ଢାକା,୫।୮: ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ତାଙ୍କ ପଦରୁ ଇସ୍ତଫା ଦେଇଛନ୍ତି। ଟେଲିଭିଜନ ରିପୋର୍ଟ ଅନୁଯାୟୀ, ହିଂସାତ୍ମକ ବିରୋଧ ମଧ୍ୟରେ ଶେଖ ହସିନା ରାଜଧାନୀ ଢାକା ଛାଡି ଫିନଲ୍ୟାଣ୍ଡ ଯାଉଛନ୍ତି ବୋଲି କୁହାଯାଉଛି। ତାଙ୍କ ଦଳର ଆହୁରି ଅନେକ ବରିଷ୍ଠ ନେତା ମଧ୍ୟ ଦେଶ ଛାଡିବାର ଖବର ରହିଛି। ଅନ୍ୟପକ୍ଷରେ ବିକ୍ଷୋଭକାରୀମାନେ ପ୍ରଧାନମନ୍ତ୍ରୀଙ୍କ ବାସଭବନରେ ପହଞ୍ଚିଛନ୍ତି। ଗତ ଦୁଇ ମାସ ଧରି ବାଂଲାଦେଶରେ ସଂରକ୍ଷଣ ବିରୋଧରେ ହିଂସାତ୍ମକ ପ୍ରଦର୍ଶନ ଏବଂ ସଂଘର୍ଷ ଚାଲିଥିଲା। ଯେତେବେଳେ ଶେଖ ହସିନାଙ୍କ ନେତୃତ୍ୱାଧୀନ ସରକାର ବିକ୍ଷୋଭକାରୀଙ୍କ ସହ କଡ଼ା କାରବାର ଆରମ୍ଭ କରିଥିଲେ ସେତେବେଳେ ଏହି ମାମଲା ଆହୁରି ଖରାପ ହୋଇଯାଇଥିଲା। ବିକ୍ଷୋଭକାରୀମାନେ ଶେଖ ହସିନାଙ୍କ ଇସ୍ତଫା ଦାବିରେ ଅଟକି ରହି ଏକ ନାଗରିକ ଅମାନ୍ୟ ଆନ୍ଦୋଳନ ଆରମ୍ଭ କରିଥିଲେ।
୨୮ ସେପ୍ଟେମ୍ବର ୧୯୪୭ରେ ଜନ୍ମ ହୋଇଥିବା ଶେଖ ହସିନା ବାଂଲାଦେଶର ପ୍ରତିଷ୍ଠାତା ଶେଖ ମୁଜିବୁର ରହମାନଙ୍କ ବଡ ଝିଅ। ତାଙ୍କର ପ୍ରାରମ୍ଭିକ ଜୀବନ ପୂର୍ବ ବଙ୍ଗର ତୁଙ୍ଗିପାରାଠାରେ ଅତିବାହିତ ହୋଇଥିଲା। ଏଠାରେ ସେ ବିଦ୍ୟାଳୟ ଶିକ୍ଷା ସମାପ୍ତ କରିଥିଲେ। ଏହା ପରେ ସେ ସେଗୁନ ବାଗିଚାରେ ମଧ୍ୟ କିଛି ସମୟ ରହିଲେ। ତା’ପରେ ତାଙ୍କ ପୁରା ପରିବାର ବାଂଲାଦେଶର ରାଜଧାନୀ ଢାକାକୁ ଚାଲିଗଲେ।
୧୯୭୫ରେ ଶେଖ ହସିନାଙ୍କ ଜୀବନରେ ବିରାଟ ଝଡ଼ ଆସିଥିଲା । ବାଂଲାଦେଶ ସେନା ବିଦ୍ରୋହ କରି ତାଙ୍କ ପରିବାର ବିରୁଦ୍ଧରେ ବିଦ୍ରୋହ ଆରମ୍ଭ କଲା। ସଶସ୍ତ୍ର ଯୋଦ୍ଧାମାନେ ଶେଖ ହସିନାଙ୍କ ମା, ତାଙ୍କ ପିତା ଶେଖ ମୁଜିବୁର ରହମାନ ଏବଂ ତିନି ଭାଇଙ୍କୁ ହତ୍ୟା କରିଥିଲେ। ସେହି ସମୟରେ ଶେଖ ହସିନା ତାଙ୍କ ସ୍ବାମୀ ୱାଜିଦ ମିଆନ ଏବଂ ସାନ ଭଉଣୀଙ୍କ ସହ ୟୁରୋପରେ ଥିଲେ ଏବଂ ଭାଗ୍ୟ ବଳରେ ବଞ୍ଚି ଯାଇଥିଲେ। ତାଙ୍କ ମାତାପିତା ଏବଂ ତିନି ଭାଇଙ୍କ ହତ୍ୟା ପରେ ଶେଖ ହସିନା କିଛି ସମୟ ଜର୍ମାନୀରେ ରହୁଥିଲେ। ଏହା ପରେ ଇନ୍ଦିରା ଗାନ୍ଧୀ ସରକାର ତାଙ୍କୁ ଭାରତରେ ଆଶ୍ରୟ ଦେଇଥିଲେ। ସେ ତାଙ୍କ ଭଉଣୀଙ୍କ ସହିତ ଦିଲ୍ଲୀ ଆସି ପ୍ରାୟ ୬ବର୍ଷ ଏଠାରେ ରହିଲେ।
