ପଦ୍ମପୁର,୬।୩(ଡି.ଏନ.ଏ.): ଭଦ୍ରକ ଜିଲା ବାସୁଦେବପୁର ବ୍ଲକ ଲକ୍ଷ୍ମୀଦାସପୁର ପଞ୍ଚାୟତ ଖେଡୁଆଳପୁର ଗ୍ରାମରେ ପୂଜାରାଣୀ ପୁହାଣ ନାମ୍ନୀ ଯୁବତୀ ଗତ ୨ ତାରିଖରେ ବେକରେ ରଶି ଲଗାଇ ଆତ୍ମହତ୍ୟା କରିଥିଲେ। ଏନେଇ ନାୟକାଣିଡିହୀ ଥାନାରେ ଏକ ଅପମୃତ୍ୟୁ ମାମଲା (ନଂ. ୫/୨୩) ରୁଜୁ କରାଯାଇଥିଲା। ତେବେ ତାଙ୍କ ଝିଅକୁ ହତ୍ୟା କରାଯାଇଥିବା ମୃତ ପୂଜାରାଣୀଙ୍କ ମା’ ମଞ୍ଜୁଲତା ରବିବାର ଥାନାରେ ଅଭିଯୋଗ କରିଛନ୍ତି। ସେ ଏତଲାରେ ଉଲ୍ଲେଖ କରିଛନ୍ତି ଯେ, ଝିଅର ମୋବାଇଲରୁ ଜାଣିବାକୁ ପାଇଛନ୍ତି କି ଉକ୍ତ ଥାନା ଅଧୀନ ପାଳସାହି ଗ୍ରାମର ଜଣେ ଯୁବକ ତାଙ୍କ ଝିଅକୁ ବିଭିନ୍ନ ସମୟରେ ବ୍ଲାକମେଲିଂ ସହ ଆତ୍ମହତ୍ୟା କରିବାକୁ ବାଧ୍ୟ କରୁଥିଲେ। ତାଙ୍କ ଝିଅ ଓ ଉକ୍ତ ଯୁବକ କରଞ୍ଜଆଡ଼ିଆ କଲେଜରେ ପାଠ ପଢ଼ୁଥିଲେ। ପ୍ରଥମେ ଉଭୟ ବନ୍ଧୁ ଥିବାବେଳେ ପରବର୍ତ୍ତୀ ସମୟରେ ସେମାନଙ୍କ ମଧ୍ୟରେ ବିବାଦ ଉପୁଜିଥିଲା। ଏହାକୁ ନେଇ ଯୁବକ ଜଣକ ବିଭିନ୍ନ ସମୟରେ ତାଙ୍କ ଝିଅକୁ ଗାଳିଗୁଲଜ ସହ ଫଟୋ ଭାଇରାଲ କରିଦେବେ ବୋଲି ଧମକ ଦେଉଥିଲେ। ଏପରିକି ଘଟଣା ଦିନ ସେ ତାଙ୍କ ଝିଅ ମୋବାଇଲକୁ ୩୩ ଥର କଲ୍ କରିଥିଲେ। ଏନେଇ ଏକ ହତ୍ୟା ମାମଲା (ନଂ. ୪୭/୨୩) ରୁଜୁ କରାଯାଇ ଘଟଣାର ତଦନ୍ତ ଚାଲିଥିବା ତଦନ୍ତକାରୀ ଅଧିକାରୀ ମହେଶ୍ୱର ପ୍ରଧାନ କହିଛନ୍ତି।
