ଭୁବନେଶ୍ୱର,୨୬।୩: ରୁକୁଣା ରଥଯାତ୍ରା ପୂର୍ବରୁ ମୁକ୍ତେଶ୍ୱର ମନ୍ଦିର ପରିସରରେ ଥିବା ମରୀଚି କୁଣ୍ଡ ପାଣି ନିଲାମ ହୋଇଛି। ୭୦୦୧ ଟଙ୍କାରେ ନିଲାମ ହେଲା ମରିଚି କୁଣ୍ଡ ପାଣି। ବରମୁଣ୍ଡା ହାଉସିଂ ବୋର୍ଡର ଜିତେନ୍ଦ୍ର ବିଶାଳ ନେଇଛନ୍ତି ପ୍ରଥମ ନିଲାମ।
ସୂଚନାଯୋଗ୍ୟ, ଏଥର ମରୀଚି କୁଣ୍ଡ ପାଣି ନିଲାମରେ ଅନ୍ତରାୟ ସୃଷ୍ଟି ହୋଇଛି। ପ୍ରଥମ ଗରା ଜଳ ପାଇଁ ସରକାରୀ ଧାର୍ଯ୍ୟ ମୂଲ୍ୟ ୧୫ହଜାର ଟଙ୍କାରୁ ନିଲାମ ଡକାଯାଇଥିଲା। ହେଲେ ଚଳିତ ବର୍ଷ ଏତେ ମୂଲ୍ୟରେ କେହି ନେବାକୁ ରାଜି ନ ହେବାରୁ ସର୍ବନିମ୍ନ ମୂଲ୍ୟ ୧୧ହଜାର ଟଙ୍କାକୁ ହ୍ରାସ କରାଯାଇଥିଲା। ସାଧାରଣତଃ ପୂର୍ବବର୍ଷଗୁଡ଼ିକରେ ମରୀଚି କୁଣ୍ଡ ଜଳକୁ ନେବା ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ଏକ ପ୍ରକାର ପ୍ରତିଯୋଗିତା ଦେଖିବାକୁ ମିଳିଥାଏ। ହେଲେ ଏବର୍ଷ ଖୁବ୍ କମ୍ ସଂଖ୍ୟକ ଶ୍ରଦ୍ଧାଳୁ ନିଲାମ ଡାକ ସମୟରେ ଉପସ୍ଥିତ ରହିଥିବାରୁ ନିଲାମରେ ବାଧା ସୃଷ୍ଟି ହୋଇଥିଲା। ବିଶ୍ୱାସ ରହିଛି ଯେ, ଏହି ମରୀଚି କୁଣ୍ଡ ପାଣିରେ ଗାଧୋଇ ପ୍ରଭୁ ଶ୍ରୀଲିଙ୍ଗରାଜଙ୍କୁ ଦର୍ଶନ କଲେ ନିଃସନ୍ତାନ ମହିଳା ସନ୍ତାନ ପ୍ରାପ୍ତ ହେବା ସହ ତାଙ୍କ ମନସ୍କାମନା ପୂରଣ ହୋଇଥାଏ। ଗତବର୍ଷ ପ୍ରଥମ ଗରାଜଳ ୨୧ହଜାର ଟଙ୍କାରେ ନିଲାମ ଯାଇଥିବାବେଳେ ୨ୟ ଏବଂ ତୃତୀୟ ଗରାଜଳକୁ କେହି କିଣି ନ ଥିଲେ।