ଦେବଗଡ,୮।୭(ଶଶାଙ୍କ ଶେଖର ଝାଙ୍କର): ଦେବଗଡ଼ ଜିଲା କୁଣ୍ଢେଇଗୋଳା ଥାନା ଠିଆନାଳ ଗ୍ରାମର ଏକ ନାଳରୁ ଜଣେ ଅଚିହ୍ନା ଯୁବତୀଙ୍କ ଗଳିତ ମୃତଦେହ ଉଦ୍ଧାର ହେବାର ଇତି ମଧ୍ୟରେ ୭ ଦିନ ବିତିଯାଇଛି । ମାତ୍ର ମୃତା ଯୁବତୀଙ୍କ ପରିଚୟ ଏପର୍ଯ୍ୟନ୍ତ ମିଳିପାରିନଥିବାରୁ ଏହା ଏବେ ମଧ୍ୟ ରହସ୍ୟ ଘେରରେ ରହିଛି । ପୋଲିସ ସୋମବାର ମୃତଦେହକୁ ମାଟିରେ ପୋତିବାକୁ ବାଧ୍ୟ ହୋଇଛି। ସୂଚନାଯୋଗ୍ୟ,ଗତ ୧ ତାରିଖ ଅପରାହ୍ନରେ କୁଣ୍ଢେଇଗୋଳା ଥାନା ବୁଢାପାଳ ଗ୍ରାମ ପଂଚାୟତ ଅନ୍ତର୍ଗତ ଠିଆନାଳ ଗ୍ରାମର ଏକ ନାଳରେ ଜଣେ ଅଚିହ୍ନା ଯୁବତୀଙ୍କର ମୃତଦେହ ଠାବ ହୋଇଥିଲା । ୨ ତାରିଖ ସଂଧ୍ୟାରେ ପୋଲିସ ଡଗ ସ୍କ୍ବାର୍ଡ ଓ ସାଇଂଟିଫିକ ଟିମ ସହାୟତାରେ ଘଟଣାସ୍ଥଳରେ ତଦନ୍ତ କରି ମୃତଦେହ ଉଦ୍ଧାର କରିଥିବା ବେଳେ ଏହା ଏକ ହତ୍ୟାକାଣ୍ଡ ବୋଲି ସ୍ପଷ୍ଟ ହୋଇଥିଲା । ମାତ୍ର ଯୁବତୀଙ୍କ ମୁହଁ ସମେତ ଶରୀରର ବିଭିନ୍ନ ଅଂଶ ସଢି ଯାଇଥିବାରୁ ତାଙ୍କର ପରିଚୟ ପାଇବାରେ ପୋଲିସ ବିଫଳ ହୋଇଥିଲା । ଫଳରେ ପୋଲିସ ନିଜ ଆଡୁ ଏକ ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ ପାଇଁ ପଠାଇ ଦେଇଥିଲା । ନିୟମ ଅନୁଯାୟୀ ଅଚିହ୍ନା ଶବ ହୋଇଥିବାରୁ ପୋଲିସ ବ୍ୟବଚ୍ଛେଦର ଦୀର୍ଘ ୭୨ ଘଂଟା ପର୍ଯ୍ୟନ୍ତ ନିଜ ହେପାଜତରେ ଦେବଗଡ ଜିଲା ମୁଖ୍ୟ ଚିକିତ୍ସାଳୟରେ ମୃତଦେହକୁ ସଂରକ୍ଷିତ ରଖିଥିଲା। ଆଖପାଖ ଥାନାରେ ଯୁବତୀ ନିଖୋଜ ଏତଲା ଦେଇଥିବା ପରିବାର ଲୋକଙ୍କୁ ଡାକି ଶବ ଚିହ୍ନଟ କରିବାକୁ ପୋଲିସ ଚେଷ୍ଟା କରିଥିଲେ ମଧ୍ୟ ଯୁବତୀଙ୍କର ମୃତଦେହ ଚିହ୍ନଟ ହୋଇପାରିନଥିଲା । ଫଳରେ ବର୍ତମାନ ପର୍ଯ୍ୟନ୍ତ ଏହି ଘଟଣା ରହସ୍ୟ ଘରରେ ରହିଥିବା ବେଳେ ଯୁବତୀ ଜଣକ କିଏ ଓ ତାଙ୍କୁ କିଏ ଏବଂ କାହିଁକି ହତ୍ୟା କରିଛି ସେନେଇ ନାନା ପ୍ରଶ୍ନବାଚୀ ସୃଷ୍ଟି ହୋଇଛି । ଅନ୍ୟପକ୍ଷରେ ହତ୍ୟାକାରୀମାନେ ଖସିଯିବାର ଆଶଙ୍କା ଦେଖାଦେଇଛି । ତେବେ ରହସ୍ୟ ଉନ୍ନୋଚନ ପାଇଁ କୁଣ୍ଢେଇଗୋଳା ଥାନା ପୋଲିସ ପକ୍ଷରୁ ଅଧିକ ଖୋଳତାଡ ଜାରୀ ରହିଛି ।
