ନୂଆଦିଲ୍ଲୀ,୨୦ା୭ (ପି.ଟି.)
ପାର୍ଲାମେଣ୍ଟର ମୌସୁମୀ ଅଧିବେଶନ ସୋମବାରଠାରୁ ଆରମ୍ଭ ହେବାକୁ ଯାଉଥିବାବେଳେ ଏନ୍ଇଇଟି ପରୀକ୍ଷା ପ୍ରଶ୍ନପତ୍ର ଲିକ୍, ଆକ୍ଟିଭିଷ୍ଟ ସୋନମ୍ ଓ୍ବାଙ୍ଗ୍ଚୁକ୍ଙ୍କ ଅନଶନ, ଅଯୋଧ୍ୟା ରାମମନ୍ଦିରରୁ ଦାନ ଅର୍ଥ ଚୋରି ଅଭିଯୋଗ, ପେଟ୍ରୋଲରେ ଇଥାନଲ ମିଶ୍ରଣ ଏବଂ ବିଦେଶୀ ନୀତିକୁ ନେଇ ବିରୋଧୀମାନେ ସରକାରଙ୍କୁ ଘେରିବାକୁ ଯୋଜନା କରିଥିବାରୁ ଅଧିବେଶନ ଆରମ୍ଭରୁ ତୁମ୍ବିତୋଫାନ ହେବା ସମ୍ଭାବନା ରହିଛି। ଅଧିବେଶନ ପୂର୍ବରୁ ରବିବାର ଅନୁଷ୍ଠିତ ସର୍ବଦଳୀୟ ବୈଠକରୁ ଏହାର ସୂଚନା ମିଳିଛି। ବିଦ୍ରୋହୀ ଟିଏମ୍ସି ଏମ୍ପିମାନଙ୍କୁ ଆମନ୍ତ୍ରଣ କରାଯାଇଥିବାରୁ ଏହାକୁ ବିରୋଧ କରି ସମସ୍ତ ବିରୋଧୀ ସଦସ୍ୟ ପ୍ରତୀକାତ୍ମକ ଭାବେ କକ୍ଷତ୍ୟାଗ କରିଥିଲେ। ପରେ ସେମାନେ ବୈଠକ ସ୍ଥଳକୁ ଆସି ଆଲୋଚନାରେ ଭାଗ ନେଇଥିଲେ ଏବଂ ରାମମନ୍ଦିର ଦାନ ଅର୍ଥ ଚୋରି, ପରୀକ୍ଷା ଅନିୟମିତତା ଆଦି ପ୍ରସଙ୍ଗ ଉପରେ ଆଲୋଚନା ପାଇଁ ସରକାରଙ୍କ ନିକଟରେ ଦାବି କରିଥିଲେ।
ଗତ ଏପ୍ରିଲରେ ବଜେଟ ଅଧିବେଶନ ଶେଷ ହେବା ପରଠାରୁ ଇତିମଧ୍ୟରେ ସଂସଦର ଉଭୟ ସଦନରେ ବିରୋଧୀ ଦଳ ରୂପରେଖରେ ପରିବର୍ତ୍ତନ ଘଟିଛି। ଅନୂ୍ୟନ ୩୭ ଜଣ ଏମ୍ପି ବିରୋଧୀ ଦଳ ଛାଡ଼ି ଭାଜପା ନେତୃତ୍ୱାଧୀନ ଏନ୍ଡିଏ ମେଣ୍ଟରେ ସାମିଲ ହୋଇଛନ୍ତି। ପାର୍ଲାମେଣ୍ଟ ଓ ରାଜ୍ୟ ବିଧାନସଭାଗୁଡ଼ିକରେ ମହିଳା ସ୍ଥାନ ସଂରକ୍ଷଣ ଆଇନକୁ ଆଗୁଆ ଲାଗୁ କରିବା ପାଇଁ ସରକାର ପୁନର୍ବାର ସମ୍ବିଧାନ ସଂଶୋଧନ ବିଲ୍ ଆଣିବାକୁ ଚିନ୍ତା କରୁଥିବାବେଳେ ଏନ୍ଡିଏ ସପକ୍ଷରେ ସଂଖ୍ୟା ବଢ଼ିଥିବାରୁ ବିଲ୍ ଗୃହୀତ କରାଇବା ସହଜ ହୋଇପାରେ। ଗତ ଏପ୍ରିଲରେ ଉକ୍ତ ବିଲ୍ ଲୋକ ସଭାରେ ଗୃହୀତ ହୋଇପାରି ନ ଥଲା। ବିରୋଧୀ ଦଳଗୁଡ଼ିକରେ ବିଭାଜନ ହୋଇଥିବାରୁ ଶାସକ ମେଣ୍ଟର ଏମ୍ପି ସଂଖ୍ୟା ବଢ଼ିଯାଇଛି। କିନ୍ତୁ ଏହା ବିରୋଧୀ ଶିବିରରେ ପରସ୍ପର ପ୍ରତି ତିକ୍ତତାକୁ ଆହୁରି ବଢ଼ାଇ ଦେଇଛି। ପାର୍ଲାମେଣ୍ଟରେ ସ୍ଥିତି ବଦଳୁଥିବାରୁ ବିଲ୍ ଆଗତ କରିବା ପୂର୍ବରୁ ସରକାର ଅପେକ୍ଷା କରିବେ ଓ ସ୍ଥିତିକୁ ଦେଖି ନିଷ୍ପତ୍ତି ନେବେ ବୋଲି ସୂତ୍ରରୁ ଜଣାପଡ଼ିଛି।
ଟିଏମ୍ସିରୁ ଅଲଗା ହୋଇଥିବା ୨୦ ବିଦ୍ରୋହୀ ଏମ୍ପିଙ୍କ ନେତୃତ୍ୱ ନେଉଥିବା ସୁଦୀପ ବନ୍ଦୋପାଧ୍ୟାୟଙ୍କୁ ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ ସର୍ବଦଳୀୟ ବୈଠକକୁ ଡାକିଥିଲେ। ସୁଦୀପଙ୍କ ସମେତ ୨୦ ବିଦ୍ରୋହୀ ଏମ୍ପି ନ୍ୟାଶନାଲ ସିଟିଜେନ୍ସ ପାର୍ଟି ଅଫ୍ ଇଣ୍ଡିଆ (ଏନ୍ସିପିଆଇ)ରେ ଯୋଗ ଦେଇଛନ୍ତି। ଉକ୍ତ ସଦସ୍ୟମାନଙ୍କ ପାଇଁ ଲୋକ ସଭାରେ ଅଲଗା ଆସନ ବ୍ୟବସ୍ଥାକୁ ବାଚସ୍ପତି ଶନିବାର ଅନୁମୋଦନ କରିଥିଲେ। ତେବେ ଏନ୍ସିପିଆଇରେ ସେମାନଙ୍କ ମିଶ୍ରଣକୁ ସ୍ବୀକୃତି ପ୍ରଦାନ ନେଇ ଚୂଡ଼ାନ୍ତ ନିଷ୍ପତ୍ତି ନିଆଯାଇ ନାହିଁ। ବିଦ୍ରୋହୀ ଏମ୍ପିମାନଙ୍କୁ ଅଯୋଗ୍ୟ ଘୋଷଣା କରିବା ପାଇଁ ଟିଏମ୍ସି ଦାବି କରିଛି।
