ଭୁବନେଶ୍ୱର,୨୭।୧୧: ଭାରତୀୟ କମ୍ପାନୀ ସଚିବ ସଂସ୍ଥାନ (ଆଇସିଏସ୍ଆଇ)ର ଭୁବନେଶ୍ୱର ଚାପ୍ଟର ଏବଂ ଓଡ଼ିଶା ସ୍ଥାବର ସମ୍ପତ୍ତି ନିୟାମକ ପ୍ରାଧିକରଣ (ଓରେରା) ଆନୁକୂଲ୍ୟରେ ଶନିବାର ଏକ ଦିନିକିଆ କର୍ମଶାଳାର ଆୟୋଜନ କରାଯାଇଥିଲା। ଏପରିକି ଉକ୍ତ କର୍ମଶାଳା ‘ରିୟଲ ଇଷ୍ଟେଟ କ୍ଷେତ୍ରରେ ସମସ୍ୟା ଓ ଆହ୍ବାନ’ ର୍ଶୀଷକ ବିଷୟବସ୍ତୁ ଉପରେ ଆଧାରିତ ଥିଲା। ଏହି ଅବସରରେ ଓରେରାର ଅଧ୍ୟକ୍ଷ ସିଦ୍ଧାନ୍ତ ଦାସ କର୍ମଶାଳାକୁ ଉଦ୍ଘାଟନ କରି କହିଥିଲେ, ଘର ମଣିଷର ଏକ ସର୍ବନିମ୍ନ ଆବଶ୍ୟକତା ହୋଇଥିବାରୁ ଏ କ୍ଷେତ୍ରରେ ଜନସାଧାରଣ କିପରି ସହଜରେ ଓ ସୁବିଧାରେ ଘର ପାଇପାରିବେ ତାହା ସୁନିଶ୍ଚିତ କରିବା ଲକ୍ଷ୍ୟରେ ରେରା ଆଇନ ପ୍ରଣୟନ ହୋଇଛି। ଗତ ୫ବର୍ଷ ମଧ୍ୟରେ ରେରା ଆଇନ ପ୍ରଣୟନ ଫଳରେ ଅନେକ ପ୍ରକଳ୍ପରେ ସ୍ବଚ୍ଛତା ଏବଂ ପରିଚାଳନାଗତ ଦକ୍ଷତା ଆସିବା ସହ ଗ୍ରାହକମାନଙ୍କ ମନରେ ବିଶ୍ବାସ ମଧ୍ୟ ସୃଷ୍ଟି କରିପାରିଛି ବୋଲି ଦାସ ମତପ୍ରକାଶ କରିଥିଲେ। ସେହିଭଳି ଓରେରାର ପ୍ରଶାସନିକ ସଦସ୍ୟ ପ୍ରଦୀପ କୁମାର ବିଶ୍ବାଳ କହିଥିଲେ, ନିର୍ମାଣ କ୍ଷେତ୍ର ଅର୍ଥନୀତିରେ ଅନେକ ମହତ ରଖିଥାଏ। ଏହି କ୍ଷେତ୍ରର ଅବଦାନ ବିଷୟରେ ବିସ୍ତୃତ ଉଲ୍ଲେଖ କରିବା ସହ ରେରା ଆଇନ ଏହି କ୍ଷେତ୍ରର ଅଭିବୃଦ୍ଧି ସହିତ ଗ୍ରାହକମାନଙ୍କ ସ୍ବାର୍ଥରକ୍ଷା ପାଇଁ ଉଦ୍ଦିଷ୍ଟ ବୋଲି କହିବା ସହ ଆଇନର କାର୍ଯ୍ୟକାରିତା ପାଇଁ ସମସ୍ତଙ୍କ ସହଯୋଗ କାମନା କରିଥିଲେ। ଓରେରାର ବିଧି ସଦସ୍ୟ ରମାନାଥ ପଣ୍ଡା ନିଜ ବକ୍ତବ୍ୟରେ ରେରା ଆଇନର ବିଭିନ୍ନ ଦିଗ ଉପରେ ଆଲୋକପାତ କରିଥିଲେ। ଆଇସିଏସ୍ଆଇ ଶାଖାର ସଭାପତି ଜ୍ୟୋତିର୍ମୟ ମିଶ୍ରଙ୍କ ଅଧ୍ୟକ୍ଷତାରେ ସଭା କାର୍ଯ୍ୟ ଅନୁଷ୍ଠିତ ହୋଇଥିଲା। କାର୍ଯ୍ୟକମର ଉଦ୍ଘାଟନୀ ଅଭିଭାଷଣ ଶାଖାର ପୂର୍ବ ସଭାପତି ରଞ୍ଜନ କୁମାର କର ଦେଇଥିବା ବେଳେ ଓରେରାର ଅତିରିକ୍ତ ସଚିବ ଶ୍ରାବଣୀ ପଟ୍ଟନାୟକ ଧନ୍ୟବାଦ ଅର୍ପଣ କରିଥିଲେ।
