ନୂଆଦିଲ୍ଲୀ, ୨୨ା୫:ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜର ପାଞ୍ଚ ଦେଶ ଗସ୍ତର ଚତୁର୍ଥ ପର୍ଯ୍ୟାୟରେ ନରୱେର ମହାରାଜା ହାରାଲ୍ଡ (୫ମ)ଙ୍କୁ ସାକ୍ଷାତ କରିଛନ୍ତି। ଏହି ଅବସରରେ ସେ ମହାରାଜାଙ୍କୁ କଟକର ପ୍ରସିଦ୍ଧ ରୁପା ତାରକସି କାମରେ ନିର୍ମିତ ଏକ ସୁନ୍ଦର ଡଙ୍ଗା ମଡେଲ ଉପହାର ଦେଇଛନ୍ତି। ଏହାସହ ନରୱେର ମହାରାଣୀ ସୋନଜାଙ୍କୁ ଓଡ଼ିଶାର ଅନ୍ୟତମ ପ୍ରାଚୀନ ତଥା ପାରମ୍ପରିକ କଳାକୃତି ‘ତାଳପତ୍ର ପଟ୍ଟଚିତ୍ର’ ଉପହାର ସ୍ବରୂପ ପ୍ରଦାନ କରିଛନ୍ତି।
ଓଡ଼ିଶାର ଏହି ଅମୂଲ୍ୟ କଳାକୃତିକୁ ନରୱେର ରାଜଦମ୍ପତିଙ୍କୁ ଉପହାର ଦେଇ ବିଶ୍ୱ ଦରବାରରେ ରାଜ୍ୟର ଗୌରବ ବଢ଼ାଇଥିବାରୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗୁରୁବାର ପ୍ରଧାନମନ୍ତ୍ରୀ ମୋଦିଙ୍କୁ ଭୂୟସୀ ପ୍ରଶଂସା କରିଛନ୍ତି।
ସୋସିଆଲ ମିଡିଆ ପୋଷ୍ଟ ମାଧ୍ୟମରେ ମୁଖ୍ୟମନ୍ତ୍ରୀ କହିଛନ୍ତି, ପ୍ରଧାନମନ୍ତ୍ରୀଙ୍କ ଦ୍ୱାରା ମହାରାଣୀ ସୋନଜାଙ୍କୁ ପ୍ରଦାନ କରାଯାଇଥିବା ତାଳପତ୍ର ପଟ୍ଟଚିତ୍ର ହେଉଛି ଓଡ଼ିଶାର ମନ୍ଦିର ପରମ୍ପରା ସହ ଜଡ଼ିତ ଏକ ଶ୍ରେଷ୍ଠ କଳାକୃତି। ଏହା ଶତାବ୍ଦୀ ଶତାବ୍ଦୀର ସୂକ୍ଷ୍ମ କାରିଗରି ଏବଂ ଭକ୍ତିପୂର୍ଣ୍ଣ କଳାର ଏକ ଜ୍ୱଳନ୍ତ ପ୍ରମାଣ। କଟକର ପ୍ରସିଦ୍ଧ ତାରକସି ଶିଳ୍ପରେ ନିର୍ମିିତ ରୁପାର ଡଙ୍ଗା, ଯେଉଁଠାରେ ଦକ୍ଷ କାରିଗରମାନେ ରୁପାର ସୂକ୍ଷ୍ମ ସୂତାକୁ ଏକ ଚିତ୍ତାକର୍ଷକ ରୂପ ଦେଇଛନ୍ତି, ତାହା ଭାରତର ସମୃଦ୍ଧ ସାମୁଦ୍ରିକ ଐତିହ୍ୟ ଏବଂ ଦୁଇ ଦେଶ ମଧ୍ୟରେ ଥିବା ବନ୍ଧୁତ୍ୱର ପ୍ରତୀକକୁ ଦର୍ଶାଉଛି। ‘ତାଳପତ୍ର ପଟ୍ଟଚିତ୍ର’ ବା ‘ତାଳପତ୍ର ଚିତ୍ର’ ଓଡ଼ିଶାର ସବୁଠାରୁ ପ୍ରାଚୀନ ଏବଂ ଜଟିଳ କଳା ମଧ୍ୟରୁ ଅନ୍ୟତମ। ଏଥିରେ କପଡ଼ା ବଦଳରେ ତାଳପତ୍ର ଉପରେ ସୂକ୍ଷ୍ମ ଭାବେ ଖୋଦେଇ କରି ଚିତ୍ର ପ୍ରସ୍ତୁତ କରାଯାଇଥାଏ। ସୂତାଦ୍ୱାରା ଯୋଡ଼ାଯାଇଥିବା ଏହି ତାଳପତ୍ର ଗୁଡ଼ିକରେ କାହାଣୀ, ସୁନ୍ଦର ଅକ୍ଷର ଏବଂ ଶାସ୍ତ୍ରୀୟ ପ୍ରତିମାଶିଳ୍ପର ଏକ ଅପୂର୍ବ ସମନ୍ବୟ ଦେଖିବାକୁ ମିଳେ।
Dharitri – Odisha’s No.1 Odia Daily
