କୋରାପୁଟ/ନାରାୟଣପାଟଣା,୨୬ା୫(ଅମିତାଭ ବେହେରା/ରାଜକିଶୋର ଜେନା)-କୋରାପୁଟ ଜିଲାର ଲକ୍ଷ୍ମୀପୁର ବିଧାନସଭା ନିର୍ବାଚନ ମଣ୍ଡଳୀରେ ସମ୍ପୂର୍ଣ୍ଣ ଭାବେ ମଦ ବନ୍ଦ ନେଇ ସୋମବାର ଆନ୍ଦୋଳନ କରାଯାଇଛି। ଲକ୍ଷ୍ମୀପୁର ବିଧାୟକ ପବିତ୍ର ସାଉଁନ୍ତାଙ୍କ ନେତୃତ୍ୱରେ ବନ୍ଧୁଗାଁ, ନାରାୟଣପାଟଣା ଓ ଲକ୍ଷ୍ମୀପୁର ବ୍ଲକ୍ରେ ଆନ୍ଦୋଳନ ହୋଇଛି।
ସୋମବାର ବିଧାୟକ ସାଉଁନ୍ତା ୩ ବ୍ଲକର ବହୁ ବିହାରି ମଦ ଭାଟି ଓ ଦୋକନକୁ ଯାଇଥିଲେ। ସେଠାରେ ମଦ ପ୍ରସ୍ତୁତି ପାଇଁ ଥିବା ମହୁଲ ଓ ପୋଚକୁ ଦେଖି ଅସନ୍ତୋଷ ପ୍ରକାଶ କରି ଭାଟି ଓ ଦୋକନରେ ତାଲା ପକାଇ ଦେଇଥିଲେ। ମଦ ଯୋଗୁ ଲୋକଙ୍କ ଆର୍ଥିକ ସଙ୍କଟ, ଗଣ୍ଡଗୋଳ ଆଦି ବିଭିନ୍ନ ସମସ୍ୟା ଦେଖା ଦେଉଛି।
ଅସ୍ବାସ୍ଥ୍ୟକର ପରିବେଶ ଓ ବେଆଇନ ଭାବେ ପ୍ରସ୍ତୁତ ମଦ ପିଇ କେତେକ ଲୋକେ ପ୍ରାଣହାନୀ ହେଉଥିବା ଅଭିଯୋଗ ହୋଇଛି। ଲୋକଙ୍କ ଜୀବନର ସୁରକ୍ଷା ପାଇଁ ଏଭଳି ପଦକ୍ଷେପ ନେଇଥିବା ବିଧାୟକ କହିଛନ୍ତି। ଅଞ୍ଚଳରେ ଥିବା ବିହାରି ଭାଟିରେ ବେଆଇନ ଭାବେ ପ୍ରସ୍ତୁତ ମଦକୁ ଗଁାଗୁଡ଼ିକରେ ବିକ୍ରି କରି ବ୍ୟବସାୟୀ ଲାଭ ପାଉଛନ୍ତି। ଏହି ମଦକୁ ପିଇବାକୁ ଲୋକେ ଜମି ବନ୍ଧା ପକାଇବାକୁ ପଛାଉ ନ ଥିବା ଅଭିଯୋଗ କରି ବିଧାୟକ ପୂର୍ବରୁ ୩ଥର ରାଜ୍ୟ ଅବକାରୀ ବିଭାଗକୁ ଚିଠି କରିଥିଲେ। କିନ୍ତୁ ଏଯାଏ ବିଭାଗ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବାରୁ ଏହି ପଦକ୍ଷେପ ଆରମ୍ଭ କରିଥିବା ସେ କହିଛନ୍ତି।
ବିଧାୟକଙ୍କ ସମର୍ଥନ କରି ସ୍ଥାନୀୟ ଗ୍ରାମବାସୀ ଏହି ମଦ ବିରୋଧ ଅଭିଯାନରେ ସାମିଲ ହୋଇଥିଲେ। ଏ ସମ୍ପର୍କରେ ଜିଲା ଅବକାରୀ ବିଭାଗର ନିରୀକ୍ଷକ ସୁଧିର ସାହୁଙ୍କ ପଚାରିବାରୁ ବନ୍ଧୁଗଁା, ନାରାୟଣପାଟଣା ଓ ଲକ୍ଷ୍ମୀପୁର ବ୍ଲକ୍ ବହୁ ବିହାରି ମଦ ଦୋକାନ ଓ ଭାଟିରେ ତାଲା ପଡିଥିବା କହିଛନ୍ତି।