ବୌଦ୍ଧ,୨୨ ।୧୧(ଅଜିତ କୁମାର ବାରିକ ): ଗତ କିଛିଦିନର ବ୍ୟବଧାନ ପରେ ବୌଦ୍ଧ ଜିଲାରେ ମାଓବାଦୀଙ୍କ ଉପସ୍ଥିତି ଥିବା ଜଣାପଡ଼ିଛି। ମାଓବାଦୀ ଜିଲାରେ ଥିବା ନେଇ ମଙ୍ଗଳବାର ଏକ ଖବରଦାତା ସମ୍ମିଳନୀରେ ଆରକ୍ଷୀ ଅଧୀକ୍ଷକ ରାଜ ପ୍ରସାଦ ସୂଚନା ଦେଇଛନ୍ତି।
ପ୍ରକାଶ ଯେ, ଗତ ୧୬ ତାରିଖରେ ପୋଲିସକୁ ଜିଲାର ମନମୁଣ୍ଡା ଥାନା ଅନ୍ତର୍ଗତ ଶଗଡ଼ା ଫାଣ୍ଡି ଅଞ୍ଚଳରେ ଥିବା ରାବଣେଶ୍ୱର ଜଙ୍ଗଲରେ ୩୫ରୁ ୪୦ ମାଓବାଦୀ ବୁଲୁଥିବାର ଖବର ମିଳିଥିଲା। ଖବର ପାଇବା ପରେ ଜିଲା ପୋଲିସ ପକ୍ଷରୁ ଯୋଜନା କରାଯାଇ ଏସ୍ଓଜି ଓ ଡିଭିଏଫ୍ମାନଙ୍କୁ ଘଟଣାସ୍ଥଳକୁ ପଠାଯାଇଥିଲା।ଗତ ୧୯ ତାରିଖରେ ମାଓବାଦୀମାନେ ହଠାତ୍ ପୋଲିସ ଫୋର୍ସ ଉପରକୁ ଗୁଳିଚାଳନା କରିବା ସହ ବୋମାମାଡ଼ କରିଥିଲେ। ପୋଲିସ ମଧ୍ୟ ଏହାର ଜବାବରେ ପାଲଟା ଗୁଳିଚାଳନା କରିବାରୁ ମାଓବାଦୀମାନେ ଘଟଣାସ୍ଥଳରୁ ଛତ୍ରଭଙ୍ଗ ଦେଇଥିଲେ। ଦୀର୍ଘ ୪୫ରୁ ୫୦ ମିନିଟ୍ ଗୁଳି ବିନିମୟ ହୋଇଥିବା ଆରକ୍ଷୀ ଅଧୀକ୍ଷକ ପ୍ରସାଦ ସୂଚନା ଦେଇଛନ୍ତି।ସେ ଆହୁରି କହିଥିଲେ, ମାଓବାଦୀମାନେ ଛତ୍ରଭଙ୍ଗ ଦେବା ପରେ ପୋଲିସ ଫୋର୍ସ ବିପୁଳ ପରିମାଣର ମାଓବାଦୀ ସାମଗ୍ରୀ ଜବତ କରିବାରେ ସଫଳ ହୋଇଥିଲେ। ଏହାଛଡା ଯେହେତୁ ମହିଳାମାନଙ୍କ ବସ୍ତ୍ର ଜବତ କରାଯାଇଛି, ତେଣୁ ମହିଳା ମାଓବାଦୀମାନେ ସାମିଲ ଥିବା ସ୍ପଷ୍ଟ ଜଣାପଡୁଛି। ମାଓବାଦୀ ସାମଗ୍ରୀଗୁଡିକ ମଧ୍ୟରେ ୩ ଗୋଟି ବିଦ୍ୟୁତ୍ ବିସ୍ଫୋରକ, ୨ ଗୋଟି ଏସ୍ବିଜିଏଲ୍ ଏମ୍ଟି କେସ୍, ଗୋଟିଏ ବ୍ୟାଟେରି, ୬ ଗୋଟି ବ୍ୟାଟେରି କ୍ଲିପ୍, ୧୨ ବୋର୍ ଏମ୍ଟି