ନୂଆଦିଲ୍ଲୀ, ୧୫।୩ ଟାଟା ସନ୍ସର ମୁଖ୍ୟ ନଟରାଜ ଚନ୍ଦ୍ରଶେଖରନ ଏୟାର ଇଣ୍ଡିଆର ଅଧ୍ୟକ୍ଷ ଭାବେ ନିଯୁକ୍ତ ହୋଇଛନ୍ତି। ଟାଟା ଗ୍ରୁପ୍ ପକ୍ଷରୁ ସୋମବାର ଏନେଇ ଘୋଷଣା କରାଯାଇଛି। କିଛିଦିନ ତଳେ ତୁର୍କୀ ଏୟାରଲାଇନ୍ସର ପୂର୍ବତନ ଚେୟାରମ୍ୟାନ ଇଲ୍କର ଅୟସିଙ୍କୁ ଏୟାର ଇଣ୍ଡିଆର ମୁଖ୍ୟ କାର୍ଯ୍ୟନିର୍ବାହୀ ଓ ପରିଚାଳନା ନିର୍ଦ୍ଦେଶକ ଭାବେ ଟାଟା ଗ୍ରୁପ୍ ପକ୍ଷରୁ ଅଫର ଦିଆଯାଇଥିଲା। କିନ୍ତୁ ଏହାକୁ ଭାରତରେ ବହୁ ବିରୋଧ କରାଯାଇଥିଲା। ଫଳରେ ଟାଟାର ଏୟାର ଇଣ୍ଡିଆ ମୁଖ୍ୟ କାର୍ଯ୍ୟନିର୍ବାହୀ ହେବାକୁ ଇଲ୍କର ଅୟସି ମନା କରିଦେଇଥିଲେ। ଟାଟା ସନ୍ସ ଅଧୀନରେ ୧୦୦ରୁ ଊର୍ଦ୍ଧ୍ୱ ଟାଟା ଅପରେଟିଂ କମ୍ପାନୀ କାର୍ଯ୍ୟକରୁଛି। ଏନ୍. ଚନ୍ଦ୍ରଶେଖରନ ୨୦୧୬ ଅକ୍ଟୋବରରେ ଟାଟା ସନ୍ସ ବୋର୍ଡରେ ଯୋଗଦେଇଥିଲେ ଏବଂ ୨୦୧୭ ଜାନୁୟାରୀରେ ଟାଟା ସନ୍ସର ଚେୟାରମ୍ୟାନ ନିଯୁକ୍ତ ହୋଇଥିଲେ। ଟାଟା ଷ୍ଟିଲ୍, ଟାଟା ମୋଟର୍ସ, ଟାଟା ପାଓ୍ବାର, ଟାଟା କନ୍ସଲଟାନ୍ସ ସର୍ଭିସେସ୍(ଟିସିଏସ୍) ଭଳି କେତେକ ଗ୍ରୁପ୍ ଅପରେଟିଂ କମ୍ପାନୀର ବୋର୍ଡଗୁଡ଼ିକରେ ଚନ୍ଦ୍ରଶେଖରନ ରହିଛନ୍ତି। ତାମିଲନାଡ଼ୁର ନମକ୍କଲ ଜିଲା ମୋହନୁର ଗ୍ରାମରେ ୧୯୬୩ ଜୁନ୍ ୨ରେ ଜନ୍ମଗ୍ରହଣ କରିଥିବା ଚନ୍ଦ୍ରଶେଖରନ ୧୯୮୬ରେ ଏମ୍ସିଏ ଡିଗ୍ରୀ ହାସଲ କରିଥିଲେ। ୧୯୮୭ରେ ସେ ଟିସିଏସ୍ରେ ଯୋଗଦେଇଥିଲେ। ୨୦୦୯ ଅକ୍ଟୋବର ୬ରେ ସେ ଟିସିଏସ୍ର ସିଇଓ ଭାବେ ଦାୟିତ୍ୱ ଗ୍ରହଣ କରିଥିଲେ। ୨୦୧୬ ଅକ୍ଟୋବର ୨୫ରେ ସେ ଟିସିଏସ୍ର ପରିଚାଳନା ନିର୍ଦ୍ଦେଶକ ଏବଂ ଟାଟା ସନ୍ସ ବୋର୍ଡର ଅତିରିକ୍ତ ନିର୍ଦ୍ଦେଶକ ଭାବେ ନିଯୁକ୍ତ ହୋଇଥିଲେ। ପରେ ପ୍ରଥମ ଅଣପାର୍ସୀ ଚନ୍ଦ୍ରଶେଖରନ ଟାଟା ଗ୍ରୁପ୍ର ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିଥିଲେ।
