ନୂଆଦିଲ୍ଲୀ,୧୩ା୭(ପି.ଟି.): ଭାଜପାର ସର୍ବୋଚ୍ଚ ନୀତି ନିର୍ଦ୍ଧାରକ ସଂସ୍ଥା ସଂସଦୀୟ ବୋର୍ଡରେ ଅନେକ ନୂଆ ମୁହଁ ସ୍ଥାନ ପାଇବାକୁ ଯାଉଛନ୍ତି। ଖୁବ୍ଶୀଘ୍ର ନୂଆ କାର୍ଯ୍ୟକର୍ତ୍ତା ଟିମ୍ ଘୋଷଣା କରାଯିବ ବୋଲି ଭାଜପା ଅଧ୍ୟକ୍ଷ ଜେ.ପି. ନଡ୍ଡା କହିଛନ୍ତି। ଗତ ଜାନୁୟାରୀରେ ନଡ୍ଡା ଭାଜପା ଅଧ୍ୟକ୍ଷ ଦାୟିତ୍ୱ ଗ୍ରହଣ କରିଥିଲେ ହେଁ କୋଭିଡ୍-୧୯ ଯୋଗୁ ନୂଆ କାର୍ଯ୍ୟକର୍ତ୍ତା ଘୋଷଣା ବିଳମ୍ବ ହୋଇଛି। ନୂଆ ଟିମ୍ରେ ପୁରୁଣା କାର୍ଯ୍ୟକର୍ତ୍ତାଙ୍କ ସହ ନୂଆ ମୁହଁ ସ୍ଥାନ ପାଇବେ। ବରିଷ୍ଠ ନେତା ଅନନ୍ତ କୁମାର, ସୁଷମା ସ୍ବରାଜ, ଅରୁଣ ଜେଟଲୀଙ୍କ ପରଲୋକ ଏବଂ ଏମ୍ ଭେଙ୍କାୟାନାଇଡୁ ଉପରାଷ୍ଟ୍ରପତି ନିର୍ବାଚିତ ହେବା ପରେ ସଂସଦୀୟ ବୋର୍ଡରେ ସେମାନଙ୍କ ପଦବୀ ଖାଲି ପଡ଼ିଛି। ସୁଷମାଙ୍କ ସ୍ଥାନରେ ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ବୋର୍ଡରେ ସ୍ଥାନ ପାଇବା ଅନେକ ବିଶ୍ୱାସ କରୁନ୍ତି। କେନ୍ଦ୍ର ମନ୍ତ୍ରିମଣ୍ଡଳରେ ଅଦଳବଦଳ ହେବାକୁ ଥିବାରୁ କେତେକ ଭାଜପା କାର୍ଯ୍ୟକର୍ତ୍ତା ସ୍ଥାନ ପାଇପାରନ୍ତି। ସେମାନଙ୍କ ସ୍ଥାନରେ ସଂଗଠନରେ ନୂଆ ସଦସ୍ୟଙ୍କୁ ସ୍ଥାନ ମିଳିବ।
