ଭୁବନେଶ୍ୱର,୨୩।୮: କର୍ପୋରେଟ୍ ସାମାଜିକ ଦାୟିତ୍ୱ (ସିଏସ୍ଆର୍) କାର୍ଯ୍ୟ ନିମନ୍ତେ ଭାରତ ସରକାରଙ୍କ କର୍ପୋରେଟ ବ୍ୟାପାର ମନ୍ତ୍ରଣାଳୟ ଦ୍ୱାରା ପ୍ରଦାନ କରାଯାଉଥିବା ସମ୍ମାନଜନକ ଜାତୀୟ ସିଏସ୍ଆର୍ ପୁରସ୍କାର-୨୦୨୦ ପାଇଁ ଜିନ୍ଦଲ ଷ୍ଟିଲ ଆଣ୍ଡ ପାୱାର(ଜେଏସ୍ପି)କୁ ଦୁଇଟି ବର୍ଗରେ ବିଜେତା ଘୋଷଣା କରାଯାଇଛି। କର୍ପୋରେଟ ବ୍ୟାପାର ମନ୍ତ୍ରଣାଳୟର ପ୍ରେସ ବିଜ୍ଞପ୍ତି ଅନୁଯାୟୀ ନବୀନ ଜିନ୍ଦଲଙ୍କ ନେତୃତ୍ୱାଧୀନ ଅଗ୍ରଣୀ ଇସ୍ପାତ ନିର୍ମାତା ଜିନ୍ଦଲ ଷ୍ଟିଲ ଆଣ୍ଡ ପାୱାର ଆକାଂକ୍ଷା ଜିଲା-ଦୁର୍ଗମ ଅଞ୍ଚଳରେ ସିଏସ୍ଆର୍ (ପୂର୍ବ ଜୋନ) ଏବଂ ଜାତୀୟ ପ୍ରାଥମିକତା କ୍ଷେତ୍ରରେ ଅବଦାନ (ଦିବ୍ୟାଙ୍ଗଙ୍କୁ ସହାୟତା) ଶ୍ରେଣୀରେ ବିଜେତା ଭାବେ ମନୋନୀତ କରାଯାଇଛି। ବିଭିନ୍ନ ମନ୍ତ୍ରଣାଳୟ, ରାଜ୍ୟ ସରକାର, ଭାରତର ୩ ପ୍ରତିଷ୍ଠିତ ଅନୁଷ୍ଠାନ, ଇଣ୍ଡଷ୍ଟ୍ରି ଓ ବାଣିଜ୍ୟ ଚାମ୍ବର ଏବଂ ଗୋଷ୍ଠୀ ସମୂହଙ୍କ ସହ ସିଧାସଳଖ କଥାବାର୍ତ୍ତା ପରେ କର୍ପୋରେଟ ବ୍ୟାପାର ମନ୍ତ୍ରଣାଳୟ ଦ୍ୱାରା କରାଯାଇଥିବା ଏକ ତିନି ପର୍ଯ୍ୟାୟ ଚୟନ ପ୍ରକ୍ରିୟା ପରେ ଜେଏସ୍ପି ଏହି ପୁରସ୍କାର ପାଇଁ ମନୋନୀତ ହୋଇଛି।
ଏ ସମ୍ପର୍କରେ ଜେଏସ୍ପିର ଚେୟାରମ୍ୟାନ ନବୀନ ଜିନ୍ଦଲ କହିଛନ୍ତି, ଲୋକଙ୍କ ସହଭାଗିତା ତଥା ପରିବେଶ ସୁରକ୍ଷା ପ୍ରତି ଧ୍ୟାନ ଦେଇ ଶିଳ୍ପାୟନ ମାଧ୍ୟମରେ ଆମେ ସାମଗ୍ରିକ ବିକାଶ ନିମନ୍ତେ କାର୍ଯ୍ୟ କରିବାରେ ବିଶ୍ବାସ କରୁ। ସ୍ଥାନୀୟ ଜନସାଧାରଙ୍କ ଜୀବନ ଧାରଣ ମୂଲ୍ୟରେ ଉନ୍ନତି ନିମନ୍ତେ ସିଏସ୍ଆର୍ ମାଧ୍ୟମରେ ଆମେ ବିଭିନ୍ନ ବହୁମୁଖୀ ସାମାଜିକ ବିକାଶ କାର୍ଯ୍ୟକ୍ରମ କାର୍ଯ୍ୟକାରୀ କରୁଛୁ। ଏହି ପୁରସ୍କାର ନିଶ୍ଚିତ ଭାବେ ଆମ ପାଇଁ ଏକ ବଡ ସ୍ବୀକୃତି ଏବଂ ଆମ ପାଇଁ ସର୍ବଦା ଜନସାଧାରଣ ହିଁ ପ୍ରଥମ।
