ଭୁବନେଶ୍ୱର,୧୭।୪(ବ୍ୟୁରୋ): ରାଜ୍ୟ ସରକାଙ୍କ ଓଡ଼ିଶା ୟୁନିଭର୍ସିଟି ଅଫ୍ ଟେକ୍ନୋଲୋଜି ଆଣ୍ଡ୍ ରିସର୍ଚ୍ଚ (ଓୟୁଟିଆର୍)ରେ ଏମସିଏ ପାଠ୍ୟକ୍ରମ ବନ୍ଦ ପାଇଁ ଯୋଜନା କରାଯାଉଥିବା ପୁରାତନ ଛାତ୍ର ସଂଗଠନ ଅଭିଯୋଗ ଉଠାଇବା ସହ ଏହାକୁ ବିରୋଧ କରିଛି। ସଂଗଠନ ସଦସ୍ୟଙ୍କ କହିବାନୁସାରେ, ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ଏହି ନିଷ୍ପତ୍ତି ଦ୍ୱାରା ବିଏସ୍ସି ଏବଂ ବିଏସ୍ସି ପରେ ସଫ୍ଟୱେୟାର ଇଞ୍ଜିନିୟରିଂରେ କ୍ୟାରିୟର କରିବାକୁ ଚାହୁଁଥିବା ଛାତ୍ରୀଛାତ୍ର ପ୍ରଭାବିତ ହେବେ। ଓଡିଶାର ଅଗ୍ରଣୀ ବୈଷୟିକ ବିଶ୍ୱବିଦ୍ୟାଳୟ ଏମ୍ସିଏ ପାଠ୍ୟକ୍ରମକୁ ହଟାଇବା ଦ୍ୱାରା ଅନ୍ୟ ସମସ୍ତ ବୈଷୟିକ କଲେଜ ଏହି ଧାରାକୁ ଅନୁସରଣ କରିବେ ଏବଂ ଶେଷରେ ଏହି ପାଠ୍ୟକ୍ରମ ଅଭାବରେ ଓଡିଶାର ଛାତ୍ରୀଛାତ୍ର ବହୁରାଷ୍ଟ୍ରୀୟ ବୃତ୍ତି ସୁଯୋଗକୁ ହରାଇ ବସିବେ।
ଗତ ୩୦ ବର୍ଷ ଧରି ଏକ ସରକାରୀ ଅନୁଦାନପ୍ରାପ୍ତ ପାଠ୍ୟକ୍ରମ ଭାବେ ଏମ୍ସିଏ ଚାଲି ଆସିଛି। ନିକଟରେ ରାଜ୍ୟ ସରକାର ଏହି ପାଠ୍ୟକ୍ରମରେ ସିଟ୍ ସଂଖ୍ୟା ୩୦ରୁ ୪୫କୁ ବୃଦ୍ଧି କରିଥିଲେ। ତେବେ ଓୟୁଟିଆର୍ର ନୂତନ ପ୍ରଶାସନ ଏହି ପାଠ୍ୟକ୍ରମକୁ ପ୍ରୋସତ୍ାହିତ କରିବା ପରିବର୍ତ୍ତେ କାହିଁକି ବନ୍ଦ କରୁଛନ୍ତି ବୋଲି ପୁରାତନ ଛାତ୍ର ମହେଶ ଜେନା କହିଛନ୍ତି। ପ୍ରତିବର୍ଷ ଓଡ଼ିଶା ଜେଇଇ-ଏମ୍ସିଏ ପରୀକ୍ଷାରେ ଉତ୍କୃଷ୍ଟ ପ୍ରଦର୍ଶନ କରୁଥିବା ତଥା ଶୀର୍ଷ ସ୍ଥାନ ଅଧିକାର କରୁଥିବା ଛାତ୍ରୀଛାତ୍ର