ହାଟଡିହୀ,୮l୩(ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡିହୀ ମିଠିଗାଁ ଉପ୍ରା ବିଦ୍ୟାଳୟରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ବିଦ୍ୟାଳୟର ପ୍ରଧାନଶିକ୍ଷକ ବାବୁଲା ବେହେରା ଗତ ଶନିବାର ବିଦ୍ୟାଳୟ ଛୁଟି ହେବାପରେ ଏକୁଟିଆର ସୁଯୋଗ ନେଇ ଜଣେ ଶିକ୍ଷୟିତ୍ରୀଙ୍କୁ ମନ୍ଦ ଉଦ୍ଦେଶ୍ୟ ରଖି ଦୁର୍ବ୍ୟବହାର କରିଥିଲେ। ଏନେଇ ଶିକ୍ଷୟିତ୍ରୀ ଜଣକ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ହାଟଡିହୀ ବିଇଓ ରାଜୀବ ଦଳେଇ ଆଇସିସି(ଇଣ୍ଟରନାଲ କପ୍ଲାଣ୍ଟ କମିଟି)କମିଟି ଜରିଆରେ ତଦନ୍ତ ରିପୋର୍ଟ ମାଗିଥିଲେ । ସୂଚନା ଯୋଗ୍ୟ, କମିଟି ଯୌନ ନିର୍ଯାତନା ଉପରେ ତଦନ୍ତ କରିଥାଏ ।
ଘଟଣା ସମ୍ପର୍କରେ ବିଇଓ ଦଳେଇ କହିଛନ୍ତି ତଦନ୍ତ ରିପୋର୍ଟ ଆସିବା ପରେ ସମ୍ପୃକ୍ତ ପ୍ରଧାନ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏପରିକି ସୋମବାର କାର୍ଯ୍ୟାନୁଷ୍ଠାନ ସମ୍ପର୍କିତ ରିପୋର୍ଟ ପ୍ରକାଶ କରାଯିବ ବୋଲି ସେ କହିଛନ୍ତି।
ଘଟଣା ସମ୍ପର୍କରେ ବିଦ୍ୟାଳୟ କମିଟି ଚେୟାରମ୍ୟାନ ଅନାମ ପଳତା କହିଛନ୍ତି, ଗତ ଶନିବାର ପ୍ରଧାନ ଶିକ୍ଷକ ବାବୁଲା ବେହେରା ବିଦ୍ୟାଳୟ ଛୁଟି ହେବା ପରେ ମନ୍ଦ ଉଦେଶ୍ୟରେ ଶିକ୍ଷୟିତ୍ରୀଙ୍କ ହାତ ଧରି ଅଫିସ ଭିତରକୁ ଡାକିଥିବା ଅଭିଯୋଗ ପାଇଥିଲେ। ପରେ ବିଦ୍ୟାଳୟ କମିଟି ଏବଂ ଗ୍ରାମର ବରିଷ୍ଠ ବ୍ୟକ୍ତିଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା l ବୈଠକରେ ଘଟଣା ସମ୍ପର୍କରେ ଆଲୋଚନା ହେଉଥିଲା। ସେତିକିବେଳେ ଶିକ୍ଷୟତ୍ରୀ ଜଣକ ସମ୍ପୃକ୍ତ ପ୍ରଧାନଶିକ୍ଷକଙ୍କୁ ଜୋତାରେ ମାଡ଼ ମାରିଥିଲେ। ପରବର୍ତ୍ତୀ ସମୟରେ ବୁଝାଶୁଝା ପରେ ପରିସ୍ଥିତି ଶାନ୍ତ ପଡିଥିଲା। ଏପରିକି ବୈଠକରେ ଘଟଣାର ଆପୋଷ ସମାଧାନ ହୋଇଥିଲା। ଏନେଇ ପ୍ରଧାନଶିକ୍ଷକ ବାବୁଲା ବେହେରାଙ୍କୁ ପଚାରିବାରୁ ଯାହା ବି ଘଟଣା ହୋଇଥିଲା ସେସବୁ ସମାଧାନ ହୋଇଯାଇଥିବା ସେ କହିଛନ୍ତି।
