ଭୁବନେଶ୍ୱର,୬।୫(ଅନୁରାଧା ମହାରଣା): ଦେଶରେ ଶିଳ୍ପକୁ ପ୍ରୋତ୍ସାହିତ କରିବା ପାଇଁ ଲୋକମାନେ ଚାକିରି ଖୋଜିବା ପରିବର୍ତ୍ତେ କିପରି ନିଯୁକ୍ତି ପ୍ରଦାନ କରିପାରିବେ ସେ ଦିଗ ପ୍ରତି ଗୁରୁତ୍ୱ ଦିଆଯାଉଛି । ଏହି କ୍ରମରେ ଦେଶରେ ଘରୋଇ କମ୍ପାନୀ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି। ଦେଶରେ ପ୍ରତିଦିନ ୫୦୦ରୁ ଅଧିକ କମ୍ପାନୀ ଖୋଲୁଛି। ୨୦୨୩-୨୪ ଆର୍ଥିକ ବର୍ଷ ଶେଷ ସୁଦ୍ଧା ଦେଶରେ ମୋଟ ୨୬ ଲକ୍ଷରୁ ଅଧିକ କମ୍ପାନୀ ଖୋଲାଯାଇଛି।
ସରକାରୀ ତଥ୍ୟ ଅନୁଯାୟୀ, ୨୦୨୪ ମାର୍ଚ୍ଚ ଶେଷ ସୁଦ୍ଧା ଦେଶରେ ୨୬,୬୩,୦୧୬ କମ୍ପାନୀ ଖୋଲିଛି। ସେଥିମଧ୍ୟରୁ ୧୬,୯୧,୪୯୫ କମ୍ପାନୀ (୬୪ ପ୍ରତିଶତ) ମଧ୍ୟ ସକ୍ରିୟ ଅଛନ୍ତି। ଗତ ଆର୍ଥିକ ବର୍ଷରେ ଦେଶରେ ୧.୮୫ ଲକ୍ଷରୁ ଅଧିକ କମ୍ପାନୀ ପଞ୍ଜୀକୃତ ହୋଇଥିଲେ। କେବଳ ଚଳିତ ବର୍ଷ ମାର୍ଚ୍ଚରେ ପ୍ରାୟ ୧୬,୬୦୦ କମ୍ପାନୀ ପଞ୍ଜୀକୃତ ହୋଇଛନ୍ତି। ତଥ୍ୟ ଅନୁଯାୟୀ, ୨୦୨୨-୨୩ ଆର୍ଥିକ ବର୍ଷରେ ୧,୫୯,୫୨୪ କମ୍ପାନୀ ପଞ୍ଜୀକୃତ ହୋଇଥିଲେ। ସେମାନଙ୍କର ପେଡ ଅପ ପୁଞ୍ଜି ଥିଲା ୧୮,୧୩୨.୧୬ କୋଟି। କର୍ପୋରେଟ ମନ୍ତ୍ରଣାଳୟର ସୂଚନାନୁସାରେ, ଗତ ଆର୍ଥିକ ବର୍ଷ ଶେଷ ସୁଦ୍ଧା ଦେଶରେ ଅତି କମରେ ୯,୩୧,୬୪୪ କମ୍ପାନୀ ବନ୍ଦ ହୋଇଯାଇଥିଲା।
ଏହା ବ୍ୟତୀତ ୨,୪୭୦ କମ୍ପାନୀ ନିଷ୍କ୍ରିୟ ଥିଲେ ଏବଂ ୧୦,୩୮୫ କମ୍ପାନୀ ଦେବାଳିଆ ହେବା ସ୍ଥିତିରେ ଅଛନ୍ତି। ଅନ୍ୟପଟେ ୨୭,୦୨୨ କମ୍ପାନୀକୁ ସରକାରୀ ରେକର୍ଡରୁ ହଟାଇବା ପ୍ରକ୍ରିୟା ଚାଲିଥିଲା। ୨୦୨୩-୨୪ ଆର୍ଥିକ ବର୍ଷରେ ପଞ୍ଜୀକୃତ ହୋଇଥିବା ୧,୮୫,୩୧୨ କମ୍ପାନୀର ମୋଟ ପୁଞ୍ଜି ୩୦,୯୨୭.୪୦ କୋଟି ଟଙ୍କା ଥିଲା। ସେଥିମଧ୍ୟରୁ ୭୧ ପ୍ରତିଶତ ସେବା କ୍ଷେତ୍ରରେ, ୨୩ ପ୍ରତିଶତ ଶିଳ୍ପ ବିଭାଗରେ ଏବଂ ୬ ପ୍ରତିଶତ କୃଷି କ୍ଷେତ୍ରରେ ଆରମ୍ଭ ହୋଇଛି। ତେବେ ମହାରାଷ୍ଟ୍ରରେ ସର୍ବାଧିକ ୧୭.୬ ପ୍ରତିଶତ ନୂତନ କମ୍ପାନୀ ପଞ୍ଜିକୃତ ହୋଇଛନ୍ତି। ମାର୍ଚ୍ଚ ୩୧, ୨୦୨୪ ପର୍ଯ୍ୟନ୍ତ, ୫,୧୬୪ ବିଦେଶୀ କମ୍ପାନୀ ମଧ୍ୟ ଦେଶରେ ପଞ୍ଜୀକୃତ ହୋଇଥିଲେ। ସେଥିମଧ୍ୟରୁ ୩,୨୮୮ କମ୍ପାନୀ (୬୪ ପ୍ରତିଶତ) ସକ୍ରିୟ ଥିଲେ। ୨୦୨୪ ମାର୍ଚ୍ଚରେ ଭାରତରେ ୬୭ ପ୍ରତିଶତ ନିର୍ଦ୍ଦେଶକ ପୁରୁଷ ଏବଂ ୩୩ ପ୍ରତିଶତ ମହିଳା ଥିଲେ। ନୂତନ ନିର୍ଦ୍ଦେଶକଙ୍କ ମଧ୍ୟରୁ ୪୩ ପ୍ରତିଶତଙ୍କ ବୟସ ୩୧ ରୁ ୪୫ ବର୍ଷ ଅଟେ।
