ଲକ୍ଷ୍ନୌ: ଆଜିକାଲି ମେଶିନରେ ଖୁବଶୀଘ୍ର ଟଙ୍କା ଗଣିବା କାମ କରିହେଉଛି। କିନ୍ତୁ ଟଙ୍କା ଗଣିବା ସହିତ ଏହାକୁ ସାନିଟାଇଜ୍ ବି କରିହେବ। ଏଭଳି ଏକ ଭିନ୍ନ ମେଶିନ୍ ତିଆରି କରିଛନ୍ତି ଉତ୍ତରପ୍ରଦେଶ ଲକ୍ଷ୍ନୌରେ ଥିବା ଏପିଜେ ଅବଦୁଲ କଲାମ୍ ଟେକ୍ନିକାଲ୍ ୟୁନିଭର୍ସିଟିର ଅନୁଜ ଶର୍ମା ଓ ତାଙ୍କ ଟିମ୍। ଅନୁଜ ଟଙ୍କା ଗଣିବା ପାଇଁ ଏଭଳି ଏକ ମେଶିନ ତିଆରି କରିଛନ୍ତି ଯାହା ଏକ ମିନିଟରେ ୨୦୦ଟି ନୋଟ୍ ଗଣି ପାରୁଛି ଏବଂ ଏକ ସମୟରେ ନୋଟ୍ଗୁଡ଼ିକୁ ସାନିଟାଇଜ୍ କରିଦେଉଛି।
ନୋଟ୍କୁ ଗଣିବା ସମୟରେ ସାନିଟାଇଜ୍ କରିବା ନିମନ୍ତେ ମେଶିନ୍ ସହିତ ସାନିଟାଇଜର ଲଗାଯାଇଛି। ଏହାକୁ ତିଆରି କରିବା ନିମନ୍ତେ ଖର୍ଚ୍ଚ ହୋଇଛି ପ୍ରାୟ ୧୫ ହଜାର ଟଙ୍କା। କରୋନା ଭାଇରସ୍ ମହାମାରୀ ସମୟରେ ଲୋକଙ୍କ ସୁରକ୍ଷାକୁ ଦୃଷ୍ଟିରେ ରଖି ଏଭଳି ଏକ ମେଶିନ୍ ତିଆରି କରାଯାଇଛି ବୋଲି ଅନୁଜ ଶର୍ମା କହିଛନ୍ତି। ଏବେ ଟୁଇଟରରେ ଏହି ମେଶିନର ଫଟୋ ଓ ଭିଡିଓକୁ ଶେୟାର କରାଯାଇଛି। ତେଣୁ ଲୋକେ ସୋସିଆଲ୍ ମିଡିଆରେ ଅନୁଜ ଶର୍ମା ଓ ତାଙ୍କ ଟିମ୍କୁ ପ୍ରଶଂସା କରିବା ସହିତ ବର୍ତ୍ତମାନ ସମୟରେ ଏହି ମେଶିନର ଗୁରୁତ୍ୱ ଯଥେଷ୍ଟ ରହିଥିବା ମତ ଦେଇଛନ୍ତି। କାରଣ ଏବେ ସମସ୍ତଙ୍କୁ ବାରମ୍ବାର ହାତକୁ ସାନିଟାଇଜ୍ କରିବା ଉପରେ ଗୁରୁତ୍ୱ ଦିଆଯାଉଛି। ତେଣୁ ଏଭଳି ଏକ ମେଶିନକୁ ନେଇ ସୋସିଆଲ୍ ମିଡିଆରେ ଜୋର୍ଦାର ଚର୍ଚ୍ଚା ହେଉଛି।
