ବ୍ରହ୍ମପୁର,୧୨ା୮(ସୁବାସ ଚନ୍ଦ୍ର ପାଢ଼ୀ): ନିମଖଣ୍ଡି ଥାନା ଅନ୍ତର୍ଗତ ଶ୍ରୀମା ନଗର ଦ୍ୱିତୀୟ ଲାଇନ୍ରେ ଭଡ଼ା ଘରେ ରହୁଥିବା ଗାୟତ୍ରୀ ସ୍ବାଇଁ(୩୦)ଙ୍କୁ ରବିବାର ରାତିରେ ତଣ୍ଟିକାଟି ହତ୍ୟା କରାଯାଇଥିବା ବେଳେ ତାଙ୍କର ଏକମାତ୍ର ଝିଅ ନିଲମ(୧୦)ଙ୍କୁ ଖଣ୍ଡାରେ ଆକ୍ରମଣ କରାଯାଇଛି। ନିଲମ ଭୁବନେଶ୍ୱର ଏମ୍ସରେ ମୃତ୍ୟୁ ସହ ସଂଗ୍ରାମ କରୁଛନ୍ତି। ସେ ଏବେ କୋମାରେ ଅଛନ୍ତି। ସେପଟେ ଅଭିଯୁକ୍ତଙ୍କ ସମ୍ପର୍କରେ ପୋଲିସ ସୁରାକ ପାଇଛି। ସେ ବାହାର ରାଜ୍ୟକୁ ଚାଲିଯାଇଥିବା ଟ୍ରାକିଂରୁ ଜଣାପଡିଛି। ତାଙ୍କୁ ଧରିବା ପାଇଁ ୨ଟି ଟିମ ଗଠନ ହୋଇଛି। ଖୁବଶୀଘ୍ର ଅଭିଯୁକ୍ତ ଗିରଫ ହେବେ ବୋଲି ଥାନାଧିକାରୀ ସୂଚନା ଦେଇଛନ୍ତି।
ଘଟଣା ଘଟାଇବା ପରେ ଅଭିଯୁକ୍ତ ଜଣକ ଧରାପଡିଯିବା ଭୟରେ ଗାୟତ୍ରୀଙ୍କ ମୋବାଇଲ ଫୋନ୍ ଲୁଟି ନେଇଥିବା ଜଣାପଡିଛି। ସାଇଣ୍ଟିଫିକ ଟିମ ସହାୟତାରେ ପୋଲିସ ଛାନଭିନ କରୁଥିବା ବେଳେ ଉକ୍ତ ଘରକୁ ସିଲ କରିଛି। ପ୍ରାଥମିକ ତଦନ୍ତରୁ ଏହା ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ଅନୁମାନ କରାଯାଉଛି। ଯାହାକୁ ଅଭିଯୁକ୍ତ ବୋଲି ସନ୍ଦେହ କରାଯାଉଛି ସେ ବ୍ୟବହାର କରୁଥିବା ମୋବାଇଲ ମୃତ ମହିଳାଙ୍କ ନାମରେ ରହିଛି। ସେହିପରି ସେ ଯେଉଁଠାରେ ରହୁଥିଲେ ଅନ୍ୟତ୍ର ଚାକରି ହୋଇଗଲା ବୋଲି କହି ଦିନକ ପୂର୍ବରୁ ଉକ୍ତ ଘର ଛାଡ଼ି ଦେଇଥିଲେ।
ଏପରିକି ଲୋଚପଡ଼ାରେ କରିଥିବା ଦୋକାନଟି ଅନ୍ୟ ଜଣଙ୍କୁ ବିକ୍ରି କରିଦେଇଥିଲେ। ଅଭିଯୁକ୍ତ ରବିବାର ରାତିରେ ଗାୟତ୍ରୀଙ୍କୁ ଫୋନ କରି ତାଙ୍କ ଘରକୁ ଆସିଥିବା ଜଣାପଡିଛି। ଗାୟତ୍ରୀ ରବିବାର ରାତି ସାଢ଼େ ୯ ଟାରେ ଶେଷଥର ପାଇଁ ତାଙ୍କ ସ୍ବାମୀଙ୍କ ସହ କଥା ହୋଇଥିଲେ। ପରେ ତାଙ୍କର ମୋବାଇଲ ଫୋନ୍ ସୁଇଚ ଅଫ ରହିଥିଲା। ଗାୟତ୍ରୀଙ୍କୁ ଅଭିଯୁକ୍ତ ରୋଷେଇ ଘରେ ହତ୍ୟା କରିଥିବା ବେଳେ ବେଡ଼ରୁମରେ ଶୋଇଥିବା ଥିବା ନିଲମଙ୍କୁ ଖଣ୍ଡାରେ ଆକ୍ରମଣ କରିଥିଲେ।
ଅଭିଯୁକ୍ତ ବାଥରୁମ ଯାଇ ନିଜ ଦେହରେ ଲାଗିଥିବା ରକ୍ତ ସଫା କରିଥିଲେ। ରାତି ୧୨ ଟାରେ ସେ ଘରର ବାହାରପଟୁ ତାଲା ପକାଇ ବାହାରକୁ ବାହାରିଥିବା ଦୃଶ୍ୟ ଉକ୍ତ ସାହିରେ ଖଞ୍ଜାଯାଇଥିବା କ୍ୟାମେରାରୁ ପୋଲିସ ଦେଖିବାକୁ ପାଇଛି। ଅଭିଯୁକ୍ତ କୌଣସି ସୁରାକ୍ ଛାଡି ନ ଥିବାରୁ ତାଙ୍କୁ ଧରିବା ପୋଲିସ ପାଇଁ ବଡ ଚାଲେଞ୍ଜ ହୋଇପଡିଛି। ଗଠିତ ପୋଲିସ ଟିମ ତାଙ୍କୁ ଧରିବା ପାଇଁ ନୂଆ ରଣକୌଶଳ ଆପଣେଇଥିବା ଜଣାପଡିଛି।
