ନୂଆଦିଲ୍ଲୀ,୧୦।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ନୂଆ ସଂସଦ ଭବନର ଶିଳାନ୍ୟାସ କରିଛନ୍ତି। ଏହାର ନିର୍ମାଣ କାର୍ଯ୍ୟ ୨୦୨୨ ଅଗଷ୍ଟ ସୁଦ୍ଧା ଶେଷ ହେବ ବୋଲି କୁହାଯାଉଛି। ସ୍ବାଧୀନତାର ୭୫ତମ ବର୍ଷ ପୂର୍ତ୍ତି ଅବସରରେ ନୂଆ ସଂସଦ ଭବନ ନିର୍ମାଣ କାର୍ଯ୍ୟ ଶେଷ ହେବାର ଯୋଜନା ରହିଛି। ଏହାର ନିର୍ମାଣ କାର୍ଯ୍ୟ ଟାଟା ପ୍ରୋକେଜ୍ଟ ଲମିଟେଡ୍ ଦ୍ୱାରା କରାଯିବ। ମୋଟ ୬୪,୫୦୦ ବର୍ଗ ମିଟର ପରିମିତ ଅଞ୍ଚଳରେ ନୂଆ ସଂସଦ ଭବନ ନିର୍ମାଣ କରାଯିବ। ଯାହାକି ପୁରୁଣା ସଂସଦ ଭବନର ନିର୍ମାଣ ସ୍ଥଳଠାରୁ ୧୭ ହଜାର ବର୍ଗ ମିଟର ଅଧିକ। ନୂଆ ସଂସଦ ଭବନରେ ଲୋକ ସଭା ସଦସ୍ୟଙ୍କ ପାଇଁ ୮୮୮ ସିଟ୍ ଏବଂ ରାଜ୍ୟ ସଭା ସଦସ୍ୟଙ୍କ ପାଇଁ ୩୮୪ ସିଟ୍ ରହିବ। ନୂଆ ସଂସଦ ଭବନରେ ୧୨୨୪ ସଦସ୍ୟ ଏକା ସହିତ ବସିବାର ସୁବିଧା ମଧ୍ୟ ରହିବ। ପ୍ରତି ସଦସ୍ୟଙ୍କ ପାଇଁ ୪୦ ବର୍ଗମିଟର ପରିମିତ ଅଞ୍ଚଳରେ ଏକ କାର୍ଯ୍ୟାଳୟ ମଧ୍ୟ ରହିବ। ଏହାର ନିର୍ମାଣରେ ୯୭୧ କୋଟି ଟଙ୍କା ଖର୍ଚ୍ଚ ହେବ ବୋଲି ବ୍ୟୟ ଅଟକଳ ପ୍ରସ୍ତୁତ କରାଯାଇଛି।
