ନୂଆଦିଲ୍ଲୀ,୨୧।୫: ହରିୟାଣାର ହିସାରରେ ରହୁଥିବା ଯୁଟ୍ୟୁବର ଜ୍ୟୋତି ମାଲହୋତ୍ରାଙ୍କୁ ପାକିସ୍ତାନ ପାଇଁ ଗୁଇନ୍ଦାଗିରି ଅଭିଯୋଗରେ ଗିରଫ କରାଯାଇଛି। ତାଙ୍କର ହ୍ବାଟସଆପ ଚାଟରୁ ଜଣାପଡିଛି ଯେ, ସେ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇ (ISI) ଅଧିକାରୀ ଅଲି ହସନଙ୍କ ସହ ଯୋଗାଯୋଗରେ ଥିଲେ ଏବଂ ତାଙ୍କୁ କହିଥିଲେ, “ମୋତେ ପାକିସ୍ତାନରେ ବାହା ହୁଅ।” ଏହି ଚାଟରୁ ଜ୍ୟୋତିଙ୍କ ସମ୍ପର୍କରେ ଆହୁରି ସାଂଘାତିକ ଜିନିେ ଖୁଲାସା ହୋଇଛି।
ଜ୍ୟୋତି ମଲହୋତ୍ରାଙ୍କୁ ମେ ୧୬ରେ ହିସାରରୁ ଗିରଫ କରାଯାଇଥିଲା। ତାଙ୍କ ବିରୋଧରେ ଅଫିସିଆଲ ସିକ୍ରେଟ୍ସ ଆକ୍ଟ, ୧୯୨୩ର ଧାରା ୩, ୪ ଓ ୫ ଏବଂ ଭାରତୀୟ ନ୍ୟାୟ ସଂହିତା (BNS)ର ଧାରା ୧୫୨ ଅନୁଯାୟୀ ମାମଲା ରୁଜୁ ହୋଇଛି। ପୋଲିସ କହିଛି ଯେ, ଜ୍ୟୋତି ପାକିସ୍ତାନୀ ଗୁଇନ୍ଦା ଅଧିକାରୀମାନଙ୍କ ସହ ନିୟମିତ ଯୋଗାଯୋଗ ରଖୁଥିଲେ ଏବଂ ସମ୍ବେଦନଶୀଳ ସୂଚନା ଆଦାନପ୍ରଦାନ କରୁଥିଲେ। ତାଙ୍କ ମୋବାଇଲ ଓ ଲାପଟପରୁ ମିଳିଥିବା ସୂଚନାରୁ ଏହା ସ୍ପଷ୍ଟ ହୋଇଛି।
ଅଲି ହସନଙ୍କ ସହ ଜ୍ୟୋତିଙ୍କ ହ୍ବାଟସଆପ ଚାଟରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଛି। ଅଲି ଜ୍ୟୋତିଙ୍କୁ ଅଟାରୀ ସୀମାରେ କାହାକୁ ପ୍ରୋଟୋକଲ ମିଳିଥିଲା ବୋଲି ପଚାରିଥିଲେ, ଯାହା ଭାରତୀୟ ଗୁଇନ୍ଦା ଏଜେଣ୍ଟମାନଙ୍କୁ ଚିହ୍ନିବା ପାଇଁ ଏକ ପ୍ରୟାସ ଥାଇପାରେ। ଜ୍ୟୋତି ଉତ୍ତରରେ କହିଥିଲେ, “ମୁଁ ପାଇ ନାହିଁ। ସେମାନେ ଏତେ ବୋକା ନୁହଁନ୍ତି।” ଏହି ଚାଟରୁ ସନ୍ଦେହ ବିଛି ଯେ ଆଇଏସଆଇ ଜ୍ୟୋତିଙ୍କୁ ଭାରତୀୟ ଏଜେଣ୍ଟମାନଙ୍କ ସୂଚନା ସଂଗ୍ରହ କରିବା ପାଇଁ ନିର୍ଦ୍ଦେଶ ଦେଉଥିଲା।
