କୁଜଙ୍ଗ,୨୧।୧୦(ମନୋଜ ପ୍ରଧାନ): କୁଜଙ୍ଗ ବ୍ଲକ ହଂସୁରା ପଞ୍ଚାୟତର ବିଜୟୀ ସରପଞ୍ଚ ରବି ନାରାୟଣ ଦାସଙ୍କୁ କୁଜଙ୍ଗ ସିଭିଲ ଜଜ୍ ଜୁନିୟର ଡିଭିଜନ ଅଦାଲତ ୧୬ ତାରିଖରେ ଅସିଦ୍ଧ ଘୋଷଣା କରିଥିଲେ। ଏହାପରେ ଶୁକ୍ରବାର ଏହି ପଞ୍ଚାୟତର ନାଏବ ସରପଞ୍ଚ ଅନିତ୍ୱ ମହାପାତ୍ରଙ୍କୁ ସରପଞ୍ଚ ଦାୟିତ୍ୱ ଦିଆଯାଇଛି। ଏହି ଦାୟିତ୍ୱ ହସ୍ତାନ୍ତର ପାଇଁ ବିଡିଓ ଦୀପକ ପ୍ରସାଦ ସ୍ବାଇଁ ଚିଠି (ନଂ. ୫୮୮୪/୨୦।୧୦।୨୩)ରେ ରବିନାରାୟଣଙ୍କୁ ସୂଚନା ଦେଇଥିଲେ। ମାତ୍ର ସେ ଅନୁପସ୍ଥିତ ରହିବାରୁ ଚିଠିର ଲଟକା ଜାରି କରାଯାଇଛି ବୋଲି ବିଡିଓ ସ୍ବାଇଁ ପ୍ରକାଶ କରିଛନ୍ତି। ସୂଚନାଯୋଗ୍ୟ, ଗତ ତ୍ରିସ୍ତରୀୟ ନିର୍ବାଚନରେ ରବିନାରାୟଣ ୮୨୧ଖଣ୍ଡ ଭୋଟପାଇ ବିଜୟୀ ଘୋଷିତ ହୋଇଥିଲାବେଳେ ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ଆଲୋକ ମଲ୍ଲିକ ୮୨୦ଖଣ୍ଡ ଭୋଟ ପାଇ ମାତ୍ର ଗୋଟିଏ ଭୋଟ୍ରେ ପରାଜିତ ହୋଇଥିଲେ। ବେଆଇନ ଭାବେ ରବି ନାରାୟଣ ନିର୍ବାଚନ ଜିତିଥିବା ଅଭିଯୋଗ କରି ଆଲୋକ ୨୦୨୨ ମାର୍ଚ୍ଚ ୧୧ ରେ କୁଜଙ୍ଗ ସିଭିଲ ଜଜ୍ ଜୁନିୟର ଡିଭିଜନଙ୍କ ଅଦାଲତରେ ମକଦ୍ଦମା କରିଥିଲେ। ବିଚାରପତି ଏହି ମାମଲାର ଫଇସଲା କରିବା ପୂର୍ବରୁ ୨୦୨୩ ଫେବୃୟାରୀ ୪ରେ ଭୋଟକୁ ପୁନଃ ଗଣତି ପାଇଁ ଆଦେଶ ଦେଇଥିଲେ । ଉକ୍ତ ଆଦେଶ ବିରୋଧରେ ରବୀନ୍ଦ୍ର ନାରାୟଣ ନଂ.୩୭୩୫/୨୩ ରେ ଉଚ୍ଚନ୍ୟାୟାଳୟରେ ରିଟ ପିଟିଶନ ଦାଖଲ କରିଥିଲେ । ଉକ୍ତ ପିଟିଶନକୁ ଆଧାରକରି ଉଚ୍ଚ ନ୍ୟାୟଳୟ ୨୦୨୩ ଫେବୃୟାରୀ ୧୭ରେ ବୁଥ୍ ନଂ୯ର ଭୋଟ ଓ ନାକଚ ହୋଇଥିବା ୩୧ ଖଣ୍ଡ ଭୋଟକୁ ପୁନଃ ଗଣତି ପାଇଁ ନିର୍ଦ୍ଦେଶ ଦେଇଥିଲେ । ଉକ୍ତ ଆଦେଶ ବିରୋଧରେ ରବି ନାରାୟଣ ଉଚ୍ଚ ନ୍ୟାୟାଳୟର ମୁଖ୍ୟ ବିଚାରପତିଙ୍କ ଅଦାଲତରେ ଅପିଲ କରିଥିଲେ । ମୁଖ୍ୟ ବିଚାରପତି ୨୦୨୩ ମେ ୧୧ରେ କୁଜଙ୍ଗ ବିଡିଓ ତଥା ନିର୍ବାଚନ ଅଧିକାରୀଙ୍କ ସାକ୍ଷ୍ୟ ଗ୍ରହଣ କରି ପୂର୍ବ ନିର୍ଦ୍ଦେଶକୁ ବାତିଲ କରିଥିଲେ। ସିଭିଲ ଜଜ ଜୁନିୟର ଡିଭିଜନ ଅଦାଲତକୁ ୨୦୨୩ ଅକ୍ଟୋବର ୧୫ତାରିଖ ସୁଦ୍ଧା ଫଇସଲା କରିବା ପାଇଁ ନିର୍ଦ୍ଦେଶ ଦେଇଥିଲେ। ଏହାପରେ କୁଜଙ୍ଗ ସିଭିଲ ଜଜ ଜୁନିୟର ଡିଭିଜନ ଅନୁରାଧା ଶର୍ମା ଏହାର ବିଚାରକରି ରବିନାରାୟଣଙ୍କ ସରପଞ୍ଚ ପଦବୀକୁ ଅସିଦ୍ଧ ଘୋଷଣା କରିଥିଲେ।
