିଛି। ଏହି ମାମଲାରେ ଇଡି ସୋନିଆ ଓ ରାହୁଲଙ୍କୁ ମୁଖ୍ୟ ଅଭିଯୁକ୍ତ କରି ଦିଲ୍ଲୀର ରାଉଜ ଆଭେନ୍ୟୁ କୋର୍ଟରେ ଏକ ଚାର୍ଜସିଟ ଦାଖଲ କରିଛି। ଏହାର ଶୁଣାଣି ଏପ୍ରିଲ ୨୫ରେ ହୋଇଥିଲା, କିନ୍ତୁ କୋର୍ଟ ଅଧିକ ପ୍ରମାଣ ମାଗି ମେ ୨ ପାଇଁ ପରବର୍ତ୍ତୀ ଶୁଣାଣି ପାଇଁ ସ୍ଥିର କରିଛି।
ନ୍ୟାଶନାଲ ହେରାଲ୍ଡ ହେଉଛି ଜବାହାରଲାଲ ନେହେରୁଙ୍କ ଦ୍ୱାରା ୧୯୩୮ ମସିହାରେ ପ୍ରତିଷ୍ଠିତ ଏକ ଖବରକାଗଜ, ଯାହା ଆସୋସିଏଟେଡ ଜର୍ନାଲ୍ସ ଲିମିଟେଡ (ଏଜେଏଲ) ଦ୍ୱାରା ପ୍ରକାଶିତ ହେଉଥିଲା। ୨୦୦୮ ମସିହାରେ ଆର୍ଥିକ କ୍ଷତି ହେତୁ ଏହା ବନ୍ଦ ହୋଇଥିଲା ଏବଂ ଏଜେଏଲ ଉପରେ ୯୦.୨୧ କୋଟି ଟଙ୍କାର ଋଣ ରହିଥିଲା, ଯାହା କଂଗ୍ରେସ ପାର୍ଟି ପ୍ରଦାନ କରିଥିଲା। ୨୦୧୦ରେ କଂଗ୍ରେସ ଏହି ଋଣକୁ ମାତ୍ର ୫୦ ଲକ୍ଷ ଟଙ୍କାରେ ୟଙ୍ଗ ଇଣ୍ଡିଆନ ଲିମିଟେଡ (ୱାଇଆଇଏଲ) ନାମକ ଏକ ନୂଆ କମ୍ପାନୀକୁ ହସ୍ତାନ୍ତର କରିଥିଲା।
ଇଡି ଅଭିଯୋଗ କରିଛି ଯେ ଏଜେଏଲର ୨୦୦୦ କୋଟି ଟଙ୍କାର ସମ୍ପତ୍ତି (ବର୍ତ୍ତମାନ ମୂଲ୍ୟ ୫୦୦୦ କୋଟି ଟଙ୍କା) ମାତ୍ର ୫୦ ଲକ୍ଷ ଟଙ୍କାରେ ୱାଇଆଇଏଲକୁ ହସ୍ତାନ୍ତର କରାଯାଇଥିଲା, ଯାହା ଏକ ଅପରାଧମୂଳକ ଷଡଯନ୍ତ୍ର। ଏହି ସମ୍ପତ୍ତି ମଧ୍ୟରେ ଦିଲ୍ଲୀର ହେରାଲ୍ଡ ହାଉସ, ମୁମ୍ବାଇ, ଲକ୍ଷ୍ନୌ, ପାଟନା ଓ ଭୋପାଳରେ ଥିବା ମୂଲ୍ୟବାନ ଅଚଳ ସମ୍ପତ୍ତି ରହିଛି। ଇଡି ଦାବି କରିଛି ଯେ ଏହି ହସ୍ତାନ୍ତର ମାଧ୍ୟମରେ ସୋନିଆ ଓ ରାହୁଲ ଏଜେଏଲର ସମ୍ପତ୍ତିର ଲାଭଦାୟୀ ମାଲିକ ହୋଇଛନ୍ତି।
