ନୂଆଦିଲ୍ଲୀ,୧୭।୭:କରୋନା ମହାମାରୀ ପାଇଁ ସାରା ବିଶ୍ୱ ବର୍ତ୍ତମାନ ଆର୍ଥତ୍କ ସଙ୍କଟ ସ୍ଥିତି ଦେଇ ଗତିକରୁଛି। ଏହି ସମୟରେ ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ)ଗୁଡ଼ିକର ସ୍ଥିତି ବେହାଲ ହୋଇଛି। ସରକାର ଏହି ଶିଳ୍ପକୁ ସହାୟତା କରିବା ଲାଗି ପଦକ୍ଷେପ ନେଇଛନ୍ତି। ହେଲେ ଅଧିକ ପଦକ୍ଷେପ ନେବାର ଆବଶ୍ୟକତା ରହିଛି। ଏହା ହୋଇ ନ ପାରିଲେ ଅଧିକ ସଂଖ୍ୟକ ଏମ୍ଏସ୍ଏମ୍ଇ ଚଳିତ ବର୍ଷ ଦେବାଳିଆ ସ୍ଥିତିକୁ ଚାଲିଯିବେ। ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍ଏଫ୍) ଏ ନେଇ ଆଶଙ୍କା ବ୍ୟକ୍ତ କରିବା ସତର୍କ କରାଇଛି। ଏମ୍ଏସ୍ଏମ୍ଇଗୁଡିକ କ୍ଷେତ୍ରରେ ଦେବାଳିଆ ହାର ୩ ଗୁଣା ବଢ଼ିବା ନେଇ ଆଶଙ୍କା ବ୍ୟକ୍ତ କରାଯାଇଛି। ଏହା ହେଲେ ଆର୍ଥତ୍କ ସ୍ଥିତାବସ୍ଥା ଏବଂ ବିତ୍ତୀୟ ଅସ୍ଥିରତାର ସମୟ ବଢ଼ିଯିବ ବୋଲି ଆଇଏମ୍ଏଫ୍ ଏହାର ରିପୋର୍ଟରେ ଉଲ୍ଲେଖ କରିଛି।
୧୭ ଦେଶର ସ୍ଥିତିକୁ ତର୍ଜମା କରିବା ପରେ ଆଇଏମ୍ଏଫ୍ ପକ୍ଷରୁ ଏଭଳି ରିପୋର୍ଟ ପ୍ରକାଶ ପାଇଛି। କ୍ଷୁଦ୍ର ସଂସ୍ଥାଗୁଡିକର ଦେବାଳିଆ ହେବାର ହାର ୧୨% ଛୁଇଁବା ନେଇ ରିପୋର୍ଟରେ କୁହାଯାଇଛି। କୋଭିଡ୍-୧୯ ପୂର୍ବରୁ ଏହି ହାର ୪% ରହିବା ନେଇ ପୂର୍ବାନୁମାନ କରାଯାଇଥିଲା। ବଜାର ପ୍ରଭାବିତ ହେବାରୁ ଉତ୍ପାଦନ ଏବଂ ଚାହିଦା ବର୍ତ୍ତମାନ କ୍ଷତିଗ୍ରସ୍ତ ହୋଇ ରହିଛି। ଏହି ସମସ୍ୟାରୁ ବାହାରକୁ ଆସିବା ଲାଗି କମ୍ପାନୀଗୁଡିକ ଉଦ୍ୟମ ଜାରି ରଖିଛନ୍ତି। ଜି-୨୦ ଦେଶ ସମୂହ ଟିକସ, ଗ୍ରାଣ୍ଟ, ସୁଧହାର ଏବଂ ସବ୍ସିଡି ଭଳି ପଦକ୍ଷେପ ଦ୍ୱାରା କ୍ଷୁଦ୍ର ସଂସ୍ଥାଗୁଡିକ ଲାଭବାନ୍ ହୋଇପାରିବେ। କୋଭିଡ୍ ଯୋଗୁ ସେବା କ୍ଷେତ୍ର ଅଧିକ କ୍ଷତି ସହିଛି। ଏହି କ୍ଷେତ୍ରରେ କ୍ଷୁଦ୍ର ସଂସ୍ଥା ଦେବାଳିଆ ହେବା ମାମଲା ୨୦% ବଢ଼ିପାରେ। ଓ୍ବାଶିଂଟନ ଫଣ୍ଡର ଏକ ରିପୋର୍ଟ ମୁତାବକ କାନାଡା ଏବଂ ଆମେରିକାରେ ଏକତୃତୀୟାଂଶ କ୍ଷୁଦ୍ରସଂସ୍ଥା ବନ୍ଦହେବା ଆଶଙ୍କା ଉପୁଜିଛି।
