ଖଇରା,୩।୯(ଉତ୍କଳବନ୍ଧୁ ପଣ୍ଡା): ବାଲେଶ୍ବର ଜିଲା ଖଇରା ଥାନା ଗଡପୋଖରୀ ପଞ୍ଚାୟତ ଅଧୀନ ତେନ୍ତଳାଗଡିଆ ଗ୍ରାମରେ ମାତ୍ର ୩ ମାସ ତଳେ ବିବାହ କରିଥିବା ଜଣେ ନବବଧୂଙ୍କ ମୃତଶରୀରକୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯିବା ଘଟଣା ସମଗ୍ର ଖଇରା ଅଞ୍ଚଳରେ ଆଲୋଡନ ସୃଷ୍ଟି କରିଛି। ଯୌତୁକ ପାଇଁ ଶାରିରୀକ ମାନସିକ ନିର୍ଯାତନା ଦେଇ ଝିଅକୁ ହତ୍ୟା କରି ଫ୍ୟାନରେ ଟାଙ୍ଗି ଆତ୍ମହତ୍ୟାର ରୂପ ଦିଆଯାଉଥିବା ନେଇ ଶେରପୁର ଗ୍ରାମ ନିବାସୀ ବାପା ସୁଦାମ ସେଠୀ ଖଇରା ଥାନାରେ ଲିଖିତ ଅଭିଯୋଗ କରିଛନ୍ତି।
ଅଭିଯୋଗ ମୁତାବକ, ଗତ ଜୁନ ମାସରେ ତାଙ୍କ ସାନ ଝିଅ ଲକ୍ଷ୍ମୀପ୍ରିୟାର ବିବାହ ଉକ୍ତ ତେନ୍ତୁଳାଗଡିଆ ଗ୍ରାମର ଜଗନ୍ନାଥ ଦାସଙ୍କ ସହ ହୋଇଥିଲା। ବିବାହ ସମୟରେ ଯୌତୁକ ବାବଦକୁ ସମସ୍ତ ଟଙ୍କା ସୁନାଗହଣା ପ୍ରଦାନ ସତ୍ତ୍ୱେ ଅଧିକ ୧ ଲକ୍ଷ ଟଙ୍କା ପାଇଁ ଶ୍ବଶୁର ଘର ଲୋକେ ଲାଞ୍ଛନା ଦେଇ ଆସୁଥିଲେ। ହେଲେ ଦାବି ମୁତାବକ ସେ ଯୌତୁକ ଦେଇ ନ ପାରିବାରୁ ସ୍ବାମୀ, ଶାଶୁ, ନଣନ୍ଦ, ନଣନ୍ଦେଇ ହତ୍ୟା କରି ଟାଙ୍ଗିଦେଇଥିବା ଅଭିଯୋଗରେ ଉଲ୍ଲେଖ କରିଛନ୍ତି। ଖଇରା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
