ମୋରଡ଼ା,୬ା୩(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ପଞ୍ଚାୟତ ସମିତିର ଅଷ୍ଟମ ସାଧାରଣ ଅଧିବେଶନ ଚିତ୍ରଡ଼ାସ୍ଥିତ ବ୍ଲକ କାର୍ଯ୍ୟାଳୟର କନ୍ଫରେନ୍ସ ହଲ୍ରେ ଅନୁଷ୍ଠିତ ହୋଇଯାଇଛି। ଉକ୍ତ ଅଧିବେଶନରେ ବ୍ଲକ ଅଧ୍ୟକ୍ଷ ପୀତନାଥ ସୋରେନ ଅଧ୍ୟକ୍ଷତା କରିଥିବା ବେଳେ ମୁଖ୍ୟ ଅତିଥି ଭାବେ ମୋରଡା ବିଧାୟକ ରାଜିକିଶୋର ଦାସ ଯୋଗଦେଇଥିଲେ। ବିଡିଓ ଅଣାକାର ନାଏକ, ଜିଲାପରିଷଦ ସଭ୍ୟ ଅଭିରାମ ଭୋଇ, ସଭ୍ୟା ମିନାକ୍ଷୀ ସୋରେନ, ଝରଣା ମୁର୍ମୁ,ଏଇଇ ମୋତିଲାଲ ତୁଙ୍ଗ, ଏମ୍ପି ପ୍ରତିନିଧି, ଜିପିଓ ରୂପେଶ ମାଝିଙ୍କ ସମେତ ସମସ୍ତ ସରକାରୀ ଅଧିକାରୀ, ସରପଞ୍ଚ, ସମିତି ସଭ୍ୟ ଉପସ୍ଥିତ ଥିଲେ।
ସ୍ବାସ୍ଥ୍ୟ ବିଭାଗ ତରଫରୁ ଗୋଷ୍ଠୀକେନ୍ଦ୍ର ଅଧିକାରୀ ହାମ୍ବିରା ମୁର୍ମୁ ସ୍ବାସ୍ଥ୍ୟ ସମ୍ପର୍କିତ ସମସ୍ତ ବିବରିଣୀ ଉପସ୍ଥାପନା କରିଥିଲେ। ବ୍ଲକର ମୋଟ୍ ୭୬୦୦ ଜଣ ପିଲାଙ୍କୁ ପୋଲିଓ ବୁନ୍ଦା ଦିଆଯାଇଥିବା ବେଳେ ଯକ୍ଷ୍ମା, କୁଷ୍ଠ ରୋଗର ନିରାକରଣ ପାଇଁ କାର୍ଯ୍ୟକ୍ରମ ଚାଲୁରହିଛି ବୋଲି ସୂଚନା ଦେଇଥିଲେ। ଏହାପରେ ପରେ ଶିଶୁ ବିକାଶ, ଉଦ୍ୟାନ କୃଷି ବିଭାଗ,ଶିକ୍ଷା ବିଭାଗ,ମତ୍ସ୍ୟ ବିଭାଗ ଏବଂ ଅନ୍ୟ ବିଭାଗୀୟ ଅଧିକାରୀମାନେ ବିଭିନ୍ନ ଯୋଜନା ସମ୍ପର୍କରେ ବିବରଣୀ ପ୍ରଦାନ କରିଥିଲେ।
ତେବେ କାର୍ଯ୍ୟକ୍ରମ ଆରମ୍ଭ ହେବାର ମାତ୍ର କିଛି ମିନିଟ୍ ପରେ ବିଧାୟକ କାର୍ଯ୍ୟବ୍ୟସ୍ତତା ହେତୁ ଚାଲିଯାଇଥିଲେ। ବିଧାୟକ ଉପସ୍ଥିତ ଥିବା ସମୟରେ ସରପଞ୍ଚମାନେ ହଲ୍କୁ ପ୍ରବେଶ କରି ନ ଥିଲେ କିନ୍ତୁ ଗଲା ପରେ ହଲ୍କୁ ପ୍ରବେଶ କରିବା ଆଲୋଚନାର ବିଷୟ ହୋଇଛି। ଅଧିବେଶନରେ ସବୁଠୁ ଆଶ୍ଚର୍ଯ୍ୟକର ଘଟଣା ଜାଣିବାକୁ ମିଳିଥିଲା ଯେ, କିଛି ପଞ୍ଚାୟତର ଉନ୍ନୟନମୂଳକ କାର୍ଯ୍ୟର ଫାଇଲ୍ ହଜି ଯାଇଛି, ଯାହା ପ୍ରଶାସନର କାର୍ଯ୍ୟ ଦକ୍ଷତା ଆଡକୁ ଅଙ୍ଗୁଳି ନିର୍ଦ୍ଦେଶ କରୁଛି ଏବଂ ଉକ୍ତ ଅଧିବେଶନରେ ବିଡିଓ ଅଣାକର ନାଏକ ପରିଚାଳନା କରୁଥିଲେ ମଧ୍ୟ ଏଇଇ ମୋତିଲାଲ ତୁଙ୍ଗ ବିଡିଓଙ୍କ କାର୍ଯ୍ୟ କରୁଥିବାର ସାଧାରଣରେ ଆଲୋଚନା ହେଇଥିଲା।
