ନୂଆଦିଲ୍ଲୀ,୧୯।୭: ପଶ୍ଚିମବଙ୍ଗର ଏକ ରାଲିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେବୀ କାଳୀଙ୍କ ନାମ ନେବାରୁ ତ୍ରୁଣଣମୂଳ କଂଗ୍ରେସ (ଟିଏମସି) ଏମପି ମହୁଆ ମୋଇତ୍ରା ଏହାକୁ କଟାକ୍ଷ କରିଛନ୍ତି। ସେ କହିଛନ୍ତି ଯେ ବଙ୍ଗାଳୀ ଭୋଟରଙ୍କୁ ଆକର୍ଷିତ କରିବା ପାଇଁ ଏପରି ପ୍ରୟାସ କରିବା ତାଙ୍କ ପାଇଁ ଟିକେ ଡେରି ହୋଇଗଲାଣି।
ସୂଚନାଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର (୧୮ ଜୁଲାଇ, ୨୦୨୫) ପଶ୍ଚିମବଙ୍ଗର ଦୁର୍ଗାପୁରରେ ଏକ ରାଲିକୁ ସମ୍ବୋଧିତ କରିଥିଲେ। ସେ ବଙ୍ଗଳା ଭାଷାରେ ତାଙ୍କର ଅଭିଭାଷଣ ଆରମ୍ଭ କରିଥିଲେ ଏବଂ ଦେବୀ କାଳୀ ଏବଂ ଦେବୀ ଦୁର୍ଗାଙ୍କୁ ଆହ୍ବାନ କରିଥିଲେ।
ପ୍ରଧାନମନ୍ତ୍ରୀଙ୍କ ଭାଷଣ ଉପରେ କଟାକ୍ଷ କରି ମହୁଆ ମୋଇତ୍ରା କହିଛନ୍ତି, ‘ପ୍ରଧାନମନ୍ତ୍ରୀ ମୋଦି, ବଙ୍ଗାଳୀ ଭୋଟ ପାଇବା ପାଇଁ ମା’ କାଳୀଙ୍କ ନାମ ନେଇଛନ୍ତି, ହେଲେ ଏବେ ବହୁତ ଡେରି ହୋଇଗଲାଣି। ମା’ କାଳୀ ଢୋକଲା ଖାଆନ୍ତି ନାହିଁ ଏବଂ ସେ କେବେ ଖାଇବେ ନାହିଁ।’ ଢୋକଲା ସମ୍ପର୍କରେ ମହୁଆ ମୋଇତ୍ରାଙ୍କ ଦ୍ୱାରା କରାଯାଇଥିବା ଏହି ମନ୍ତବ୍ୟ ତାଙ୍କର ପୂର୍ବ ଆକ୍ରମଣର ଏକ ଅଂଶ, ଯେଉଁଥିରେ ମହୁଆ ଭାରତୀୟ ଜନତା ପାର୍ଟି (ବିଜେପି) ଉପରେ ଲୋକଙ୍କ ଖାଦ୍ୟ ଅଭ୍ୟାସକୁ ନିୟନ୍ତ୍ରଣ କରିବାର ଅଭିଯୋଗ ଆଣିଥିଲେ। ପଶ୍ଚିମବଙ୍ଗର ଅନେକ କାଳୀ ମନ୍ଦିରରେ, ମାଂସ ଖାଦ୍ୟ ଦେବୀଙ୍କୁ ଭୋଗ ଭାବରେ ଅର୍ପଣ କରାଯାଏ।
ପଶ୍ଚିମବଙ୍ଗର କୃଷ୍ଣନଗରର ଏମପି ମହୁଆ ମୋଇତ୍ରା ଚଳିତ ବର୍ଷ ଆରମ୍ଭରେ ଢୋକଲାକୁ ନେଇ ଭାଜପା ଉପରେ ଆକ୍ରମଣ କରିଥିଲେ। ନୂଆଦିଲ୍ଲୀର ଚିତ୍ତରଞ୍ଜନ ପାର୍କର ଏକ ମାଛ ବଜାରରେ କିଛି ଲୋକ ଦୋକାନୀଙ୍କୁ ଧମକ ଦେଉଥିବାର ଏକ ଭିଡିଓ ଭାଇରାଲ ହେବା ପରେ ସେ ଭାଜପା ଉପରେ ଆକ୍ରମଣ କରିଥିଲେ। ଚିତ୍ତରଞ୍ଜନ ପାର୍କର ସେହି ମାଛ ବଜାର ଏକ ମନ୍ଦିର ପରିସରରେ ଅବସ୍ଥିତ। ମହୁଆ ମୋଇତ୍ରା ସମାନ ଭାଇରାଲ ଭିଡିଓ ଶେୟାର କରିଥିଲେ ଏବଂ ଏହା ମଧ୍ୟ ଦାବି କରିଥିଲେ ଯେ ଦୋକାନୀଙ୍କୁ ଧମକ ଦେଉଥିବା ଲୋକମାନେ ଭାଜପା ସହିତ ଜଡିତ ଥିଲେ।
ମହୁଆ ମୋଇତ୍ରା ତାଙ୍କ ପୂର୍ବତନ ଆକାଉଣ୍ଟରୁ ଏକ ଟୁଇଟରେ ଲେଖିଛନ୍ତି, ‘ଏବେ ଏହା ସାର୍ବଜନୀନ ହୋଇଗଲାଣି ଯେ ଚିତ୍ତରଞ୍ଜନ ପାର୍କରେ ଭାଜପା ଗୁଣ୍ଡାମାନେ କିପରି ବଙ୍ଗାଳୀମାନଙ୍କୁ ଧମକ ଦେଉଛନ୍ତି। ଚିତ୍ତରଞ୍ଜନ ପାର୍କ ଏକ ବଙ୍ଗାଳୀ କଲୋନୀ ଏବଂ ବଙ୍ଗାଳୀ ଲୋକମାନେ ଗର୍ବୀ ମାଛ ଭକ୍ଷକ।’ ସେ ଆହୁରି କହିଛନ୍ତି, ‘ଭାଜପାି ଏବେ ଆମକୁ କ’ଣ ଖାଇବା ଉଚିତ ଏବଂ କେଉଁଠାରେ ଆମର ଦୋକାନ ସ୍ଥାପନ କରିବା ଉଚିତ ତାହା କହିବ କି? ଭାଜପା କ’ଣ ଆମକୁ ଢୋକଲା କିପରି ଖାଇବା ଉଚିତ ଏବଂ ଦିନକୁ ତିନିଥର ଜୟ ଶ୍ରୀ ରାମ କିପରି ଜପ କରିବା ଉଚିତ ତାହା ମଧ୍ୟ କହିବ?” ତଥାପି, ଭାରତୀୟ ଜନତା ପାର୍ଟି ଏହି ଭିଡିଓକୁ ନକଲି ଏବଂ ରାଜନୈତିକ ଉଦ୍ଦେଶ୍ୟ ପାଇଁ ପ୍ରେରିତ ବୋଲି କହିଥିଲା।
