ନୂଆଦିଲ୍ଲୀ,୨୬।୧୨: ଚଳିତ ବର୍ଷ ଦେଶରେ ଅନୁଷ୍ଠିତ ଲୋକ ସଭା ନିର୍ବାଚନ ସମ୍ପର୍କରେ କେନ୍ଦ୍ରୀୟ ନିର୍ବାଚନ ଆୟୋଗ ଏକ ବିସ୍ତୃତ ତଥ୍ୟ ଉପସ୍ଥାପନ କରିଛନ୍ତି। ଏହି ତଥ୍ୟ ମାଧ୍ୟମରେ କୁହାଯାଇଛି ଯେ ୨ମାସ ମଧ୍ୟରେ ବିଶ୍ୱର ସର୍ବ ବୃହତ ଗଣତନ୍ତ୍ରରେ ନିର୍ବାଚନ କିପରି କରାଯାଇଥିଲା। ଏହି ପରିସଂଖ୍ୟାନରେ ଦେଶର ମୋଟ ଭୋଟରଙ୍କ ଠାରୁ ଭୋଟ ପ୍ରତିଶତ ଏବଂ ମୋଟ ମତଦାନ କେନ୍ଦ୍ରରୁ ନାମାଙ୍କନ ପର୍ଯ୍ୟନ୍ତ ସମ୍ପୂର୍ଣ୍ଣ ସୂଚନା ଶେୟାର କରାଯାଇଛି।
କେନ୍ଦ୍ରୀୟ ନିର୍ବାଚନ ଆୟୋଗ ଦ୍ୱାରା ପ୍ରକାଶିତ ସୂଚନା ଅନୁଯାୟୀ, ୨୦୨୪ ଲୋକ ସଭା ନିର୍ବାଚନରେ ମୋଟ ୯୭ କୋଟି, ୯୭ ଲକ୍ଷ ୫୧ ହଜାର ୮୪୭ ପଞ୍ଜିକୃତ ଭୋଟର ଥିଲେ। ୨୦୧୯ ରେ ୯୧କୋଟି, ୧୯ଲକ୍ଷ ୫୦ ହଜାର ୭୩୪ ଭୋଟର ଥିଲେ। ଏହାର ଅର୍ଥ ହେଉଛି ୨୦୧୯ତୁଳନାରେ ୨୦୨୪ରେ ୭.୪୩ ପ୍ରତିଶତ ଭୋଟରଙ୍କ ସଂଖ୍ୟା ବୃଦ୍ଧି ପାଇଛି। ୨୦୨୪ ମସିହାରେ ୬୪.୬୪ କୋଟି ଭୋଟର ଭୋଟ ଦେଇଥିବାବେଳେ ୨୦୧୯ରେ ୬୧.୪ କୋଟି ଭୋଟ ଦିଆଯାଇଥିଲା।
ନିର୍ବାଚନ ଆୟୋଗଙ୍କ ଅନୁଯାୟୀ ଆସାମର ଧୁବ୍ରିରେ ସର୍ବାଧିକ ମତଦାନ ୯୨.୩ ପ୍ରତିଶତ ରହିଛି। ସର୍ବନିମ୍ନ ମତଦାନ ଶ୍ରୀନଗରରେ (ଜମ୍ମୁ କଶ୍ମୀର) ୩୮.୭ପ୍ରତିଶତ ଥିବାବେଳେ ୨୦୧୯ରେ ଏହି ଆସନରେ ୧୪.୪ ପ୍ରତିଶତ ମତଦାନ ହୋଇଥିଲା। ୨୦୨୪ମସିହାରେ, ନୋଟା ୬୩ ଲକ୍ଷ ୭୧ହଜାର ୮୩୯ (୦.୯୯%) ଭୋଟ ପାଇଥିଲାବେଳେ ୨୦୧୯ରେ, ନୋଟା ପାଇଁ ୧.୦୬ ପ୍ରତିଶତ ଭୋଟ ଦିଆଯାଇଥିଲା। ଏଥର ଟ୍ରାନ୍ସଜେଣ୍ଡର ଭୋଟରଙ୍କ ଭୋଟ ପ୍ରତିଶତ ୨୭.୦୯ପ୍ରତିଶତ ଥିଲା।
୨୦୨୪ ମସିହାରେ,୬୫.୭୮ ପ୍ରତିଶତ ମହିଳା ଭୋଟର (ସୁରଟ ବ୍ୟତୀତ) ଭୋଟ ଦେଇଥିବାବେଳେ ୬୫.୫୫ପ୍ରତିଶତ ପୁରୁଷ ଭୋଟର ମତ ଦେଇଛନ୍ତି।
୨୦୧୯ ପରି, ୨୦୨୪ରେ ମଧ୍ୟ ମହିଳା ଭୋଟରଙ୍କ ସଂଖ୍ୟା ପୁରୁଷଙ୍କ ଅପେକ୍ଷା ଅଧିକ ଥିଲା। ଦେଶର ସାଧାରଣ ନିର୍ବାଚନ ଇତିହାସରେ ଏହା ଦ୍ୱିତୀୟ ଥର ଯେତେବେଳେ ମହିଳା ଭୋଟରଙ୍କ ସଂଖ୍ୟା ପୁରୁଷ ଭୋଟରଙ୍କ ଅପେକ୍ଷା ଅଧିକ ଥିଲା।
