ପାରଳାଖେମୁଣ୍ଡି,୧୦ା୧୨(ଗିରିଧାରୀ ପରିଛା): ଗଜପତି ଜିଲା ପାରଳାଖେମୁଣ୍ଡି ବିଧାୟକ ଇଂ. ରୂପେଶ କୁମାର ପାଣିଗ୍ରାହୀ କାଶୀନଗର ବ୍ଲକ ଖାରଡ଼ା ଗ୍ରାମାଞ୍ଚଳ ଗସ୍ତ କରି ଚାଷୀଙ୍କ ସହ ବିଭିନ୍ନ ବିଷୟରେ ପଚାରି ବୁଝିଥିଲେ। ବିଶେଷ କରି ଅମଳ ଧାନ ସମ୍ପର୍କରେ ଚାଷୀଙ୍କ ସହ ଆଲୋଚନା କରିବା ସହ ଚଳିତ ବର୍ଷ ଧାନ କିପରି ହୋଇଛି ଆଦିକୁ ନେଇ ଆଲୋଚନା କରିଥିଲେ। ବିଧାୟକ ପାଣିଗ୍ରାହୀଙ୍କ ସହ ଚାଷୀମାନେ ଅମଳ ଧାନ ସମ୍ପର୍କରେ ବିଭିନ୍ନ ବିଷୟରେ କହିଥିବା ବେଳେ ଚଳିତ ବର୍ଷ ଧାର୍ଯ୍ୟ ତାରିଖରେ ଧାନ କିପରି ସରକାର କିଣିନେବେ ସେନେଇ ସୁବିଧା କରାଗଲେ ଉପକୃତ ହେବୁ ବୋଲି ଜଣାଇଥିଲେ। ତେବେ ଚଳିତ ବିଧାନସଭାର ଶୀତ ଅଧିବେଶନରେ ଏହି ପ୍ରସଙ୍ଗ ଉଠାଇଛି ଏବଂ ଗଜପତି ଜିଲାର ଚାଷୀମାନଙ୍କ ଧାନ ମକରସଂକ୍ରାନ୍ତି ପୂର୍ବରୁ କ୍ରୟ କରିବାକୁ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଥିବାର ବିଧାୟକ ଚାଷୀଙ୍କୁ କହିଥିଲେ। ଏହା ସହ ଧାନ କ୍ରୟ ସମୟରେ ମଣ୍ଡିରେ କୌଣସି ସମସ୍ୟା ଉପୁଜିଲେ ଜଣାଇବା ପାଇଁ ଚାଷୀଙ୍କୁ ବିଧାୟକ କହିଥିଲେ। ବିଧାୟକଙ୍କ ସହ ଚାଷୀମାନେ ବେଶ ସମୟ କଥାବାର୍ତ୍ତା ହୋଇ ଖୁସି ପ୍ରକଟ କରିଥିଲେ।
