ବାରିପଦା,୧୨।୫(ନୀଳାଦ୍ରି ବିହାରୀ ଦଣ୍ଡପାଟ): ମୟୂରଭଞ୍ଜ ଜିଲା ବାଙ୍ଗରିପୋଷି ବିଧାନସଭା ନିର୍ବାଚନ ମଣ୍ଡଳୀ ଶାମାଖୁଣ୍ଟା ବ୍ଳକ ରଙ୍ଗମାଟିଆ ଛକରୁ ଏକ ବୋଲେରୋ ଗାଡିରୁ ବିପୁଳ ପରିମାଣର ଟଙ୍କା ଜବତ କରାଯାଇଛି । ୪ ନମ୍ବର ଫ୍ଲାଇଂ ସ୍କ୍ବାଡ୍ ଅଧିକାରୀମାନେ ଯାଞ୍ଚ କରିବା ସମୟରେ ଏକ ବ୍ୟାଗରୁ ୨ଲକ୍ଷ ୬୪ହଜାର ୫ଶହ ଟଙ୍କା ଜବତ କରିଛନ୍ତି । ଜବତ ଟଙ୍କା ସମ୍ପର୍କରେ ସନ୍ତୋଷ ଜନକ ପ୍ରମାଣ ମିଳି ନ ଥିବାରୁ ଉକ୍ତ ଟଙ୍କାକୁ ଜିଲା ଟ୍ରେଜେରି କାର୍ଯ୍ୟାଳୟରେ ରଖାଯାଇଛି।
ସୂଚନାଯୋଗ୍ୟ, ଜିଲାରେ ଅବାଧ, ଶାନ୍ତିପୂର୍ଣ୍ଣ ନିର୍ବାଚନ ପାଇଁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ଭୋଟରଙ୍କୁ ଅର୍ଥ ଦେଇ ପ୍ରଭାବିତ କରିବାକୁ ଅପଚେଷ୍ଟା ଏବଂ ଦୁର୍ନୀତି ରୋକିବା ପାଇଁ ପ୍ରଶାସନ ପକ୍ଷରୁ କଡା ସୁରକ୍ଷା ଗ୍ରହଣ କରାଯାଇଛି । ଏହି ପରିପ୍ରେକ୍ଷୀରେ ଏକ ବିଶ୍ୱସ୍ତ ସୂତ୍ରରୁ ସୂଚନା ପାଇ ଜିଲା ଏସ୍ପିଙ୍କ ନିର୍ଦ୍ଦେଶ କ୍ରମେ ସୋମବାର ଫ୍ଲାଇଂ ସ୍କ୍ବାଡ୍ ଅଧିକାରୀମାନେ ମାଜିଷ୍ଟ୍ରେଟଙ୍କ ଉପସ୍ଥିତିରେ ରଙ୍ଗମାଟିଆରେ ଯାନବାହାନ ଯାଞ୍ଚ କରୁଥିଲେ । ସେତିକିବେଳେ ଏକ ବୋଲେରୋ(ନଂ.ଓଡି୧୧ଏସ୍-୯୫୬୫)ଗାଡିକୁ ଯାଞ୍ଚ କରାଯାଇଥିଲା। ଯାଞ୍ଚ ବେଳେ ଅଧିକାରୀମାନେ ବାରିପଦା ସଦର ଥାନା ଅଧୀନ ସିନ୍ଦୂୂରଗୌରା ଗ୍ରାମର ରଜନୀକାନ୍ତ ମହାନ୍ତ(୩୮)ଙ୍କ ଏକ ବ୍ୟାଗରୁ ୨ଲକ୍ଷ ୬୪ହଜାର ୫ଶହରୁ ଅଧିକ ଟଙ୍କା ମିଳିଥିଲା।
ଜବତ ଟଙ୍କା ସମ୍ପର୍କରେ ରଜନୀକାନ୍ତ ସନ୍ତୋଷ ଜନକ ଉତ୍ତର ଦେଇପାରି ନ ଥିଲେ। ଫଳରେ ଜବତ ଟଙ୍କାକୁ ବାରିପଦା ସରକାରୀ ଟ୍ରେଜେରିରେ ରଖାଯାଇଛି । ଉକ୍ତ ଘଟଣାକୁ ନେଇ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବାରିପଦା ସଦର ଥାନା ଆଇଆଇସିଙ୍କୁ ନିର୍ଦ୍ଦେଶ ଦିଆଯାଇଛି।
ଚଢ଼ାଉରେ ମାଜିଷ୍ଟ୍ରେଟ ସୁକାନ୍ତ କୁମାର ସୱାଇଁ, ତନ୍ମୟ କୁମାର ମାହାନା, ଏସ୍ ବେହେରା, ପି.ନାଏକ, ଓପିକେ ମହାକୁଡ ପ୍ରମୁଖ ସାମିଲ ଥିଲେ। ତେବେ ଘଟଣାରେ ସମ୍ପୃକ୍ତ ଯୁବକ ଜଣକ ଏକ ପ୍ରମୁଖ ରାଜନୈତିକ ଦଳର ଯୁବନେତା ବୋଲି ଜଣାପଡିଛି। ନାମାଙ୍କନ ରାଲିରେ ଖର୍ଚ୍ଚ ହେବାପାଇଁ ଏହି ଟଙ୍କା ଯାଉଥିଲା ବୋଲି ଚର୍ଚ୍ଚା ହେଉଛି। ତଦନ୍ତ ପରେ ଏହାର ସତ୍ୟାସତ୍ୟ ସାମ୍ନାକୁ ଆସିବ ବୋଲି ଜଣାପଡିଛି।
