ଶାରଜା,୨।୧୦: ଚଳିତ ଆଇପିଏଲ୍ର ଶନିବାର ଗୁରୁତ୍ୱପୂର୍ଣ୍ଣ ମୁକାବିଲାରେ ରିଷଭ ପନ୍ତଙ୍କ ଦିଲ୍ଲୀ କ୍ୟାପିଟାଲ ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଏହାକୁ ସଠିକ୍ ପ୍ରମାଣିତ କରିଥିଲେ ବୋଲର। ୨୦ ଓଭରରେ ୮ ଉଇକେଟ ହରାଇ ମୁମ୍ବାଇ ଇଣ୍ଡିଆନ୍ସ ୧୨୯ ରନ୍ରେ ଅଟକି ଯାଇଥିଲା।
ମାପଚୁପ ବୋଲିଂ ଯୋଗୁ ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମା ଏବଂ କ୍ୱିଣ୍ଟନ ଡି କକଙ୍କ ଓପନିଂ ଯୋଡି ମଧ୍ୟ ଖାସି କିଛି କମାଲ କରି ପାରି ନ ଥିଲେ। ଅଧିନାୟକ ରୋହିତ ଶର୍ମା ୭ ରନ୍ କରି ଆବେଶ ଖାନ୍ଙ୍କ ବଲ୍ରେ ଆଉଟ ହୋଇଯାଇଥିଲେ। ଏହାର କିଛି ସମୟ ପରେ କ୍ୱିଣ୍ଟନ ଡି କକ୍ ମଧ୍ୟ ୧୯ ରନ୍ କରି ଅକ୍ଷର ପଟେଲଙ୍କ ବଲରେ ଆଉଟ ହୋଇଥିଲେ। ଅକ୍ଷର ପଟେଲଙ୍କ ଘାତକ ବୋଲିଂ ସତ୍ତ୍ୱେ ସୂର୍ଯ୍ୟକୁମାର ଯାଦବ ଦଳକୁ ଆଗକୁ ନେବାକୁ ଚେଷ୍ଟା କରି ୩୩ ରନ୍ରେ କ୍ୟାଚ୍ ଆଉଟ ହୋଇଯାଇଥିଲା। ସୌରଭ ତିଓ୍ବାରି ୧୫ ରନ୍ କରିଥିବା ବେଳେ କିରନ ପୋଲାର୍ଡ ୬ , ଅଲ୍ରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ୧୭, କ୍ରୁନାଲ ପାଣ୍ଡ୍ୟା (ଅପରାଜିତ ୧୩ ), ନାଥାନ କଲଟର ନାଇଲ ୧, ଜୟନ୍ତ ଯାଦବ ୧୧ ଓ ଜସପ୍ରୀତ ବୁମ୍ରା ୧ ରନ ସଂଗ୍ରହ କରିଥିଲେ।
ଦିଲ୍ଲୀ କ୍ୟାପିଟାଲ ଅକ୍ଷର ପଟେଲ ଏବଂ ଆବେଶ ଖାନ୍ ୩ଟି ଲେଖାଏଁ ଉଇକେଟ ନେଇଥିବା ବେଳେ ରବିଚନ୍ଦ୍ରନ ଅଶ୍ୱିନ ଗୋଟିଏ ଏବଂ ଅନରିଚ ନୋରତଜେ ଗୋଟିଏ ଉଇକେଟ ନେବାରେ ସଫଳ ହୋଇଥିଲେ।
