କେନ୍ଦୁଝର,୩୦।୩(ସ୍ବ.ପ୍ର.): ଭାରତରେ ଗୁରୁଙ୍କୁ ଭଗବାନ ରୂପରେ ପୂଜା କରାଯାଏ। ତେଣୁ ଗୁରୁପୂର୍ଣ୍ଣିମା ଭଳି ଏକ ପବିତ୍ର ଦିବସ ପାଳନ କରାଯାଇଥାଏ। ଯୁଗେ ଯୁଗେ ଗୁରୁ ଓ ଶିଷ୍ୟ ମଧ୍ୟରେ ଥିବା ପବିତ୍ର ପରମ୍ପରାକୁ ଉଚ୍ଚ ସ୍ଥାନରେ ରଖାଯାଇଛି। ହେଲେ କେତେକ ରସିକିଆ ଗୁରୁଙ୍କ ପାଇଁ ଆଜି ଏହି ସମ୍ପର୍କରେ ଦାଗ ଲାଗିବା ସହ କଳଙ୍କିତ ହୋଇଯାଇଛି। କିଛି ଏଭଳି ଘଟଣା ଘଟିଛି କେନ୍ଦୁଝର ଜିଲା ତେଲକୋଇ ବ୍ଲକ ଡ଼ିମିରିଆ ଉଚ୍ଚ ପ୍ରାଥମିକ ବିଦ୍ୟାଳୟରେ। ଉକ୍ତ ବିଦ୍ୟାଳୟର ପ୍ରଧାନ ଶିକ୍ଷକ ସ୍କୁଲର ଛାତ୍ରୀମାନଙ୍କ ପ୍ରତି ଆସଦାଚରଣ କରିଥିବା ଅଭିଯୋଗ ହୋଇଛି। ଏନେଇ ଛାତ୍ରୀମାନେ ସ୍କୁଲ ଶିକ୍ଷୟତ୍ରୀଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳି ନଥିଲା। ପରେ ଅଭିଭାବକମାନେ ଜାଣିବା ପରେ ଗ୍ରାମବାସୀ ଓ ସ୍କୁଲ କମିଟିକୁ ଅଭିଯୋଗ କରିବାରୁ ଗ୍ରାମରେ ଏକ ବୈଠକ ବସିଥିଲା। ତେବେ ଉକ୍ତ ବୈଠକକୁ ଅଭିଯୁକ୍ତ ପ୍ରଧାନ ଶିକ୍ଷକ ନ ଆସିବାରୁ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଏହାକୁ ନେଇ ଉଭୟ ଶିକ୍ଷା ବିଭାଗର ନିରବତା ଓ ଅଭିଯୁକ୍ତ ପ୍ରଧାନ ଶିକ୍ଷକ ନାରାୟଣ ସେନାପତି (୫୨)ଙ୍କ ମନମାନି ପ୍ରତିବାଦରେ ବୁଧବାର ଉତ୍ତ୍ୟକ୍ତ ଅଭିଭାବକ ସ୍କୁଲ ଘେରାଉ କରି ଅଭିଯୁକ୍ତ ପ୍ରଧାନ ଶିକ୍ଷକଙ୍କୁ ତାଲା ପକାଇ ପୋଲିସ ଜିମା ଦେଇଥିଲେ। ଘଟଣା ସ୍ଥଳରେ ତେଲକୋଇ ପୋଲିସ ଓ ବ୍ଲକ ଶିକ୍ଷା ଅଧିକାରୀ ସୁଭାଷ ଚାନ୍ଦ ମହାନ୍ତି ପହଞ୍ଚିଥିଲେ। ଅଭିଯୋଗ ମିଳିବା ପରେ କେସ୍ ନମ୍ବର୍ ୫୧/୨୦୨୨ ମାମଲା ରୁଜୁ କରଯାଇଥିଲା। ପୋଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଛି ବୋଲି ଥାନା ଅଧିକାରିଣୀ ସାଇପ୍ରଭା ରାଉତ ସୂଚନା ଦେଇଛନ୍ତି। ତେବେ ଦଫା ୩୬୪(ଏ),୮,୧୦, ପୋକ୍ସୋ ଆକ୍ଟରେ ତାଙ୍କୁ ଗିରଫ କରି ପୋଲିସ ତଦନ୍ତ ଜାରି ରଖିଛି। ସୂଚନାଯୋଗ୍ୟ, ଡିମିରିଆ ସ୍କୁଲର ପ୍ରଧାନ ଶିକ୍ଷକ ନାରାୟଣ ସେନାପତି ସପ୍ତମ ଓ ଅଷ୍ଟମ ଶ୍ରେଣୀର ଛାତ୍ରୀମାନଙ୍କୁ ବିଭିନ୍ନ ଆଳରେ ଅଫିସରେ ଅଟକାଉଥିଲେ ଏବଂ ଅସଦାଚରଣ କରୁଥିବା ଛାତ୍ରୀମାନେ ଅଭିଯୋଗ କରିଛନ୍ତି। ଅନ୍ୟପଟେ ସେସବୁ ଅଭିଯୋଗ ମିଥ୍ୟା ବୋଲି ସମ୍ପୃକ୍ତ ପ୍ରଧାନ ଶିକ୍ଷକ ସଫେଇ ଦେଇଛନ୍ତି।
