ମୋରଡ଼ା,୨୮ା୨(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ଥାନା ପୋଲିସର କାର୍ଯ୍ୟ କରିବାର ଦକ୍ଷତାକୁ ନେଇ ଆଜି କ୍ଷୋଭ ପ୍ରକାଶ କରିଛନ୍ତି ମୋରଡ଼ା ଅଞ୍ଚଳର ଗଣମାଧ୍ୟମ ପ୍ରତିନିଧି। ସୂଚନା ଅନୁଯାୟୀ, ପିଲାଚୋରି ଗୁଜବକୁ ନେଇ ଉଦ୍ବେଗ ଜନକ ପରିସ୍ଥିତି ସୃଷ୍ଟି କରିଥିବା ବେଳେ ଏହି ଗୁଜବ ପାଇଁ ମୋରଡ଼ା ଥାନା ଅଞ୍ଚଳରେ ଜଣେ ଅଚିହ୍ନା ଯୁବକଙ୍କ ମୃତ୍ୟୁ ଘଟିଛି । ଏଭଳି ପରିସ୍ଥିତିରେ ଗାଁକୁ ଯିବା ପାଇଁ ଭୟ କରୁଛନ୍ତି ଲୋକମାନେ। ଏହାର ମୁକାବିଲା ପାଇଁ ମୟୂରଭଞ୍ଜ ଏସପିଙ୍କ ନିର୍ଦ୍ଦେଶକ୍ରମେ ବିଭିନ୍ନ ଥାନା ଅଞ୍ଚଳରେ ପୋଲିସ ପକ୍ଷରୁ ସଚେତନତା କାର୍ଯ୍ୟକ୍ରମ ଆରମ୍ଭ କରାଯାଇଛି । ଏହି ସଚେତନତା ବାର୍ତ୍ତାର ବହୁଳ ପ୍ରଚାର ପ୍ରସାର କରାଯାଇ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରି ପିଲା ଚୋରି ଗୁଜବରୁ ନିଜକୁ ଦୂରେଇ ରଖିବା ପାଇଁ ମୋରଡ଼ା ପୋଲିସ ପକ୍ଷରୁ ପଞ୍ଚାୟତ କାର୍ଯ୍ୟାଳୟରେ ଗତ ଫେବୃଆରୀ ୨୬ ପୂର୍ବାହ୍ନରେ ଏକ ସଚେତନତା ସଭା ଅନୁଷ୍ଠିତ ହୋଇଥିଲା। ଏହି ସଭାରେ ଜନପ୍ରତିନିଧି ଏବଂ ସମାଜସେବୀଙ୍କୁ ଖବର ଦେଇ ଡକା ଯାଇଥିବାବେଳେ ଗଣମାଧ୍ୟମକୁ ଉପେକ୍ଷା କରାଯାଇଥିଲା। ଫଳରେ ଏହି ମହତ୍ତ୍ୱାକାଂକ୍ଷୀ କାର୍ଯ୍ୟକ୍ରମର ବହୁଳ ପ୍ରଚାର ପ୍ରସାର ସମ୍ଭବ ହୋଇ ନ ଥିବା ଅଭିଯୋଗ ହୋଇଛି।
ପ୍ରକାଶ ଯୋଗ୍ୟ, ସ୍ଥାନୀୟ ଅଧିକାରୀଙ୍କ ସମ୍ପର୍କରେ ରହିଥିବା ପ୍ରତିନିଧିଙ୍କୁ କାର୍ଯ୍ୟକ୍ରମର ଗୋଟିଏ ଦିନ ପୂର୍ବରୁ ସୂଚନା ଦିଆଯାଇଥିଲା। ମାତ୍ର ଏଠାରେ ଥିବା ପୋଲିସ ଓ ପ୍ରେସ୍ ହ୍ବାଟ୍ସଆପ୍ ଗ୍ରୁପରେ ଉକ୍ତ କାର୍ଯ୍ୟକ୍ରମ ବାବଦରେ ମାତ୍ର କେଇ ମିନିଟ ପୂର୍ବରୁ ଔପଚାରିକତା ଦୃଷ୍ଟିରୁ ଥାନା ଅଧିକାରୀ ସୁମିତ କୁମାର ସୋରେନ ଜଣାଇଥିଲେ। ଥାନା ଅଧିକାରୀ ସୋରେନ ଗଣମାଧ୍ୟମ ପ୍ରତିନିଧିଙ୍କୁ ଅଗ୍ନିଶମ ବିଭାଗ ନା ଆମ୍ବୁଲାନ୍ସ ବୋଲି ଭାବିଲେ ପ୍ରଶ୍ନବାଚୀ ସୃଷ୍ଟି ହୋଇଛି। ଏଭଳି ଏକ ସଚେତନତା ସଭାର ପ୍ରଚାର ପ୍ରସାର ଆବଶ୍ୟକତା ଥିଲେ ମଧ୍ୟ ଗଣମାଧ୍ୟମଙ୍କୁ ଉପେକ୍ଷା କରିବାକୁ ନେଇ ପୋଲିସ ଉପରେ ନିଜର ଅସନ୍ତୁଷ୍ଟ ଝାଡ଼ିଛନ୍ତି ଗଣମାଧ୍ୟମ ପ୍ରତିନିଧି। ତେଣୁ ମୋରଡ଼ା ପୋଲିସ ଗଣମାଧ୍ୟମ ପ୍ରତିନିଧି ସହିତ ସୁସମ୍ପର୍କ ରଖିବାରେ ବିଫଳ, ଯାହାର ପ୍ରଭାବ ଆଗାମୀ ଦିନରେ ବେଶ୍ ପ୍ରତିଫଳିତ ହେବ ବୋଲି ଆଲୋଚନା ହେଉଛି।
