ପୋଲସରା,୧୫।୫(ଡି.ଏନ୍.ଏ.): ଗଞ୍ଜାମ ଜିଲା ପୋଲସରା ଥାନା ଅଧିନ କଳମ୍ବ ଗ୍ରାମରେ ଶନିବାର ରାତିରେ ଏକ ଜଘନ୍ୟ ହତ୍ୟାକାଣ୍ଡ ଘଟିଛି। ହତ୍ୟାକାଣ୍ଡର ଶିକାର ହୋଇଥିବା ଯୁବକ ଜଣକ ହେଲେ ଉକ୍ତ ଗ୍ରାମର ବିକାଶ ସାହୁ ଓରଫ କାଉ(୨୮)।
ସୂଚନାନୁଯାୟୀ, କଳମ୍ବ ଗ୍ରାମରେ ଚଳିତ ମାସ ୬ ରୁ ୧୦ତାରିଖ ପର୍ଯ୍ୟନ୍ତ ମନ୍ଦିର ପ୍ରତିଷ୍ଠା କାର୍ଯ୍ୟସହ ନାମଯଜ୍ଞ,ଅର୍ଣ୍ଣ ଯଜ୍ଞ ଓ ଜ୍ଞାନ ଯଜ୍ଞ ଚାଲିଥିଲା। ଉକ୍ତ ଯଜ୍ଞ ସମୟରେ କିଛି ଯୁବକ ପେଁ କାଳି ବଜାଇ ବିକଟାଳ ଶବ୍ଦ କରି ବୁଲୁଥିଲେ। ଏହାକୁ ନେଇ ବିକାଶ ଓରଫ କାଉ ଏହ ଶବ୍ଦ ନ କରିବା ପାଇଁ କହିଥିଲେ। ଏହି ଘଟଣାକୁ ନେଇ ଗ୍ରାମରେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ପରେ ପରେ ଘଟଣାକୁ ନେଇ ପରିସ୍ଥିତି ସାମାନ୍ୟ ହୋଇଥିଲା। କିନ୍ତୁ ଉଭୟଙ୍କ ମନ ମଧ୍ୟରେ ମନୋମାଳିନ୍ୟ ଲାଗି ରହିଥିଲା। ଶନିବାର ରାତ୍ରରେ କଳମ୍ବ ଗ୍ରାମରେ ଜ୍ଞାନ ଯଜ୍ଞ ଚାଲିଥିବା ସମୟରେ ବିକାଶଙ୍କ ବିପକ୍ଷ ଗୋଷ୍ଠୀର ଯୁବକମାନେ ତାଙ୍କ ଘର ନିକଟକୁ ଯାଇ ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ। ଫେରିବା ସମୟରେ ବିକାଶକୁ ସ୍କୁଲ ସାହିର ବିଦ୍ୟାଳୟ ସମ୍ମୁଖରେ ହିଁ କିଛି ଯୁବକ ସଂଙ୍ଘବଧ ହୋଇ ଏକ ଧାରୁଆ ଅସ୍ତ୍ର ରେ ବିକାଶର ଗଳା କାଟି ହତ୍ୟା କରିଥିଲେ। ଘଟଣା ପରେ ପରେ ପରିବାର ପକ୍ଷରୁ ପୋଲସରା ଥାନାକୁ ଖବର ଦେଇଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ରକ୍ତ ଜୁଡୁବୁଡୁ ଶବକୁ ଜବତ କରିବା ସହିତ ତଦନ୍ତ ଜାରି ରଖିଛି । ଅଭିଯୋଗକାରୀଙ୍କ ଏତଲାନୁଯାୟୀ କେସ ନଂ(୧୯୨/୨୨) ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ପଠାଇଛି। ଘଟଣା ସ୍ଥଳରେ ପୋଲସରା ପୋଲିସ ମୁତୟନ ହୋଇଛି।