ହିଁ ଓୟୁଟିଆର୍ରେ ଏମସିଏ ପାଠ୍ୟକ୍ରମରେ ନାମ ଲେଖାଇବାର ସୁଯୋଗ ପାଇଥାନ୍ତି। ଏଥିସହ ଗତ ୧୦ବର୍ଷ ଭିତରେ ଏଠାରୁ ଉତ୍ତୀର୍ଣ୍ଣ ଛାତ୍ରୀଛାତ୍ର ବହୁରାଷ୍ଟ୍ରୀୟ ସଫ୍ଟୱେର୍ କମ୍ପାନୀରେ ଉଚ୍ଚ ପଦପଦରବୀରେ ନିଯୁକ୍ତି ପାଇ ଓଡ଼ିଶା ତଥା ବିଶ୍ୱବିଦ୍ୟାଳୟର ସମ୍ମାନ ବଢ଼ାଉଛନ୍ତି। ଏଥିସହ ଏମାନଙ୍କ ମଧ୍ୟରୁ ବହୁ ଛାତ୍ରୀଛାତ୍ର ନିଜସ୍ବ ଷ୍ଟାର୍ଟଅପ୍ ତିଆରି କରି ଅନ୍ୟମାନଙ୍କୁ ନିଯୁକ୍ତି ସୁଯୋଗ ପ୍ରଦାନ କରିଛନ୍ତି। କେଉଁ ଆଧାରରେ ଓୟୁଟିଆର୍ର ଅଧିକାରୀମାନେ ଏମସିଏ ପାଠ୍ୟକ୍ରମକୁ ଅନାବଶ୍ୟକ ମନେ କରୁଛନ୍ତି ତାହାର ସନ୍ତୋଷଜନକ ଉତ୍ତର ମିଳୁ ନାହିଁ। ସେହିପରି ଏହି ପାଠ୍ୟକ୍ରମ ପାଇଁ ଓଡିଶା ସରକାରଙ୍କ ଦ୍ୱାରା ପ୍ରଦତ୍ତ ଅର୍ଥରାଶିର କିଭଳି ବିନିଯୋଗ କରାଯିବ ବୋଲି ସଙ୍ଗଠନ ପକ୍ଷରୁ ପ୍ରଶ୍ନ କରାଯାଇଛି। ଏନେଇ ୧୭ରୁ ଅଧିକ ପୁରାତନ ନୂତନ କୁଳପତିଙ୍କୁ ଭେଟି ପାଠ୍ୟକ୍ରମ ବନ୍ଦ ନ କରିବା ପାଇଁ ସ୍ମାରକପତ୍ର ପ୍ରଦାନ କରିଛନ୍ତି। ୨ ବର୍ଷ ଅବଧିର ଏହି ପାଠ୍ୟକ୍ରମ ପରିବର୍ତ୍ତେ ୪ବର୍ଷ ଅବଧିର ଏକ ନୂତନ ବିଟେକ୍ ପାଠ୍ୟକ୍ରମ ଖୋଲାଯିବ ବୋଲି କହି କୁଳପତି ସେମାନଙ୍କ ଦାବିକୁ ଏଡ଼ାଇଯାଇଛନ୍ତି ବୋଲି ସଂଗଠନ ପକ୍ଷରୁ କୁହାଯାଇଛି। ଅନ୍ୟପଟେ ୨ବର୍ଷରେ ଛାତ୍ରୀଛାତ୍ର ସମାନ ଶିକ୍ଷାଲାଭ କରୁଥିବାବେଳେ ଅଧିକ ଅର୍ଥ ଉପାର୍ଜନ ଉଦ୍ଦେଶ୍ୟରେ ଏମ୍ସିଏ ପାଠ୍ୟକ୍ରମକୁ ବନ୍ଦ କରି ୪ବର୍ଷର ଅବଧିର ପାଠ୍ୟକ୍ରମ ଆରମ୍ଭ କରାଯାଉଥିବା ଅଭିଯୋଗ ହୋଇଛି।