ଜ୍ୟୋତି ମାଲହୋତ୍ରା ୨୦୨୦ରୁ ୨୦୨୪ ମଧ୍ୟରେ ଅନେକବାର ପାକିସ୍ତାନ ଗସ୍ତ କରିଥିଲେ। ତାଙ୍କ ଯୁଟ୍ୟୁବ ଚ୍ୟାନେଲ ‘ଟ୍ରାଭେଲ ଉଇଥ ଜୋ’ରେ ସେ ପାକିସ୍ତାନରେ ଥିବା ସମ୍ବେଦନଶୀଳ ଅଞ୍ଚଳ ଓ ରାଜପଥ ନମ୍ବର ୪୪ ଭଳି ରାସ୍ତାର ଭିଡିଓ ସେୟାର କରୁଥିଲେ।
ଜାତୀୟ ଅନୁସନ୍ଧାନ ସଂସ୍ଥା (NIA) ଓ ଗୁଇନ୍ଦା ବ୍ୟୁରୋ (IB) ଜ୍ୟୋତିଙ୍କ ଆର୍ଥିକ ନେଣଦେଣ ଓ ଯାତ୍ରା ଇତିହାସ ତଦନ୍ତ କରୁଛନ୍ତି। ତାଙ୍କ ମୋବାଇଲ ଓ ଲାପଟପର ଫୋରେନସିକ ବିଶ୍ଳେଷଣ ଚାଲିଛି। ଜ୍ୟୋତିଙ୍କ ସହ ୧୧ ଜଣଙ୍କୁ ପଞ୍ଜାବ, ହରିୟାଣା ଓ ଉତ୍ତରପ୍ରଦେଶରୁ ଗିରଫ କରାଯାଇଛି, ଯେଉଁମାନେ ପାକିସ୍ତାନ ସହ ଜଡିତ ଏକ ଗୁଇନ୍ଦା ନେଟୱାର୍କର ଅଂଶ ଥିଲେ ବୋଲି ଅଭିଯୋଗ ହୋଇଛି।
ଜ୍ୟୋତିଙ୍କ ପିତା ହରିଶ ମଲହୋତ୍ରା ପ୍ରଥମେ କହିଥିଲେ ଯେ, ତାଙ୍କ ଝିଅ ଅନୁମତି ନେଇ ପାକିସ୍ତାନ ଯାଇଥିଲେ। କିନ୍ତୁ ପରେ ସେ କହିଛନ୍ତି ଯେ, ଜ୍ୟୋତି ତାଙ୍କୁ କେବଳ ଦିଲ୍ଲୀ ଯାଉଥିବା କହୁଥିଲେ ଏବଂ ପାକିସ୍ତାନ ଯିବା ବିଷୟରେ କିଛି ଜଣାଇ ନ ଥିଲେ।
ଜ୍ୟୋତିଙ୍କ ଗିରଫ ଏପ୍ରିଲ ୨୨ରେ ହୋଇଥିବା ପାହାଲଗାମ ଆତଙ୍କବାଦୀ ଆକ୍ରମଣ ଓ ତା’ପରେ ଭାରତର ‘ଅପରେସନ ସିନ୍ଦୁର’ ପରେ ହୋଇଛି। ଅନୁସନ୍ଧାନରୁ ଜଣାପଡିଛି ଯେ, ଜ୍ୟୋତି ଏହି ଅପରେଶନ ସମୟରେ ପାକିସ୍ତାନୀ ଅଧିକାରୀମାନଙ୍କ ସହ ଯୋଗାଯୋଗରେ ଥିଲେ ଏବଂ ସମ୍ବେଦନଶୀଳ ସୂଚନା ଆଦାନପ୍ରଦାନ କରିଥିଲେ।
ଏକ୍ସ ପ୍ଲାଟଫର୍ମରେ ଜ୍ୟୋତିଙ୍କ ଗିରଫ ଓ ତାଙ୍କ ହ୍ବାଟସଆପ ଚାଟକୁ ନେଇ ବ୍ୟାପକ ଚର୍ଚ୍ଚା ହେଉଛି। ଅନେକ ପୋଷ୍ଟରେ ତାଙ୍କୁ ପାକିସ୍ତାନ ଗୁଇନ୍ଦା ଭାବେ ଅଭିହିତ କରାଯାଇଛି ଏବଂ ତାଙ୍କ ଆଇଏସଆଇ ସହ ସମ୍ପର୍କକୁ ନେଇ ନିନ୍ଦା କରାଯାଉଛି। ଏହି ମାମଲା ଜାତୀୟ ସୁରକ୍ଷା ପାଇଁ ଏକ ଗୁରୁତର ଚିନ୍ତାର ବିଷୟ ହୋଇଛି। ଅନୁସନ୍ଧାନ ଜାରି ରହିଛି ଏବଂ ଆଗାମୀ ଦିନରେ ଅଧିକ ତଥ୍ୟ ସାମ୍ନାକୁ ଆସିପାରେ।
