ଖୁଣ୍ଟା/କୁଆମରା,୩୧।୩(ଡି.ଏନ.ଏ.): ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ଅଧୀନ ଖୁଣ୍ଟା ନିକଟ ବାଲିଡ଼ିହା ଗ୍ରାମ ଦେଇ ପ୍ରବାହିତ ଗଙ୍ଗାହାର ନଦୀ କୂଳରେ ଥିବା ବାବା ଢୁଢେଶ୍ବର ମହାଦେବଙ୍କ ପୀଠରେ ମହାବାରୁଣୀ ସ୍ନାନ ଯାତ୍ରା ଅନୁଷ୍ଠିତ ହୋଇଯାଇଛି। ଏହି ଯାତ୍ରାରେ ଜିଲା, ଜିଲା ବାହାର ସମେତ ପଡ଼ୋଶୀ ରାଜ୍ୟରୁ ଲକ୍ଷାଧିକ ଶ୍ରଦ୍ଧାଳୁ ଯୋଗଦେଇ ବୁଡ଼ ପକାଇଥିବା ଦେଖିବାକୁ ମିଳିଥିଲା।
ନଦୀ କୂଳରେ ଥିବା ଏକ ବିରାଟ କାୟ ପଥର ଶଯ୍ୟା ଏବଂ ସେହି ପଥର ଶଯ୍ୟାର ପାଞ୍ଚ ଫୁଟ ତଳେ ପାଣି କୁଣ୍ଡ ମଧ୍ୟରେ ଢୁଢେଶ୍ବର ମହାଦେବ ବର୍ଷ ସାରା ପୂଜା ପାଇଥାନ୍ତି। ପରମ୍ପରା ଅନୁଯାୟୀ ପ୍ରତି ବର୍ଷ ଚୈତ୍ର କୃଷ୍ଣ ପକ୍ଷ ତ୍ରୟୋଦଶୀ ତିଥିରେ କୁଣ୍ଡ ମଧ୍ୟରୁ ପାଣି ଖୋଲା ଯାଇ ପୂଜାର୍ଚ୍ଚନା କରାଯାଇଥାଏ। ଦୀର୍ଘ ବର୍ଷ ହେଲା ଅନୁଷ୍ଠିତ ହୋଇ ଆସୁଥିବା ଏହି ବାରୁଣୀ ଯାତ୍ରା ଅବସରରେ ସପ୍ତାହ ଧରି ଏଠାରେ ମେଳା ବସେ। ମହାଦେବଙ୍କ ପୂଜକ ସିଲୁ ତ୍ରିପାଠୀଙ୍କ ସମେତ ମୋଟ ୮ଜଣ ବ୍ରାହ୍ମଣ ପୂଜା ପାଠ କାର୍ଯ୍ୟ ସମ୍ପନ୍ନ କରିଥିଲେ। କମିଟିର ସଭାପତି ଭରତ ଚନ୍ଦ୍ର ଖିଲାର, ସମ୍ପାଦକ ରବୀଦ୍ର ନାଥ ହେମ୍ବ୍ରମ, ଗୋପୀନାଥ ବେହେରା, ମାନଗୋବିନ୍ଦ ଖିଲାର, ଅଶୋକ ମହାପାତ୍ର, ବ୍ୟୋମକେଶ ତ୍ରିପାଠୀ ପ୍ରମୁଖ କମିଟିର ବହୁ ସଦସ୍ୟ କାର୍ଯ୍ୟକ୍ରମ ପରିଚାଳନା କରିଥିଲେ। ଖୁଣ୍ଟା ଥାନା ଅଧିକାରୀ ସ୍ବର୍ଣ୍ଣଲତା ମିଞ୍ଜଙ୍କ ତତ୍ତ୍ୱାବଧାନରେ ଥାନା କର୍ମଚାରୀ, ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା।