୨୦୧୨ରେ ଭାଜପା ନେତା ସୁବ୍ରମଣ୍ୟମ ସ୍ବାମୀ ଏହି ମାମଲାରେ ଏକ ବ୍ୟକ୍ତିଗତ ଅଭିଯୋଗ ଦାୟର କରିଥିଲେ, ଯେଉଁଥିରେ ସୋନିଆ ଓ ରାହୁଲଙ୍କୁ ଠକେଇ, ଅନୁଚିତ ସମ୍ପତ୍ତି ହସ୍ତାନ୍ତର ଓ ଅର୍ଥ ହେରଫେର ଅଭିଯୋଗ କରାଯାଇଥିଲା। ୨୦୧୪ରେ ଦିଲ୍ଲୀ କୋର୍ଟ ଏହି ମାମଲାରେ ସୋନିଆ, ରାହୁଲ, ସାମ ପିଟ୍ରୋଡା, ସୁମନ ଦୁବେ ଏବଂ ଅନ୍ୟମାନଙ୍କୁ ସମନ ଜାରି କରିଥିଲା। ୨୦୧୮ରେ ସୋନିଆ ଓ ରାହୁଲ ଜାମିନ ପାଇଥିଲେ।
ଇଡି ୨୦୨୧ରେ ଏହି ମାମଲାରେ ଅର୍ଥ ହେରଫେର ତଦନ୍ତ ଆରମ୍ଭ କରିଥିଲା ଏବଂ ୨୦୨୩ରେ ୭୫୧.୯ କୋଟି ଟଙ୍କାର ସମ୍ପତ୍ତି ଜବତ କରିଥିଲା। ଏପ୍ରିଲ ୨୦୨୫ରେ ଇଡି ଏକ ଚାର୍ଜସିଟ ଦାଖଲ କରି ଅଭିଯୋଗ କରିଛି ଯେ ୱାଇଆଇଏଲ ଓ ଏଜେଏଲ ବ୍ୟବହାର କରି ୧୮ କୋଟି ଟଙ୍କାର ମିଛ ଦାନ, ୨୯ କୋଟି ଟଙ୍କାର ମିଛ ବିଜ୍ଞାପନ ମାଧ୍ୟମରେ ଅପରାଧମୂଳକ ଆୟ ସୃଷ୍ଟି କରାଯାଇଛି।
ଭାଜପା ଏହି ମାମଲାକୁ କଂଗ୍ରେସର ଦୁର୍ନୀତି ଓ ବଂଶବାଦୀ ରାଜନୀତିର ଉଦାହରଣ ବୋଲି ଅଭିହିତ କରିଛି। ଭାଜପା ନେତା ରବି ଶଙ୍କର ପ୍ରସାଦ ଓ ଅନୁରାଗ ଠାକୁର ଦାବି କରିଛନ୍ତି ଯେ ଗାନ୍ଧୀ ପରିବାର ଏକ ଟଙ୍କା ଖର୍ଚ୍ଚ ନକରି ହଜାର କୋଟି ଟଙ୍କାର ସମ୍ପତ୍ତି ହାତେଇଛନ୍ତି। ଅନ୍ୟପକ୍ଷରେ, କଂଗ୍ରେସ ଏହାକୁ ରାଜନୈତିକ ପ୍ରତିହିଂସା ବୋଲି କହି ଦାବି କରିଛି ।
ଭାଜପା ଦାବି କରିଛି ଯେ ୧୯୫୦ ମସିହାରେ ସର୍ଦ୍ଦାର ବଲ୍ଲଭଭାଇ ପଟେଲ ନେହେରୁଙ୍କୁ ନ୍ୟାଶନାଲ ହେରାଲ୍ଡର ଆର୍ଥିକ କାରବାର ନେଇ ଚେତାବନୀ ଦେଇଥିଲେ। ପଟେଲ ସନ୍ଦେହଜନକ ଉତ୍ସରୁ ଅର୍ଥ ଗ୍ରହଣ ନ କରିବାକୁ କହିଥିଲେ, କିନ୍ତୁ ନେହେରୁ ଏହାକୁ ଗୁରୁତ୍ୱ ଦେଇନଥିଲେ। ଭାଜପା କହୁଛି ଯେ ପଟେଲଙ୍କ ଏହି ଚେତାବନୀ ଆଜିର ଅଭିଯୋଗରେ ପ୍ରତିିଫଳିତ ହେଉଛି।
