ଅହମଦାବାଦ,୧୮।୪ : ଗୁଜରାଟ ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଓରେଭା ଗ୍ରୁପ ମୋରବି ଝୁଲାପୋଲ ଦୁର୍ଘଟଣାର ମଧ୍ୟବର୍ତ୍ତୀକାଳୀନ କ୍ଷତିପୂରଣ ରାଶି ଜମା କରିଛି। ଓରେଭା ମଙ୍ଗଳବାର କାର୍ଯ୍ୟକାରୀ ମୁଖ୍ୟ ବିଚାରପତି ଏ.ଜେ ଦେଶାଇ ଏବଂ ଜଷ୍ଟିସ ବିରେନ ବୈଷ୍ଣବଙ୍କ ଏକ ବେଞ୍ଚକୁ ଏ ସମ୍ପର୍କରେ ସୂଚନା ଦେଇଛି । ଏହି ଦୁର୍ଘଟଣାରେ ପୀଡିତଙ୍କ ପାଇଁ କ୍ଷତିପୂରଣ ରାଶି ରାଜ୍ୟ ଆଇନ ସେବା ପ୍ରାଧିକରଣରେ ୧୪.୬୨ କୋଟି ଟଙ୍କା ଜମା କରାଯାଇଥିବା କମ୍ପାନୀ କହିଛି॥
ପୀଡିତଙ୍କ ସଠିକ ଯାଞ୍ଚ ପରେ ଅଧିକାରୀଙ୍କ ମାଧ୍ୟମରେ ମଧ୍ୟବର୍ତ୍ତୀକାଳୀନ କ୍ଷତିପୂରଣ ପ୍ରଦାନ ନିଶ୍ଚିତ କରିବାକୁ ଗୁଜରାଟ ରାଜ୍ୟ ଆଇନ ସେବା ପ୍ରାଧିକରଣର ସଦସ୍ୟମାନଙ୍କୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ଘଟଣାରେ ୧୩୫ ଜଣ ମୃତକଙ୍କ ସମ୍ପର୍କୀୟଙ୍କୁ ମଧ୍ୟବର୍ତ୍ତୀକାଳୀନ କ୍ଷତିପୂରଣ ବାବଦରେ ୧୦ ଲକ୍ଷ ଟଙ୍କା ଲେଖାଏଁ ପ୍ରଦାନ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।
କ୍ଷତିପୂରଣ ରାଶି ଜମା କରିବା ସହିତ କମ୍ପାନୀ ସାତ ଅନାଥ ପିଲାଙ୍କ ଶିକ୍ଷା, ଚିକିତ୍ସା ଏବଂ ଜୀବନଯାପନର ବ୍ୟବସ୍ଥା ନିଶ୍ଚିତ କରିବାକୁ କମ୍ପାନୀ କହିଛି। ଏହି ଦୁର୍ଘଟଣାରେ ଆହତ ହୋଇଥିବା ୫୬ ଜଣଙ୍କୁ ୨ ଲକ୍ଷ ଟଙ୍କା ଲେଖାଏଁ ଦିଆଯିବ।