କେସ୍, ବିଦ୍ୟୁତ୍ ତାର ଗୋଟିଏ ବଣ୍ଡଲ, ବ୍ଲାଷ୍ଟିଂ ତାର , ମାଓବାଦୀ ପୁସ୍ତିକା, ମାଓବାଦୀ ଟୋପି, ୬ ଗୋଟି ଛୁରି, ଗୋଟିଏ କୋଡ଼ି, ଗୋଟିଏ ଟାଙ୍ଗିଆ, ୨ ଗୋଟି କଇଁଚି, ୨ଗୋଟି ଟର୍ଚ୍ଚ, ଔଷଧ, କଣ୍ଡୋମ , ଗର୍ଭ ନିରୋଧ ଔଷଧ, ୨ଗୋଟି କଳାରଙ୍ଗର ଛତା, ୭ ଗୋଟି ପ୍ଲାଷ୍ଟିକ ଡ୍ରମ୍, ୩ ବଣ୍ଡଲ ଦଉଡି, ମହିଳା ବସ୍ତ୍ର ୬ ଗୋଟି , ବ୍ଲାଙ୍କେଟ୍ ୨ ଗୋଟି, ବ୍ଲେଜର ଗୋଟିଏ. ଶୀତବସ୍ତ୍ର ୨ ଗୋଟି, ରୋଷେଇ ସାମଗ୍ରୀ, ଷ୍ଟିଲ୍ ମଗ୍, ଟିଫିନ, ଚପଲ, ବାଉଁଶଲାଠି ସହ ଆହୁରି ଅନେକ ସାମଗ୍ରୀ ଜବତ କରାଯାଇଥିବା ଆରକ୍ଷୀ ଅଧୀକ୍ଷକ ସୂଚନା ଦେଇଥିଲେ। ଏନେଇ ମଙ୍ଗଳବାର ଦିନ ମନମଣ୍ଡା ଥାନାରେ ଏକ ମାମଲା (୨୮୦/୨୩)ରୁଜୁ ହୋଇଥିବା ଆରକ୍ଷୀ ଅଧୀକ୍ଷକ ପ୍ରସାଦ ଜଣାଇଥିଲେ। ଏହି ଖବରଦାତା ସମ୍ମିଳନୀରେ ଏସ୍ଡିପିଓ କୈଳାସ ସେଠୀ ଉପସ୍ଥିତ ଥିଲେ।
ପ୍ରକାଶଥାଉ କି, ବୌଦ୍ଧ ଜିଲାରେ ବହୁ ସମୟରେ ମାଓବାଦୀମାନେ ରହି ଚଳପ୍ରଚଳ କରୁଥିବା ବେଳେ ହରଭଙ୍ଗା ବ୍ଲକର ତଳଗାଁ ଓ କଣ୍ଟମାଳ ବ୍ଲକରେ ମାଓବାଦୀମାନେ ନିଜର ସ୍ଥିତ ହାଜିର କରି ଆସୁଛନ୍ତି।। ୨୦୨୧ ଜୁଲାଇ ୧୦ ତାରିଖରେ ବୌଦ୍ଧ ଜିଲା କଣ୍ଟାମାଳ ବ୍ଲକର ଉମା ଗ୍ରାମ ପଞ୍ଚାୟତ ଅନ୍ତର୍ଗତ କନ୍ଧମାଳ ସୀମାନ୍ତ ଜଙ୍ଗଲ ସମାଡାଙ୍ଗୀ ଓ ନାଦେନ ଜଙ୍ଗଲରେ ମାଓବାଦୀ ଓ ପୋଲିସ ମଧ୍ୟରେ ଗୁଳି ବିନିମୟ ଘଟି ୨ ଜଣ ଯବାନ ଗୁରୁତର ଆହତ ହୋଇଥିଲେ।। ୨୦୨୦ ମସିହାରେ ବୌଦ୍ଧକୁ ମାଓବାଦୀ ମୁକ୍ତ ଜିଲା ଘୋଷଣା କରାଯାଇଥିବା ବେଳେ ପରବର୍ତ୍ତୀ ସମୟରେ ପୁଣି ଜିଲାକୁ ମାଓବାଦୀ ଅଞ୍ଚଳ ଭାବେ ଘୋଷଣା କରାଯାଇଥିଲା।
