ନୂଆଦିଲ୍ଲୀ,୨୯।୧: ୨୦୨୬ ଟି୨୦ ବିଶ୍ୱକପ ପୂର୍ବରୁ ଆମେରିକା କ୍ରିକେଟ ଦଳକୁ ଏକ ବଡ଼ ଝଟକା ଲାଗିଛି। ଆଇସିସି ଦଳର ଷ୍ଟାର ବ୍ୟାଟ୍ସମ୍ୟାନ ଆରୋନ ଜୋନ୍ସଙ୍କୁ ନିଲମ୍ବିତ କରିଛି। ମ୍ୟାଚ ଫିକ୍ସିଂ ଏବଂ ଦୁର୍ନୀତିର ଗମ୍ଭୀର ଅଭିଯୋଗ ପରେ ଏହି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଜୋନ୍ସଙ୍କ ବିରୋଧରେ ମୋଟ ପାଞ୍ଚଟି ଅଭିଯୋଗ ଆସିଛି, ଯାହା ସବୁ ଆଇସିସି ଏବଂ କ୍ରିକେଟ ୱେଷ୍ଟଇଣ୍ଡିଜର ଦୁର୍ନୀତି ନିବାରଣ କୋଡ ଉଲ୍ଲଂଘନ ସହିତ ଜଡିତ। ଏହି ଅଭିଯୋଗଗୁଡ଼ିକର ଜବାବ ଦେବା ପାଇଁ ତାଙ୍କୁ ୧୪ ଦିନ ସମୟ ଦିଆଯାଇଛି।
ଆରୋନ ଜୋନ୍ସଙ୍କ ବିରୋଧରେ ପାଞ୍ଚଟି ଅଭିଯୋଗ ମଧ୍ୟରୁ ତିନୋଟି ୨୦୨୩-୨୪ରେ ଖେଳାଯାଇଥିବା ବାରବାଡୋସ BIM10 T20 ଟୁର୍ନାମେଣ୍ଟ ସହିତ ଜଡିତ। ବାକି ଦୁଇଟି ତାଙ୍କ ଅନ୍ତର୍ଜାତୀୟ ମ୍ୟାଚ ସହିତ ଜଡିତ। ଆଇସିସି ଅନୁଯାୟୀ, ଏହି ଅଭିଯୋଗ ମଧ୍ୟରୁ ଗୋଟିଏ ହେଉଛି ଜୋନ୍ସ ଏକ ମ୍ୟାଚର ଫଳାଫଳକୁ ପ୍ରଭାବିତ କରିବାକୁ ଚେଷ୍ଟା କରିଥିଲେ କିମ୍ବା ଏପରି କରିବା ପାଇଁ ଷଡ଼ଯନ୍ତ୍ରରେ ଲିପ୍ତ ଥିଲେ।
ICC ଏହାର ବିବୃତ୍ତିରେ ସ୍ପଷ୍ଟ କରିଛି ଯେ, ଏହି ତଦନ୍ତ ଚାଲିଛି ଏବଂ ମାମଲାରେ ଜଡିତ ଅନ୍ୟ ଖେଳାଳି କିମ୍ବା ବ୍ୟକ୍ତିବିଶେଷଙ୍କ ବିରୋଧରେ ଅଭିଯୋଗ ଦାଖଲ କରାଯାଇପାରେ। ତଥାପି, ତଦନ୍ତ ସମ୍ପୂର୍ଣ୍ଣ ନ ହେବା ପର୍ଯ୍ୟନ୍ତ ICC ଏହି ବିଷୟରେ ଅଧିକ ମନ୍ତବ୍ୟ ଦେବ ନାହିଁ।
୩୧ ବର୍ଷୀୟ ଆରୋନ ଜୋନ୍ସଙ୍କୁ ଆମେରିକା ପାଇଁ ଜଣେ ପ୍ରମୁଖ ଖେଳାଳି ଭାବରେ ବିବେଚନା କରାଯାଉଛି। ସେ ୨୦୧୯ରେ ତାଙ୍କର ଅନ୍ତର୍ଜାତୀୟ ଡେବ୍ୟୁ କରିଥିଲେ। ସେବେଠାରୁ ସେ ଆମେରିକା ପାଇଁ ୫୨ଟି ଦିନିକିଆ ଏବଂ ୪୮ଟି ଟି-୨୦ ଅନ୍ତର୍ଜାତୀୟ ମ୍ୟାଚ ଖେଳିଛନ୍ତି। ମୋଟ ୯୫ଟି ଇନିଂସରେ ସେ ୨,୪୩୪ ରନ କରିଛନ୍ତି।
ଜୋନ୍ସ ୨୦୨୪ ଟି-୨୦ ବିଶ୍ୱକପରେ ସୁପର-୮ ପହଞ୍ଚିଥିବା ଆମେରିକା ଦଳର ମଧ୍ୟ ଅଂଶ ଥିଲେ। ସେ ଅପରାଜିତ ୩୬ ରନ କରି ଡାଲାସରେ ପାକିସ୍ତାନ ବିପକ୍ଷରେ ଐତିହାସିକ ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
୨୦୨୬ ଟି-୨୦ ବିଶ୍ୱକପ ଆସନ୍ତା ସପ୍ତାହରେ ଆରମ୍ଭ ହେବାକୁ ଯାଉଛି। ଜୋନ୍ସ ସମ୍ପ୍ରତି ଆମେରିକା ପାଇଁ ୧୮ ଜଣିଆ ପ୍ରଶିକ୍ଷଣ ଶିବିରର ଅଂଶ ଥିଲେ ଏବଂ ଦଳର ଉପ-ଅଧିନାୟକ ପାଇଁ ମଧ୍ୟ ବିଚାର କରାଯାଇଥିଲା। ତାଙ୍କ ନିଲମ୍ବନ ପରେ ସେ ଆଉ ଟୁର୍ନାମେଣ୍ଟ ପାଇଁ ଚୟନ ପାଇଁ ଯୋଗ୍ୟ ନୁହଁନ୍ତି। ଏହି ବିବାଦ ଏବଂ ବିଶ୍ୱକପ ପୂର୍ବରୁ ଜଣେ ପ୍ରମୁଖ ଖେଳାଳିଙ୍କ ହରାଇବା ଆମେରିକାର ପ୍ରସ୍ତୁତି ପାଇଁ ଏକ ବଡ଼ ଝଟ୍କା ବୋଲି ବିବେଚନା କରାଯାଉଛି।
Dharitri – Odisha’s No.1 Odia Daily