୧୯୮୧ରେ ହସିନା ବାଂଲାଦେଶ ଫେରି ଆସିଥିଲେ। ସେ ବିମାନବନ୍ଦରରେ ପହଞ୍ଚିବା ପରେ ଲକ୍ଷ ଲକ୍ଷ ଲୋକ ତାଙ୍କୁ ସ୍ବାଗତ କରିବାକୁ ଆସିଥିଲେ। ବାଂଲାଦେଶକୁ ଫେରିବା ପରେ ଶେଖ ହସିନା ତାଙ୍କ ପିତାଙ୍କ ଦଳକୁ ଆଗକୁ ନେବାକୁ ନିଷ୍ପତ୍ତି ନେଇଥିଲେ ଏବଂ ୧୯୮୬ରେ ପ୍ରଥମ ଥର ପାଇଁ ସାଧାରଣ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ଯଦିଓ ସେ ପରାଜୟର ସମ୍ମୁଖୀନ ହୋଇଥିଲେ ମଧ୍ୟ ସେ ବିରୋଧୀ ଦଳର ନେତା ଭାବରେ ନିର୍ବାଚିତ ହୋଇଥିଲେ। ୧୯୯୧ରେ, ପ୍ରଥମ ଥର ପାଇଁ ବାଂଲାଦେଶରେ ମୁକ୍ତ ନିର୍ବାଚନ ଅନୁଷ୍ଠିତ ହୋଇଥିଲା। ଏହି ନିର୍ବାଚନରେ ଶେଖ ହସିନାଙ୍କ ଦଳ ଆୱାମୀ ଲିଗ ସଂଖ୍ୟାଗରିଷ୍ଠତା ହାସଲ କରିପାରି ନଥିଲା। ତାଙ୍କ ବିରୋଧୀ ଖାଲେଦା ଜିଆଙ୍କ ଦଳ କ୍ଷମତାକୁ ଆସିଲା।
୧୯୯୬ମସିହାରେ ପୁନର୍ବାର ନିର୍ବାଚନ ଅନୁଷ୍ଠିତ ହୋଇଥିଲା । ଏଥର ଶେଖ ହସିନାଙ୍କ ଦଳ ବହୁମତ ସହ କ୍ଷମତାକୁ ଆସିଲେ ଏବଂ ଶେଖ ହସିନା ପ୍ରଧାନମନ୍ତ୍ରୀ ହୋଇଥିଲେ। ୨୦୦୧ ନିର୍ବାଚନରେ ତାଙ୍କୁ ପରାଜୟର ସାମ୍ନା କରିବାକୁ ପଡିଥିଲା। ଏହା ପରେ, ସେ ପୁନର୍ବାର୨୦୦୯ରେ କ୍ଷମତାକୁ ଫେରିଥିଲେ ଏବଂ ସେହି ଦିନଠାରୁ କ୍ରମାଗତ ଭାବରେ ପ୍ରଧାନମନ୍ତ୍ରୀ ହୋଇଥିଲେ।
ଶେଖ ହସିନା ଦୁଇଥର ମୃତ୍ୟୁକୁ ପରାସ୍ତ କରିଛନ୍ତି। ୧୯୭୫ରେ ପ୍ରଥମ ଥର ଏବଂ ୨୦୦୪ରେ ଦ୍ୱିତୀୟ ଥର । ୧୯୭୫ରେ ଯେତେବେଳେ ତାଙ୍କ ପରିବାରକୁ ହତ୍ୟା କରାଯାଇଥିଲା, ସେ ଦେଶ ବାହାରେ ଥିବାରୁ ସେ ବଞ୍ଚି ଯାଇଥିଲେ। ତା’ପରେ ୨୦୦୪ରେ ତାଙ୍କ ଉପରେ ଗ୍ରେନେଡ ଆକ୍ରମଣ ହୋଇଥିଲା ଯେଉଁଥିରେ ସେ ଗୁରୁତର ଆହତ ହୋଇଥିଲେ। ଏହି ଆକ୍ରମଣରେ ୨୪ ଜଣଙ୍କର ମୃତ୍ୟୁ ଘଟିଥିଲା।
