ଦାରିଙ୍ଗବାଡ଼ି,୧୯।୨(ଅରୁଣ ସାହୁ): ସମସ୍ତ ଭତ୍ତା ପାଉଥିବା ହିତାଧିକାରୀଙ୍କୁ ମାସିକ ୩ ହଜାର ଟଙ୍କା ଲେଖାଏ ଭତ୍ତା ପ୍ରଦାନ କରାଯିବା ଦାବିରେ ଓଡ଼ିଶା ଭତ୍ତାପ୍ରଦାନ ସଂଘର୍ଷ ସମିତି ପକ୍ଷରୁ ଦାବି କରାଯାଇଛି। ମଙ୍ଗଳବାର ଦାରିଙ୍ଗବାଡିଠାରେ ବିରାଟ ସଭା ଓ ଶୋଭାଯାତ୍ରା ମାଧ୍ୟମରେ ପ୍ରତିବାଦ କରାଯିବା ସହ ବ୍ଲକ କାର୍ଯ୍ୟାଳୟକୁ ବିକ୍ଷୋଭକାରୀମାନେ ଘେରିଥିଲେ। ରାଜ୍ୟର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉଦ୍ଦେଶ୍ୟରେ ବିଡ଼ିଓ ପ୍ରୀତିରଞ୍ଜନ ରଥଙ୍କୁ ସ୍ମାରକପତ୍ର ପ୍ରଦାନ କରାଯାଇଛି।
ପ୍ରକାଶ ଯେ, କନ୍ଧମାଳ ଜିଲା ଭତ୍ତାସଂଘର୍ଷ ସମିତି ପକ୍ଷରୁ ଆବାହକ ପ୍ରଶାନ୍ତ ପ୍ରଧାନଙ୍କ ଅଧକ୍ଷତାରେ ଏନେଇ ବୈଠକ ଓ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ଏଥିରେ ଭତ୍ତାସଂଘର୍ଷ ସମିତିର ରାଜ୍ୟ ସଭାପତି ବିଦ୍ୟାଧର ମହାନ୍ତି ଉଦ୍ବୋଧନ ଦେଇ କହିଥିଲେ ଯେ ଭାଜପା ସରକାର ନିର୍ବାଚନ ସକଳ୍ପ ପତ୍ର ଘୋଷଣା ଅନୁସାରେ ଓଡ଼ିଶାର ସମସ୍ତ ଭତ୍ତାଧାରୀକୁ ୩ ହଜ଼ାର ଟଙ୍କା ପ୍ରଦାନ କରାଯିବ। କିନ୍ତୁ ନିର୍ବାଚନ ସରିଲା , ଭାଜପା ସରକାର ଗଠନ କଲା କିନ୍ତୁ ଭତ୍ତା ବୃଦ୍ଧି କ୍ଷେତ୍ରରେ ଅହେତୁକ ଅବହେଳାକୁ ଦୃଢ ସମାଲୋଚନା କରିଥିଲେ। ସରକାର ତୁରନ୍ତ ସମସ୍ତ ହିତାଧିକାରୀଙ୍କୁ ମାସିକ ୩ ହଜାର ଭତ୍ତା ପ୍ରଦାନ ଘୋଷଣା ନ କଲେ ଆସନ୍ତା ୨୧ ଫେବୃଆରୀରେ ବିଧାନସଭା ଆଗରେ ଧାରଣା ଦିଆଯିବାକୁ ରାଜ୍ୟସଭାପତି ମହାନ୍ତି ଚେତାବନୀ ଦେଇଛନ୍ତି। ଏହି ସଭାରେ ଅନ୍ୟମାନଙ୍କ ମଧ୍ୟରେ ଜିଲା ସଭାପତି ତରୁଣ କୁମାର ଦିଗାଲ, ସମ୍ପାଦକ ଅଜୟ କୁମାର ମୂଠାମାଝି, ଉମାକାନ୍ତ ପ୍ରଧାନ,ଅଜୟ କୁମାର ନାୟକ, ଥୋମାସ ନାୟକ,ରାଜକୁମାର ନାୟକ ପ୍ରମୁଖ ଉପସ୍ଥିତ ଥିଲେ। ସମସ୍ତେ ନିଜ ନିଜ ବକ୍ତବ୍ୟରେ ରାଜ୍ୟରେ ଶାସନ କରୁଥିବା ଡବଲଇଞ୍ଜିନ ସରକାର ଗରିବ ଅସହାୟ ବୃଦ୍ଧାବୃଦ୍ଧ, ଭିନ୍ନକ୍ଷମ ଓ ବିଧବା ମହିଳା ମାନଙ୍କ ପ୍ରତି ଅବହେଳା ପ୍ରଦର୍ଶନ କରୁଥିବା କହିଛନ୍ତି।
