ଭୁବନେଶ୍ୱର,୩।୨ (ଅଭୟ ଦାଶ): ମହାନଦୀ କୋଲ୍ଫିଲ୍ଡ ଲିମିଟେଡ୍ (ଏମ୍ସିଏଲ୍)ର ବହୁ ପ୍ରତୀକ୍ଷିତ ତଥା ୨୧୪୫କୋଟି ଟଙ୍କା ବ୍ୟୟବରାଦରେ ନିର୍ମିତ ୪ଟି ପ୍ରମୁଖ ପ୍ରକଳ୍ପକୁ ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆନୁଷ୍ଠାନିକ ଭାବେ ଉଦ୍ଘାଟନ ସହ ଦେଶ ଉଦ୍ଦେଶ୍ୟ୍ରେ ଉତ୍ସର୍ଗ କରିବେ ବୋଲି ଏମ୍ସିଏଲ୍ ପକ୍ଷରୁ ବିସ୍ତୃତ ଭାବେ ସୂଚନା ଦିଆଯାଇଛି। ଏ ନେଇ ଶୁକ୍ରବାର ଏମ୍ସିଏଲ୍ ପକ୍ଷରୁ ଭୁବନେଶ୍ୱରଠାରେ ଏକ ଖବରଦାତା ସମ୍ମିଳନୀର ଆୟୋଜନ କରାଯାଇଥିଲା। ଏହି ପରିପ୍ରେକ୍ଷୀରେ ଏମ୍ସିଏଲ୍ର ନିର୍ଦ୍ଦେଶକ (ଫାଇନାନ୍ସ) ଅଜିତ କୁମାର ବେହୁରା ଉପସ୍ଥିତ ଗଣମାଧ୍ୟମ ପ୍ରତିନିଧିଙ୍କୁ ଉଦ୍ଘାଟନୀ ଉତ୍ସବର ବିସ୍ତୃତ ସୂଚନା ସହ ଖରବଦାତା ସମ୍ମିଳନୀର ଆଭିମୁଖ୍ୟ ଏବଂ ଏମ୍ସିଏଲ୍ର କାରବାର ଓ ଲକ୍ଷ୍ୟ ହାସଲ ଏବଂ ଉଦ୍ଘାଟନ ହେବାକୁ ଥିବା ୪ ପ୍ରମୁଖ ପ୍ରକଳ୍ପ ବିଷୟରେ ମତବ୍ୟକ୍ତ କରିଥିଲେ। ସେହିଭଳି ଦିନିକିଆ ଓଡ଼ିଶା ଗସ୍ତରେ ଆସି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏମ୍ସିଏଲ୍ ଦ୍ୱାରା ନିର୍ମିତ ତଥା କୋଇଲା ଖଣି କ୍ଷେତ୍ରରେ ପରିବର୍ତ୍ତନକାରୀ ୪ଟି ପ୍ରକଳ୍ପକୁ ଉଦ୍ଘାଟନ କରିବେ ବୋଲି ଏମ୍ସିଏଲ୍ ପକ୍ଷରୁ କୁହାଯାଇଛି।
ଉଲ୍ଲେଖଯୋଗ୍ୟ, ଓଡ଼ିଶାର ଅନଗୋଳ ଜିଲାର ତାଳଚେର କୋଲ୍ଫିଲ୍ଡରେ ୩୩୫କୋଟି ଟଙ୍କା ବ୍ୟୟର ବାର୍ଷିକ ୧୦ ମିଲିୟନ ଟନ କ୍ଷମତା ବିଶିଷ୍ଟ ଭୁବନେଶ୍ୱରୀ ଫେଜ୍-୧ ସିଏଚ୍ପି ସାଇଲୋ ଏବଂ ୩୭୪ କୋଟି ଟଙ୍କା ବିନିଯୋଗର ଇବ୍ ଭ୍ୟାଲି କୋଲ୍ଫିଲ୍ଡରେ ବାର୍ଷିକ ୧୫ମିଲିୟନ ଟନ କ୍ଷମତା ବିଶିଷ୍ଟ ଲାଜକୁରା ରାପିଡ୍ ଲୋଡିଂ ସିଷ୍ଟମ (ଆର୍ଏଲ୍ଏସ୍) ନିର୍ମିତ ହୋଇଛି। ସେହିଭଳି ପ୍ରଧାନମନ୍ତ୍ରୀଙ୍କ ଦ୍ୱାରା ଉଦ୍ଘାଟନ ହେବାକୁ ଥିବା ଅନ୍ୟ ପ୍ରକଳ୍ପ ମଧ୍ୟରେ ଇବ୍ ଭ୍ୟାଲି ୱାଶେରିରେ ବାର୍ଷିକ ୧୦ମିଲିୟନ ଟନ ଅଣ-କୋକିଂ କୋଇଲା ଧୋଇବାର କ୍ଷମତା ରହିଛି। ଓଡ଼ିଶାର ଝାରସୁଗୁଡା ଜିଲାରେ ମୋଟ ୫୫୭ କୋଟି ଟଙ୍କା ବ୍ୟୟରେ ନିର୍ମିତ ଏହି ଗୁରୁତ୍ୱପୂର୍ଣ୍ଣ ପ୍ରକଳ୍ପ କୋଇଲା ପ୍ରକ୍ରିୟାକରଣରେ ଗୁଣବତ୍ତା, ନୂତନତା ଓ ସ୍ଥିରତାକୁ ସୂଚିତ କରୁଛି। ଏଥିସହ ପ୍ରଧାନମନ୍ତ୍ରୀ ଶକ୍ତି ସୁରକ୍ଷା ଦିଗରେ ସ୍ଥିରତା ଅଭିଯାନର ଏକ ଅଂଶ ଭାବେ ୮୭୮କୋଟି ଟଙ୍କା ବ୍ୟୟରେ ନିର୍ମିତ ଝାରସୁଗୁଡା-ବରପାଲୀ-ସରଡେଗା ରେଳଲାଇନ ଫେଜ୍-୧ର ୫୦କି.ମି. ଦୀର୍ଘ ଦ୍ୱିତୀୟ ଟ୍ରାକ୍କୁ ମଧ୍ୟ ଦେଶ ଉଦ୍ଦେଶ୍ୟରେ ଲୋକାର୍ପିତ କରିବେ। ଉପରୋକ୍ତ ପ୍ରକଳ୍ପଗୁଡିକ ମଧ୍ୟରେ ଦୁଇଟି ଫାଷ୍ଟ ମାଇଲ କନେକ୍ଟିଭିଟି (ଏଫ୍ଏମ୍ସି) ପ୍ରକଳ୍ପ ଅନ୍ତର୍ଭୁକ୍ତ ରହିଛି ବୋଲି ବେହୁରା ମତପ୍ରକାଶ କରିଛନ୍ତି।
