ଥୁଆମୂଳ ରାମପୁର,୧୨।୦୨,(ଦୁର୍ଗା କୀର୍ତ୍ତି): ବିଭିନ୍ନ ଶ୍ରମିକ ସଂଗଠନ ପକ୍ଷରୁ ଦିଆଯାଇଥିବା ‘ଭାରତ ବନ୍ଦ’ ଡାକରାର ପ୍ରଭାବ ଗୁରୁବାର ଥୁଆମୂଳ ରାମପୁର ବ୍ଲକରେ ମିଶ୍ରିତ ରହିଥିବା ବେଳେ ଏହାକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସକାଳ ୬ଟାରୁ ସା ୬ଟା ପର୍ଯ୍ୟନ୍ତ ବନ୍ଦ ଡାକରା ଦିଆଯାଇଥିଲେ ହେଁ ମଧ୍ୟାହ୍ନ ୧ଟା ପରେ ସ୍ଥିତି ସ୍ବାଭାବିକ ହୋଇଥିଲା। ଏହି ବନ୍ଦ ପାଳନ ସମୟରେ ବିଭିନ୍ନ ସଂଗଠନର ଆନ୍ତରିକତା ଓ ରାଜନୈତିକ ଆଦର୍ଶକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଆଜିର ଏହି ଧର୍ମଘଟରେ ଥୁଆମୂଳ ରାମପୁର ବ୍ଲକର ରାଜମିସ୍ତ୍ରୀ ସଂଘ, ନବ ନିର୍ମାଣ କୃଷକ ସଂଗଠନ ଏବଂ CPIML ସମର୍ଥନ ଜଣାଇ ସାମିଲ ହୋଇଥିଲେ। କିନ୍ତୁ ଆଶ୍ଚର୍ଯ୍ୟର କଥା, ଯେଉଁ AICCTU ପକ୍ଷରୁ ବଡ଼ ବଡ଼ ବ୍ୟାନର ଲଗାଯାଇ ଧର୍ମଘଟର ଆହ୍ବାନ ଦିଆଯାଇଥିଲା, ସେହି ସଂଗଠନର ଜଣେ ହେଲେ କର୍ମୀଙ୍କୁ ଆନ୍ଦୋଳନ ସ୍ଥଳରେ ଦେଖିବାକୁ ମିଳିନଥିଲା। କେବଳ ପୋଷ୍ଟର ଓ ବ୍ୟାନର ମଧ୍ୟରେ ସୀମିତ ରହିଥିଲା ସେମାନଙ୍କର ପ୍ରତିବାଦ। ରାଜ୍ୟ ପିସିସି ସଭାପତି ଏହି ବନ୍ଦକୁ ସମ୍ପୂର୍ଣ୍ଣ ସମର୍ଥନ କରିବାକୁ ନିର୍ଦ୍ଦେଶ ଦେଇଥିବା ବେଳେ ଥୁଆମୂଳ ରାମପୁରରେ ତାହାର ଓଲଟା ଚିତ୍ର ଦେଖିବାକୁ ମିଳିଥିଲା। ଧର୍ମଘଟ ସ୍ଥଳ ଭାବେ ପରିଚିତ କଲମପୁର ଛକ ନିକଟରେ ଅନ୍ୟ ସମସ୍ତ ଦୋକାନ ବନ୍ଦ ଥିବା ବେଳେ ଜଣେ କଂଗ୍ରେସ କର୍ମୀଙ୍କ ଟିଫିନ ସେଣ୍ଟର ଖୁଲମ ଖୋଲା ଚାଲିଥିଲା। ଧର୍ମଘଟରେ କୌଣସି କଂଗ୍ରେସ କର୍ମୀଙ୍କୁ ଦେଖିବାକୁ ମିଳିନଥିବା ବେଳେ ନିଜ ଦଳର ନିଷ୍ପତ୍ତିକୁ ବେଖାତିର କରି ସେମାନେ ବ୍ୟବସାୟରେ ବ୍ୟସ୍ତ ଥିବା ଦେଖାଯାଇଛି। ଏହି ବନ୍ଦ ଯୋଗୁ ସାଧାରଣ ଖଟିଖିଆ ଲୋକ ଓ କ୍ଷୁଦ୍ର ବ୍ୟବସାୟୀଙ୍କ ଦିନକର ରୋଜଗାର ବନ୍ଦ ହୋଇଯାଇଛି। ସ୍କୁଲ ଛାତ୍ରୀଛାତ୍ରଙ୍କ ପାଠପଢା ପ୍ରଭାବିତ ହୋଇଛି। ବଣ-ପାହାଡ଼ ଘେରା ଏହି ଦୁର୍ଗମ ଅଞ୍ଚଳରେ ଲୋକେ ବହୁ କଷ୍ଟରେ ଜୀବିକା ନିର୍ବାହ କରୁଥିବା ବେଳେ ଏଭଳି ବନ୍ଦ ଡାକରା ସେମାନଙ୍କ ଦୁଃଖ ବଢ଼ାଇଛି।
* ଜନସାଧାରଣଙ୍କ ମତ: ଲୋକେ କୁହାକୁହି ହେଉଛନ୍ତି ଯେ ଆଗାମୀ ପଞ୍ଚାୟତ ନିର୍ବାଚନକୁ ଆଖି ଆଗରେ ରଖି ଏହା କେବଳ ଏକ ରାଜନୈତିକ ଡ୍ରାମା ବା ପ୍ରହସନ।
* ଆର୍ଥିକ କ୍ଷତି: ସରକାରୀ ବାବୁମାନେ ଘରେ ବସି ଦରମା ପାଇଥିବା ବେଳେ ଦୈନିକ ମଜୁରିଆଙ୍କ ପରିବାର ପ୍ରତିପୋଷଣରେ ବାଧା ସୃଷ୍ଟି ହୋଇଛି।
ଥୁଆମୂଳ ରାମପୁର ଭଳି ଅଞ୍ଚଳରେ ସରକାରୀ ଯୋଜନା ବିଳମ୍ବରେ ପହଞ୍ଚୁଥିବା ବେଳେ ଏଭଳି ଆନ୍ଦୋଳନ ଲୋକଙ୍କ କୌଣସି ସୁବିଧା କରୁନାହିଁ। ବରଂ ଏହାଦ୍ୱାରା କେବଳ ସାଧାରଣ ଲୋକଙ୍କ କ୍ଷତି ହେଉଥିବାରୁ ଏହାକୁ ସମର୍ଥନ ନ କରିବାକୁ ଅନେକ ବୁଦ୍ଧିଜୀବୀ ମତ ଦେଇଛନ୍ତି।
