ଓଟାଓ୍ବା,୧୫।୩: ଶୁକ୍ରବାର କାନାଡାର ପ୍ରଧାନମନ୍ତ୍ରୀ ଭାବରେ ମାର୍କ କାର୍ନି ଶପଥ ନେବା ମାତ୍ରେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିଷ୍ପତ୍ତି ଏବଂ ବିବୃତ୍ତିକୁ ସମାଲୋଚନା କରିଛନ୍ତି, ଯାହା କାରଣରୁ ଦୁଇ ଦେଶ ମଧ୍ୟରେ ମତଭେଦ ଦେଖାଦେଇଛି। କାନାଡାକୁ ଆମେରିକାର ୫୧ତମ ରାଜ୍ୟ କରିବା ବିଷୟରେ ଟ୍ରମ୍ପଙ୍କ ବକ୍ତବ୍ୟରେ ସେ ନିଜର କ୍ରୋଧ ପ୍ରକାଶ କରିଛନ୍ତି। ସେ ସ୍ପଷ୍ଟ ଶବ୍ଦରେ କହିଛନ୍ତି ଯେ କାନାଡା କେବେବି କୌଣସି ରୂପରେ ଆମେରିକାର ଅଂଶ ହେବ ନାହିଁ।
ମାର୍କ କାର୍ନି କାନାଡାର ୨୪ତମ ପ୍ରଧାନମନ୍ତ୍ରୀ ଭାବେ ଶପଥ ନେଇଛନ୍ତି। କାର୍ନି ପୂର୍ବରୁ ବ୍ୟାଙ୍କ ଅଫ କାନାଡା ଏବଂ ବ୍ୟାଙ୍କ ଅଫ ଇଂଲଣ୍ଡର ଗଭର୍ନର ଭଳି ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ସେ କାନାଡିୟ ସଂସଦର ସଦସ୍ୟ ନୁହନ୍ତି, କିମ୍ବା ପୂର୍ବରୁ ରାଜନୀତିରେ ପ୍ରବେଶ କରିନାହାଁନ୍ତି। ଏହା ସତ୍ତ୍ୱେ, ଗୋଟିଏ ସପ୍ତାହରୁ କମ୍ ସମୟ ମଧ୍ୟରେ ସେ ପ୍ରଧାନମନ୍ତ୍ରୀ ଦୌଡ଼ରେ କାନାଡାର ଶୀର୍ଷ ନେତାମାନଙ୍କୁ ପରାସ୍ତ କରିଥିଲେ।
ମାର୍କଙ୍କ ଶପଥ ଗ୍ରହଣ ସମାରୋହ ରାଜଧାନୀ ଓଟାୱାର ରିଡୋ ହଲରେ ଅନୁଷ୍ଠିତ ହୋଇଥିଲା। ଏହା ପରେ ସେ ହଲ ବାହାରକୁ ଆସି ଲୋକଙ୍କୁ ସମ୍ବୋଧିତ କରିଥିଲେ। ସେ କାନାଡାକୁ ମିଶାଇବା ପାଇଁ ଡୋନାଲ୍ଡ ଟ୍ରମ୍ପଙ୍କ ଧମକକୁ ପ୍ରତ୍ୟାଖ୍ୟାନ କରି କହିଛନ୍ତି କାନାଡା ମୌଳିକ ଭାବରେ ଏକ ପୃଥକ ଦେଶ। ସେ ଏହା ମଧ୍ୟ କହିଛନ୍ତି ଯେ କାନାଡା ଆମେରିକାଠାରୁ ସମ୍ମାନ ଆଶା କରେ। ଏବେ ସେ କାନାଡାର ସାର୍ବଭୌମତ୍ୱକୁ ସମ୍ମାନ ଦେଲେ ହିଁ ଡୋନାଲ୍ଡ ଟ୍ରମ୍ପଙ୍କୁ ଭେଟିବେ। ସେ ଆଶା ମଧ୍ୟ ପ୍ରକାଶ କରିଛନ୍ତି ଯେ ତାଙ୍କ ସରକାର ଟ୍ରମ୍ପ ପ୍ରଶାସନ ସହିତ ମିଶି କାମ କରିବାର ଉପାୟ ଖୋଜି ପାରିବେ।
