ଭଞ୍ଜନଗର,୩।୭(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟରେ ଆସନ୍ତା ୨୦୨୬-୨୦୨୭ ଶିକ୍ଷାବର୍ଷରୁ ଯୁକ୍ତ ୨ ଖୋଲିବା ପ୍ରକ୍ରିୟା ଜୋରସୋରରେ ଆରମ୍ଭ ହୋଇଛି। ତେଣୁ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ଗୁରୁବାର ଅଚାନକ କେନ୍ଦ୍ରୀୟ ବିଦ୍ୟାଳୟରେ ପହଞ୍ଚି ବିଦ୍ୟାଳୟର ଭିତ୍ତିଭୂମି ବୁଲି ଦେଖିଥିଲେ। ଏଥିସହ ଆସନ୍ତା ଶିକ୍ଷାବର୍ଷରୁ ଏଠାରେ କିଭଳି ଯୁକ୍ତ ୨ ଖୋଲିବ ସେଥିପାଇଁ କଲେଜ ଅଧ୍ୟକ୍ଷ ପ୍ରଦୀପ କମାନୁଙ୍କ ସହ ଆଲୋଚନା କରିଥିଲେ। ଏହି ଅବସରରେ ଅଧକ୍ଷ ଯୁକ୍ତ ୨ ଖୋଲିବାକୁ ହେଲେ ଆଉ କିଛି ଶ୍ରେଣୀ ଗୃହ ଆବଶ୍ୟକ ସମ୍ପର୍କରେ ବିଧାୟକଙ୍କୁ ଅବଗତ କରାଇଥିଲେ।
କେନ୍ଦ୍ରୀୟ ବିଦ୍ୟାଳୟର ସ୍ଥାୟୀ ଗୃହ ନ ଥିବା ଯୋଗୁ କେଏସୟୁବି କଲେଜର ପୁରାତନ ଚକରା ବିଷୋୟୀ ଛାତ୍ରାବାସରେ କେନ୍ଦ୍ରୀୟ ବିଦ୍ୟାଳୟ ଚାଲିଛି। ତେଣୁ କେନ୍ଦ୍ରୀୟ ବିଦ୍ୟାଳୟକୁ ଲାଗି ଥିବା ଛାତ୍ରାବାସର ଆଉ କିଛି ଅବ୍ୟବହୃତ ରୁମ ଦେବା ପାଇଁ ଅଧ୍ୟକ୍ଷ ଅନୁରୋଧ କରିଥିଲେ। ବିଧାୟକ ନାୟକ କିଭଳି ତୁରନ୍ତ ଆବଶ୍ୟକ ରୁମ କେନ୍ଦ୍ରୀୟ ବିଦ୍ୟାଳୟକୁ ଯୋଗାଇ ଦିଆଯିବ ସେନେଇ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ।
ସୂଚନାଯୋଗ୍ୟ ଯେ, ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ସ୍ଥାନୀୟ କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ଅବ୍ୟବହୃତ ଛାତ୍ରାବାସରେ ଆଜିକୁ ୧୫ ବର୍ଷ ପୂର୍ବେ ଖୋଲିଥିଲା। ଏହାପରେ ବିଦ୍ୟାଳୟର ସ୍ଥାୟୀ କୋଠା ପାଇଁ ବାରମ୍ବାର ଚେଷ୍ଟା ହୋଇଛି। କିନ୍ତୁ ତାହା ସଫଳ ହୋଇ ପାରିନାହିଁ। ୩ ବର୍ଷ ପୂର୍ବେ ସ୍ଥାୟୀ କୋଠା ପାଇଁ ସ୍ଥାନୀୟ ଶିଳ୍ପ ତାଲିମ କେନ୍ଦ୍ର ସମ୍ମୁଖରେ ୯ ଏକର ଜମି ସରକାର ଦେଇଛନ୍ତି। ତଥାପି କୋଠା କାମ ଆରମ୍ଭ ହୋଇପାରୁନାହିଁ। ତେଣୁ ବିଧାୟକ କେନ୍ଦ୍ର ଉଚ୍ଚ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟି ସ୍ଥାୟୀ କୋଠା କାମ କିଭଳି ତୁରନ୍ତ ଆରମ୍ଭ ସେଥିପାଇଁ ଅନୁରୋଧ କରିଛନ୍ତି। ଇତିମଧ୍ୟରେ ସ୍ଥାୟୀ କୋଠା ପାଇଁ ୩୫ କୋଟି ଟଙ୍କା ଅନୁମୋଦନ ହୋଇଛି। ଟେଣ୍ଡର ହେଲେ କାମ ଆରମ୍ଭ ହେବ ।
ଚଳିତ ଶିକ୍ଷାବର୍ଷରୁ ହିଁ ସ୍ଥାୟୀ କୋଠା କାମ ଆରମ୍ଭ କରିବା ଲକ୍ଷ୍ୟ ରଖାଯାଇଛି। ବିଧାୟକଙ୍କ ଗସ୍ତ ସମୟରେ ଭଞ୍ଜନଗର ଏନଏସି ଅଧ୍ୟକ୍ଷ ଗୋପବନ୍ଧୁ ମହାପାତ୍ର, ବ୍ଲକ ଏମପି ପ୍ରତିନିଧି ରବିନ୍ଦ୍ର କୁମାର ଗୌଡ, ବିଦ୍ୟାଳୟ ଅଧକ୍ଷ ପ୍ରଦୀପ କମାନୁ, ବରିଷ୍ଠ ଶିକ୍ଷକ ସତ୍ୟବାନ ସାହୁ, ଜ୍ୟୋତି ପ୍ରକାଶ ସାହୁ, ଶିକ୍ଷୟତ୍ରୀ ଶ୍ରଦ୍ଧାଞ୍ଜଳି ଖୁଣ୍ଟିଆ ପ୍ରମୁଖ ଉପସ୍ଥିତ ଥିଲେ।
କେନ୍ଦ୍ରୀୟ ବିଦ୍ୟାଳୟରେ ଯୁକ୍ତ ୨ ବହୁବର୍ଷ ହେବ ଖୋଲି ନ ଥିବା ଯୋଗୁ ମାଟ୍ରିକ ପାସ ପରେ ଛାତ୍ରୀଛାତ୍ରମାନେ ଉଚ୍ଚତର ଶିକ୍ଷା ପାଇଁ ବାହାରକୁ ଯାଉଛନ୍ତି। ଫଳରେ ଅଭିଭାବକ ଏବଂ ଛାତ୍ରୀଛାତ୍ରମାନେ ଏନେଇ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ବର୍ତ୍ତମାନ ବିଧାୟକଙ୍କ ପ୍ରଚେଷ୍ଟାରେ ଯୁକ୍ତ ୨ ଖୋଲିବା ପ୍ରକ୍ରିୟା ଆରମ୍ଭ ହୋଇଛି। ଯାହାକୁ ନେଇ ଛାତ୍ରୀଛାତ୍ର ଏବଂ ଅଭିଭାବକମାନେ ଖୁସି ବ୍ୟକ୍ତ କରିଛନ୍ତି। ଏଥିସହ ଉପଜିଲାପାଳ ତଥା କେନ୍ଦ୍ରୀୟ ବିଦ୍ୟାଳୟ ଚେୟାରମ୍ୟାନ ଉମା ଶଙ୍କର ବେହେରା, ବିଦ୍ୟାଳୟ ଅଧକ୍ଷ ପ୍ରଦୀପ କମାନୁ ବିଦ୍ୟାଳୟର ଉନ୍ନତି ପାଇଁ ମଧ୍ୟ ଅନେକ ପଦକ୍ଷେପ ନେଇଛନ୍ତି।
