ନୂଆଦିଲ୍ଲୀ, ୨୧ା୩:ପଳାତକ ହୀରା ବ୍ୟବସାୟୀ ମେହୁଲ ଚୋକ୍ସିଙ୍କୁ ଇଣ୍ଟରନ୍ୟାଶନାଲ କ୍ରିମିନାଲ ପୋଲିସ ସଂଗଠନ (ଇଣ୍ଟରପୋଲ୍) ରେଡ୍ କର୍ନର ତାଲିକାରୁ ବାଦ୍ ଦେଇଛି। ୨୦୧୮ ଡିସେମ୍ବରରେ ଇଣ୍ଟରପୋଲ୍ ଚୋକ୍ସିଙ୍କ ନାମରେ ରେଡ୍ କର୍ନର ନୋଟିସ ଜାରି କରିଥିଲା। ମାନବାଧିକାର ଉଲ୍ଲଂଘନ ହେଉଥିବା ଦର୍ଶାଇ ତାଙ୍କୁ ଏଥିରୁ ବାଦ୍ ଦେବା ଲାଗି ଚୋକ୍ସି ଆବେଦନ କରିଥିବାବେଳେ ସିବିଆଇ ଏହାକୁ ବିରୋଧ କରିଥିଲା। ଏହା ସତ୍ତ୍ୱେ ଇଣ୍ଟରପୋଲ୍ ଚୋକ୍ସିଙ୍କ ନାଁ ହଟାଇବାକୁ ନିଷ୍ପତ୍ତି ନେଇଛି। ଫଳରେ ଚୋକ୍ସି ଏଣିକି ଅବାଧରେ ବିଭିନ୍ନ ଦେଶକୁ ଯାଇପାରିବେ। ୧୩,୦୦୦ କୋଟି ଟଙ୍କା ପଞ୍ଜାବ ନ୍ୟାଶନାଲ ବ୍ୟାଙ୍କ ଋଣ ଦୁର୍ନୀତିରେ ସମ୍ପୃକ୍ତ ଚୋକ୍ସି ନିକଟରେ ଆଣ୍ଟିଗୁଆର ଏକ ଅତାଲତରେ ସତ୍ୟପାଠ ଦାଖଲ କରି ୨୦୨୧ ମେ’ରେ ଭାରତ ସରକାରଙ୍କ ସଂସ୍ଥା ତାଙ୍କୁ ଅପହରଣ କରି ଡୋମିନିକା ନେଇଯାଇ ନିର୍ଯାତନା ଦେଇଥିଲେ ବୋଲି ଅଭିଯୋଗ କରିଥିଲେ।
