ପଦ୍ମପୁର,୨୪।୧୧(ଡି.ଏନ.ଏ.): ବରଗଡ଼ ଜିଲା ପଦ୍ମପୁର ଉପନିର୍ବାଚନ ପାଇଁ ରାଜନୈତିକ ତାତି ଯେପରି ବୃଦ୍ଧି ପାଉଛି ଚାଷୀଙ୍କ ଅସନ୍ତୋଷ ତାତି ମଧ୍ୟ ସମପରିମାଣରେ ବୃଦ୍ଧି ପାଉଛି। ଡିସେମ୍ବର ୫ରେ ମଣ୍ଡି ଖୋଲିବା ଯୋଜନା ଥିଲେ ମଧ୍ୟ ପଦ୍ମପୁର ଉପନିର୍ବାଚନରେ ଏଥର ଚାଷ ଓ ଚାଷୀ ମୁଖ୍ୟ ପ୍ରସଙ୍ଗ ହୋଇଥିବାରୁ ପ୍ରଶାସନ ଗତ ୨୧ ତାରିଖରୁ ଜିଲାର ସମସ୍ତ ମଣ୍ଡି ଖୋଲିଦେଲେ। ମାତ୍ର ମଣ୍ଡିଗୁଡିକରେ ଆବଶ୍ୟକ ଭିତ୍ତିଭୂମି ଅଭାବ ସହିତ ଚାଷୀମାନଙ୍କ ପାଇଁ ଆନୁଷଙ୍ଗିକ ବ୍ୟବସ୍ଥା କରାଯାଇ ନ ଥିବାରୁ ମଣ୍ଡି ଖୋଲିବାର ୨ଦିନ ପରେ ବି ପଦ୍ମପୁର ଉପଖଣ୍ଡର ୮୦ଟିରୁ ମାତ୍ର ୨୦ଟି ମଣ୍ଡିକୁ ୧ ଲକ୍ଷ ୫ ହଜାର ୭୬୩ ପ୍ୟାକେଟ ଧାନ ଆସିଛି। ସେହିପରି ମାତ୍ର ୧୮ ଜଣ ଚାଷୀଙ୍କ ୨୭୦୨ ପ୍ୟାକେଟ ଧାନ ଉଠିଥିବା ନିୟନ୍ତ୍ରିତ ବଜାର କମିଟି ସମ୍ପାଦକ ତ୍ରିନାଥ ରାଉତ ସୂଚନା ଦେଇଛନ୍ତି। ଟୋକନ ସମସ୍ୟା ମଣ୍ଡିକୁ ଧାନ ନ ଆସିବାର ମୁଖ୍ୟ କାରଣ ହୋଇଛି। ଧାନ ଉତ୍ପାଦନ ଓ ଜମି ଅନୁଯାୟୀ ଟୋକନ ଆସୁନାହିଁ ବୋଲି ଚାଷୀମାନେ ଅଭିଯୋଗ କରିଛନ୍ତି ।
ପଦ୍ମପୁର ବ୍ଲକର ଚାଷୀ ମିତ୍ରଭାନୁ ବେହେରା କହିଛନ୍ତି, ସେ ପ୍ରାୟ ୧୦୦ କୁଇଣ୍ଟାଲ ଧାନ ଅମଳ କରିଛନ୍ତି । ତାଙ୍କ ପାଖକୁ ମାତ୍ର ୨୧କୁଇଣ୍ଟାଲ ୫୭ କେଜିର ଟୋକନ ଆସିଛି। ଅବଶିଷ୍ଟ ଧାନକୁ ବେପାରୀ ହାତରେ କମ୍ଦରରେ ବିକ୍ରି କରିବା ପାଇଁ ବାଧ୍ୟ ହେବେ ବୋଲି ସେ କହିଛନ୍ତି। ଅପରପକ୍ଷେ ଅନେକ ଚାଷୀ ଧାନ ଅମଳ କରିସାରିଥିବା ବେଳେ ଟୋକନ ଆସିବାରେ ବିଳମ୍ବ ହେଉଥିବାରୁ ଅଭାବୀ ବିକ୍ରି ଚାଲିଛି। ସେମାନେ ବାଧ୍ୟହୋଇ ମିଲ୍ ମାଲିକ ଓ ବେପାରୀଙ୍କୁ ଧାନ ବିକ୍ରି କରୁଥିବା ଦେଖାଯାଉଛି। ପ୍ରଶାସନର ସ୍ଥାଣୁତା, ଯୋଗାଣ ବିଭାଗ, ମିଲରଙ୍କ ଅସାଧୁ ମେଣ୍ଟ ଯୋଗୁ ଏଠି ଖୋଲାଖୋଲି ଚାଷୀଙ୍କୁ ଲୁଟ ଚାଲିଛି ବୋଲି ରାଜବୋଡାସମ୍ବର କୃଷକ ସଙ୍ଗଠନ ଅଭିଯୋଗ କରିଛି। ସେହିପରି ଧାନର ସହାୟକ ମୂଲ୍ୟ କୁଇଣ୍ଟାଲ ପ୍ରତି ୨୦୪୦ ଟଙ୍କା ଥିବାବେଳେ ଚାଷୀ ଆରମ୍ଭରୁ ୧୨୦୦ କିମ୍ବା ୧୩୦୦ ଟଙ୍କାରେ ବିକ୍ରି କରୁଛି । ସରକାର ଧାନ କିଣା ଟାର୍ଗେଟକୁ ପ୍ରତିବର୍ଷ କମାଇ ଚାଲିଛନ୍ତି । ମରୁଡି ସମୟରେ ସରକାର ବରଗଡ଼ ଜଲାରେ ୬୭ ଲକ୍ଷ ଟନ ଧାନ ସଂଗ୍ରହ ଲକ୍ଷ୍ୟ ରଖିଥିଲେ। ମାତ୍ର ଏଥର ବମ୍ପର ଧାନ ଅମଳ ସତ୍ତ୍ୱେ ୫୭ ଲକ୍ଷ ଟନ୍ ସଂଗ୍ରହ ଲକ୍ଷ୍ୟ ରଖିଛନ୍ତି । ଯାହାକି ଅନ୍ୟ ବର୍ଷ ଅପେକ୍ଷା ଆହୁରି ଜଟିଳ ସ୍ଥିତ ସୃଷ୍ଟି ହେବ ବୋଲି ଚାଷୀନେତା ରମେଶ ମହାପାତ୍ର କହିଛନ୍ତି।
