ଦିଗପହଣ୍ଡି,୧୪।୨(ଅଶେଷ ନାଥ ମିଶ୍ର): ଦିଗପହଣ୍ଡି ବ୍ଳକ ବି. ତୁରୁୁବୁଡି ପଞ୍ଚାୟତ ନରେନ୍ଦ୍ରପୁର ଗାଁର ବଙ୍ଗାଳି ନାଇକଙ୍କୁ ଗୁଣିଆ ସନ୍ଦେହରେ ହତ୍ୟା ଉଦ୍ୟମ କରାଯାଛି। ବଙ୍ଗାଳିଙ୍କୁ ତାଙ୍କ ଭାଇ କୁରେଶୁ ନାଇକ ଏବଂ ଭାଇ ବୋହୂ ରୀତା ନାଇକ,ଝିଆରୀ ବର୍ଷା ନାଇକ ଗତ ୩ ତାରିଖ ସକାଳେ କାତି ଓ ଠେଙ୍ଗା ଦ୍ୱାରା ହତ୍ୟା ଉଦ୍ୟମ କରିଥିଲେ। ଏହି ଘଟଣାରେ ସମ୍ପୃକ୍ତ ଦମ୍ପତ୍ତିଙ୍କୁ ଥାନା ମାମଲା ନଂ.୬୭/୨୫ ଅନୁଯାୟୀ ଦିଗପହଣ୍ଡି ପୋଲିସ ଗିରଫ କରି କୋର୍ଟ ଚାଲାଣ କରିଛନ୍ତି। ଜାମିନ ଆବେଦନ ଖାରଜ ହେବାରୁ ଉଭୟଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି।
ଗତ କିଛିଦିନ ହେଲା ରୀତାଙ୍କ ପିନ୍ଧା ଲୁଗା ଗୁଡ଼ିକରୁ କେହି କନା କାଟି ନେଇଯାଉଥିଲେ। ଗୁଣି ଗାରେଡ଼ି କରି ତନ୍ତ୍ର ସାଧନା ପାଇଁ କୁରେଶୁ ହିଁ ରୀତାଙ୍କ ଲୁଗା କାଟୁଥିବା ନେଇ କୁରେଶୁ ଏବଂ ରୀତା ସନ୍ଦେହ କରିଥିଲେ। ଘଟଣା ଦିନ ସକାଳ ପ୍ରାୟ ୬ ଟାରେ ବଡ଼ ଭାଇ ବଙ୍ଗାଳି ଘର ବାରଣ୍ଡାରେ ବସିଥିବା ବେଳେ ସାନଭାଇ କୁରେଶୁ , ଭାଇ ବୋହୂ ରୀତା ଏବଂ ଝିଆରୀ ବର୍ଷା ପହଞ୍ଚି ତାଙ୍କୁ ଆପତ୍ତି ଜନକ ଭାଷାରେ ଗାଳି କରିବା ସହ ଲୁଗା କାହିଁକି କାଟି ନେଉଛୁ ବୋଲି ପଚାରିଥିଲେ। ବଙ୍ଗାଳି ଅଭିଯୋଗକୁ ଅସ୍ବୀକାର କରିବାରୁ ସେମାନେ ତାଙ୍କୁ ସଂଘବଦ୍ଧ ଭାବେ ଆକ୍ରମଣ କରିଥିଲେ। ବଙ୍ଗାଳିଙ୍କ ମୁଣ୍ଡକୁ କୁରେଶୁ କାତିରେ ଚୋଟ ପକାଇଥିଲେ। ପରେ ତାଙ୍କୁ ଠେଙ୍ଗାରେ ମାଡ଼ ମାରିଥିଲେ। ପାଟି ଶୁଣି ବଙ୍ଗାଳିଙ୍କ ସ୍ତ୍ରୀ ଘଟଣାସ୍ଥଳକୁ ଦୌଡ଼ି ଆସିବାରୁ ବର୍ଷା ଏକ ଲୁହା ଫୁଙ୍କୁନଳାରେ ତାଙ୍କ ମୁଣ୍ଡ କୁ ମାଡ଼ ମାରିଥିଲେ। ଉଭୟଙ୍କୁ ରକ୍ତାକ୍ତ ଅବସ୍ଥାରେ ପ୍ରଥମେ ଦିଗପହଣ୍ଡି ଗୋଷ୍ଠୀ ସୱାସ୍ଥ୍ୟକେନ୍ଦ୍ର ରେ ଭର୍ତ୍ତି କରାଯାଇଥିଲା।ସେଠାରେ ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ବଙ୍ଗାଳି ଙ୍କୁ ବ୍ରହ୍ମପୁର ବଡ ଡାକ୍ତରଖାନା କୁ ସ୍ଥାନାନ୍ତର କରାଯାଇଥିଲା।ସେଠାରୁ ଚିକିତ୍ସା ହୋଇ ଫେରିବା ପରେ ଗୁରବାର ସେ ଦିଗପହଣ୍ଡି ଥାନାରେ ପହଞ୍ଚି ଏତଲା ଦେଇଥିଲେ।ଏତଲାକୁ ଭିତ୍ତିକରି ଭାରପ୍ରାପ୍ତ ଆଇଆଇସି ଜ୍ୟୋତି ରଞ୍ଜନ ବେହେରା ଅଭିଯୁକ୍ତ ମାନଙ୍କ ବିରୋଧରେ ମକଦ୍ଦମା ରୁଜୁ କରିବା ସହ ନିଜେ ତଦନ୍ତଭାର ଗ୍ରହଣ କରି ଅଭିଯୁକ୍ତ ଦ୍ବୟ ଙ୍କୁ ଶୁକ୍ରବାର ସକାଳେ ଗିରଫ କରି କୋର୍ଟ ଚାଲାଣ କରିଥିବାବେଳେ ଅନ୍ୟତମ ଅଭିଯୁକ୍ତ ବର୍ଷା ଫେରାର ଥିବା ଜଣାପଡିଛି।
