ଭଞ୍ଜନଗର,୯।୬(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ଶ୍ରୀଅରବିନ୍ଦ ଶକ୍ତିପୀଠ ପରିସରରେ ସୋମବାର ପୂର୍ବତନ ମୁଖ୍ୟମନ୍ତ୍ରୀ ନନ୍ଦିନୀ ଶତପଥୀଙ୍କ ୯୪ ତମ ଜୟନ୍ତୀ ପାଳିତ ହୋଇଯାଇଛି। ନନ୍ଦିନୀ ଶତପଥୀ ସ୍ମୃତି ସଂସଦ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ସଂସଦର ସଭାପତି କୃତିବାସ ବିଶ୍ବାଳ ଅଧ୍ୟକ୍ଷତା କରିଥିଲେ। ଏଥିରେ ଅତିଥି ଭାବେ କେନ୍ଦୁପଦର କଲେଜର ଅବସରପ୍ରାପ୍ତ ଅଧ୍ୟକ୍ଷ ଡ ସନ୍ତୋଷ କୁମାର ଆପଟ,ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ପ୍ରଶାସନିକ ଅଧିକାରୀ ପ୍ରାଧ୍ୟାପକ ବିଭାସ ଦାସ, ଅବସରପ୍ରାପ୍ତ ପ୍ରାଧ୍ୟାପକ ଦାମୋଦର ଷଡ଼ଙ୍ଗୀ, ଘୁମୁସର ଗବେଷଣା ପ୍ରତିଷ୍ଠାନର ସମ୍ପାଦକ ଅଧ୍ୟାପକ ତପନ ମିଶ୍ର, ନିମ୍ନ ମାଧ୍ୟମିକ ଶିକ୍ଷକ ସଂଘର ରାଜ୍ୟ ଉପଦେଷ୍ଟା ଜଗବନ୍ଧୁ ଜେନା, ମାଧ୍ୟମିକ ସ୍କୁଲ ଶିକ୍ଷକ ସଙ୍ଘ ଗଞ୍ଜାମ ଜିଲ୍ଲା ସଭାପତି ସନ୍ତୋଷ ଜେନା, ହିଞ୍ଜିଳିକାଟୁ କେନ୍ଦ୍ରୀୟ ବିଦ୍ୟାଳୟର ପୂର୍ବତନ ଶିକ୍ଷୟିତ୍ରୀ ଶୁଭସ୍ମିତା ଦାସ ପ୍ରମୁଖ ଅତିଥି ଭାବେ ଯୋଗଦେଇ ନିଜ ନିଜର ବକ୍ତବ୍ୟ ରଖିଥିଲେ।
ସଭାପତି ବିଶ୍ବାଳ କହିଥିଲେ ଯେ, ଯୌତୁକ ନିର୍ଯାତନା ନିରୋଧ ଆଇନ, ଓଡ଼ିଶା ଭୂସଂସ୍କାର ଆଇନ, ବେସରକାରୀ ଶିକ୍ଷାନୁଷ୍ଠାନ ଗୁଡିକୁ ପ୍ରତ୍ୟକ୍ଷ ଦରମା ପ୍ରଦାନ, କେନ୍ଦୁପତ୍ର ତୋଳାଳୀଙ୍କ ପାରିଶ୍ରମିକ ବୃଦ୍ଧି, ଉତ୍କଳ ଦିବସକୁ ସରକାରୀ ଉତ୍ସବ ଭାବେ ପାଳନ, ବାର୍ଦ୍ଧକ୍ୟ ଭତ୍ତା ପ୍ରଦାନ ଭଳି ଯୁଗାନ୍ତକାରୀ ନିଷ୍ପତ୍ତି ନନ୍ଦିନୀ ଦେବୀ ନେଇଥିଲେ। ସନ୍ତୋଷ ଜେନା କହିଥିଲେ ଡହ ଜଳସେଚନ ପ୍ରକଳ୍ପର ଶୁଭାରମ୍ଭ ସମୟରେ ତାଙ୍କରି ନାମରେ ନନ୍ଦିନୀପଲ୍ଲୀ ଗ୍ରାମ ପ୍ରତିଷ୍ଠା ହୋଇଛି। ଭଞ୍ଜନଗର ଅଞ୍ଚଳରେ ଉକ୍ତ ପ୍ରକଳ୍ପ ଆଜି ଜଳସେଚନ କ୍ଷେତ୍ରରେ ପ୍ରମୁଖ ଭୂମିକା ନିଭାଉଛି। ଦାମୋଦର ଷଡ଼ଙ୍ଗୀ କହିଥିଲେ ରେଙ୍ଗାଲି ନଦୀ ବନ୍ଧ ଓ ଅପର କୋଲାବ ନନ୍ଦୀ ବନ୍ଧ ଯୋଜନା ତାଙ୍କରି ଶାସନ ସମୟରେ ହୋଇଥିଲା। ରାଉରକେଲାରେ ଏସିଆଟିକ ଅକ୍ସିଜେନ ପ୍ଲାଣ୍ଟ ସ୍ଥାପନ କରିଥିଲେ। ଯାହାକି ପରବର୍ତ୍ତୀ ପର୍ଯ୍ୟାୟରେ କରୋନା ସମୟରେ ଅକ୍ସିଜେନ ଯୋଗାଇବାରେ ପ୍ରମୁଖ ଭୂମିକା ନିଭାଇଥିଲେ ବୋଲି ଷଡଙ୍ଗୀ କହିଥିଲେ। ସନ୍ତୋଷ ଆପଟ କହିଥିଲେ, ନନ୍ଦିନୀ ଦେବୀ ଜଣେ ସାଲିସବିହୀନ ବ୍ୟକ୍ତିତ୍ୱ ଥିଲେ। ନୀତି ଓ ଆଦର୍ଶ ପାଇଁ ମୁଖ୍ୟମନ୍ତ୍ରୀ ପଦବୀ ୍ଯଯଯ ତ୍ୟାଗ କରିବାକୁ ସେ ପଛେଇନଥିଲେ। ତପନ ମିଶ୍ର କହିଥିଲେ
ନନ୍ଦିନୀ ଦେବୀଙ୍କ ସ୍ମୃତିରେ ଆଜି ଜାତୀୟ କନ୍ୟା ଦିବସ ପାଳିତ ହେଉଛି। ଛାତ୍ରୀ ଜୀବନରୁ ହିଁ ତାଙ୍କର ସଂଗ୍ରାମୀ ମାନସିକତା ପରିଲକ୍ଷିତ ହୋଇଥିଲା। ଯେଉଁଥିପାଇଁ ସେ ବ୍ରିଟିଶ ସରକାରଙ୍କ ଆକ୍ରୋଶର ଶିକାର ହେବାସହ ଜେଲ ଦଣ୍ଡ ଭୋଗିଥିଲେ ବୋଲି ବକ୍ତାମାନେ କହିଥିଲେ। ସମ୍ପାଦକ ବାବୁଲା ପ୍ରଧାନ ଧନ୍ୟବାଦ ପ୍ରଦାନ କରିଥିଲେ। କାର୍ଯ୍ୟକ୍ରମକୁ ପରିଚାଳନା କରିବାରେ ରମେଶ ବେହେରା, ଗୋପାଳ ମିଶ୍ର ପ୍ରମୁଖ ସହଯୋଗ କରିଥିଲେ। ଏହି ଅବସରରେ ଆଶ୍ରମ ପରିସରରେ ଚାରାରୋପଣ ହୋଇଥିଲା।
