ନୂଆଦିଲ୍ଲୀ,୨୦।୭: ଭାରତୀୟ ଷ୍ଟାର କ୍ରିକେଟର ବିରାଟ କୋହଲିଙ୍କୁ ନେଇ ପୂର୍ବତନ କ୍ରିକେଟରମାନେ କିଛି ନା କିଛି ପ୍ରତିକ୍ରିୟା ଦେଇଥାନ୍ତି। କେହି କେହି ତାଙ୍କର ପ୍ରଶଂସା କରୁଥିବା ବେଳେ କିଛି ତାଙ୍କ ବିରୋଧରେ ମନ୍ତବ୍ୟ ଦେଉଥିବା ଦେଖାଯାଇଥାଏ। ନିକଟରେ ଭାରତର ଭେଟେରାନ ଲେଗ୍ ସ୍ପିନର ଅମିତ ମିଶ୍ରା ବିରାଟ ନାମ ଏବଂ ଯଶ ମିଳିବା ପରେ ବଦଳି ଯାଇଥିବା କହିଥିଲେ। ଏବେ ଏହାକୁ ନେଇ ମହମ୍ମଦ ଶାମି ବଡ଼ ବୟାନ ଦେଇଛନ୍ତି।
ଶୁଭଙ୍କର ମିଶ୍ରାଙ୍କ ୟୁଟ୍ୟୁବ୍ ଚ୍ୟାନେଲରେ ଶାମି କହିଛନ୍ତି, ଅନେକେ ପୂର୍ବତନ କ୍ରିକେଟର ଜାଣନ୍ତି ଯେବେ ବି କୋହଲିଙ୍କ ବିରୋଧରେ କିଛି କହିବେ ତାଙ୍କ ନାମ ପରଦିନ ଖବରକାଗଜର ପ୍ରଥମ ପୃଷ୍ଠାରେ ବାହାରିବ। ଏଥିଲାଗି ସେମାନେ ଜାଣିଶୁଣି ଏଭଳି କରିଥାନ୍ତି।
ଏହାଛଡ଼ା କୋହଲିଙ୍କ ସହ ତାଙ୍କର ସମ୍ପର୍କକୁ ନେଇ ଶାମି କହିଛନ୍ତି, କୋହଲିଙ୍କୁ ନେଟ୍ରେ ଶାମିଙ୍କ ବୋଲିଂକୁ ଖେଳିବା ପସନ୍ଦ। ଏଣୁ ଦୁହିଁଙ୍କୁ ମଜା ଆସିଥାଏ। କୋହଲି ଏବଂ ଈଶାନ୍ତ ଶର୍ମା ମୋର ପରମ ମିତ୍ର। ଆହତ ହୋଇଥିବା ବେଳେ ଲଗାତାର ଫୋନ୍ କରିଥାନ୍ତି ବୋଲି ସେ କହିଛନ୍ତି।
