ଭଣ୍ଡାରିପୋଖରୀ,୩ା୪ (ସ୍ବ.ପ୍ର.): ୨୫ ବର୍ଷ ହେଲା ସେ ଭାତ ଖାଇନାହାନ୍ତି। ମୁଖ୍ୟତଃ ଫଳମୂଳକୁ ଆହାର ରୂପେ ଗ୍ରହଣ କରୁଥିବା ବେଳେ ପାଣି ସହ କେବଳ ଚା’ ତାଙ୍କର ସର୍ବୋତ୍ତମ ଶକ୍ତି ବୋଲି କହନ୍ତି ଭଦ୍ରକ ଜିଲା ଭଣ୍ଡାରିପୋଖରୀ ବଜାର ସଂଲଗ୍ନ ମା’ ନେଙ୍କୁଡ଼ିଶୁଣୀଙ୍କ ପୀଠରେ ଥିବା ଜଗନ୍ନାଥ ଆଶ୍ରମ ମୁଖ୍ୟ ପୁରୋଧା ବାବା ମାର୍କଣ୍ଡ ପଣ୍ଡା(୬୫)। ତାଙ୍କ ଘର ସ୍ଥାନୀୟ ଚନ୍ଦ୍ରଭାନୁପୁର ଗ୍ରାମରେ।
ସେ କହନ୍ତି, ୩୦ ବର୍ଷ ହେବ ସେ ସଂସାର ତ୍ୟାଗ କରିଛନ୍ତି। ପ୍ରଥମେ ପୁରୀ ଯାଇ ଗୁରୁ ରାମାନନ୍ଦଙ୍କଠାରୁ ଦୀକ୍ଷିତ ହେଲା ପରେ ନିଜ ଅଞ୍ଚଳରେ ଏକ ଝାଟିମାଟି ଆଶ୍ରମ ତିଆରି କରି ଆରାଧ୍ୟ ଦେବତା ଶ୍ରୀଜଗନ୍ନାଥଙ୍କୁ ପୂଜାର୍ଚ୍ଚନା କରୁଛନ୍ତି। ଗୁରୁ ଦେଇଥିବା ନାମ ଅନୁସାରେ ସେ ମୃତ୍ୟୁଞ୍ଜୟ ଦାସ ନାମରେ ନାମିତ ହୋଇଥିବା ବେଳେ ସ୍ଥାନୀୟ ଲୋକେ ତାଙ୍କୁ ମାର୍କଣ୍ଡ ବାବା ବୋଲି ଡାକନ୍ତି। ପ୍ରତ୍ୟେକ ଦିନ ସକାଳୁ ରୀତିନୀତି ଅନୁଯାୟୀ ଜଗନ୍ନାଥ, ବଳଭଦ୍ର ଓ ମା’ ସୁଭଦ୍ରାଙ୍କୁ ପୂଜା କରିବା ସହ ମଧ୍ୟାହ୍ନ ଓ ସାରେ ଭଗବାନଙ୍କୁ ନିୟମିତ ଆଳତି କରିଥାନ୍ତି। ପୂଜା ପ୍ରସାଦ ବ୍ୟତୀତ ଅନ୍ୟାନ୍ୟ ଖାଦ୍ୟ ସେ ବର୍ଜନ କରିଥାନ୍ତି। ପାଖାପାଖି ୩୦ବର୍ଷ ହେବ ଜଗନ୍ନାଥଙ୍କ ସେବାରେ ସମର୍ପିତ ହୋଇଥିବା ବେଳେ ୨୫ ବର୍ଷ ଧରି ଅନ୍ନ ଗ୍ରହଣ କରିନାହାନ୍ତି। ଭାତ ନ ଖାଇବା ପଛରେ ସେଭଳି କିଛି କାରଣ ନାହିଁ। ତେବେ ଏହାଦ୍ୱାରା କୌଣସି ସମସ୍ୟା ହୋଇ ନାହିଁ। ଜଗନ୍ନାଥଙ୍କ ସେବାରେ ନିଜକୁ ସମର୍ପି ଦେଇଥିବା ବେଳେ ଏକ ସୁସଜ୍ଜିତ ମନ୍ଦିର ନିର୍ମାଣ କରିବା ପାଇଁ ଲକ୍ଷ୍ୟ ରଖିଥିବା ସେ କହିଛନ୍ତି।
