ନୂଆଦିଲ୍ଲୀ,୮।୭ : ପଞ୍ଜାବ ନ୍ୟାଶନାଲ ବ୍ୟାଙ୍କର ୧୩ ହଜାର କୋଟି ଟଙ୍କାର ବେଆଇନ ଋଣ ପ୍ରଦାନ ମାମଲାର ଅନ୍ୟତମ ଅଭିଯୁକ୍ତ ହୀରା ବ୍ୟବସାୟୀ ନୀରବ ମୋଦିଙ୍କ ୩୨୯.୬୬ କୋଟି ଟଙ୍କାର ସମ୍ପତ୍ତିକୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ବୁଧବାର ବାଜ୍ୟାପ୍ତ କରିଛି। ନୀରବ ମୋଦି ଏବଂ ତାଙ୍କ ମାମୁ ମେହୁଲ ଚୋକ୍ସି ଏହି ଋଣ ଠକେଇରେ ସାମିଲ ରହିଥିବା ବେଳେ ଇଡି ସେମାନଙ୍କ ବିରୋଧରେ ତଦନ୍ତ ଜାରି ରଖିଛି। ବାଜ୍ୟାପ୍ତ ସମ୍ପତ୍ତି ମଧ୍ୟରେ ଓ୍ବର୍ଲି ମୁମ୍ବାଇସ୍ଥିତ ସମୁଦ୍ର ମହଲର ୪ ଫ୍ଲାଟ୍, ଆଲିବଗରେ ଏକ ଫାର୍ମ ହାଉସ, ଜୟସାଲମେରରେ ଏକ ଓ୍ବିଣ୍ଡମିଲ୍, ଲଣ୍ଡନରେ ଫ୍ଲାଟ୍ ଏବଂ ୟୁଏଇରେ ଏକ ରେସିଡେନସିଆଲ ଫ୍ଲାଟ୍ ସାମିଲ ରହିଛି। ଏହବାଦ କିଛି ଶେୟାର ଏବଂ ବ୍ୟାଙ୍କ ଜମା ମଧ୍ୟ ସମ୍ପତ୍ତି ମଧ୍ୟରେ ରହିଥିବା ଇଡି ଏକ ବିବୃତିରେ କହିଛି। ସମ୍ପତ୍ତି ବାଜ୍ୟାପ୍ତ ଲାଗି ମୁମ୍ବାଇର ସ୍ବତନ୍ତ୍ର କୋର୍ଟ ଜୁନ୍ ୮ରେ ଇଡିକୁ କ୍ଷମତା ପ୍ରଦାନ କରିଥିଲେ। ଗତବର୍ଷ ଡିସେମ୍ବର ୫ରେ ଏହି କୋର୍ଟ ନୀରବଙ୍କୁ ପଳାତକ ଅର୍ଥନୈତିକ ଅପରାଧୀ ବୋଲି ଘୋଷଣା କରିଥିଲେ। ଏହି ଆଇନରେ ୨୦୧୮ରେ ଇଡି ନୀରବଙ୍କ ୩୨୯ କୋଟି ସମ୍ପତ୍ତିକୁ ଜବତ କରିଥିଲା। ବେଆଇନ ଅର୍ଥ କାରବାର ନିରୋଧୀ ଆଇନରେ ବର୍ତ୍ତମାନ ସୁଦ୍ଧା ତାଙ୍କର ୨୩୪୮ କୋଟି ଟଙ୍କାର ସମ୍ପତ୍ତିକୁ ଇଡି ଜବତ କରିଛି। ୨୦୧୯ ମାର୍ଚ୍ଚରେ ନୀରବ ଲଣ୍ଡନରେ ଗିରଫ ହୋଇଥିଲେ। ୟୁକେରେ ସେ ବର୍ତ୍ତମାନ ଜେଲରେ ଥିବା ବେଳେ ତାଙ୍କ ବିରୋଧରେ ପ୍ରତ୍ୟର୍ପଣ ମାମଲାର ଶୁଣାଣି ଜାରି ରହିଛି।
