ଭୁବନେଶ୍ୱର,୪।୧୧(ସୁନିତ୍ ମିଶ୍ର):ରାଜ୍ୟରେ ଲମ୍ବା ସମୟ ଶାସନ କରିବା ବେଳେ ଲୋକଙ୍କ ପାଇଁ ବିଜେଡି ସଭାପତି ନବୀନ ପଟ୍ଟନାୟକ କ’ଣ କରିଛନ୍ତି ତାହା କୁହନ୍ତୁ ବୋଲି ଭାଜପା ରାଜ୍ୟ ସଭାପତି ମନମୋହନ ସାମଲ ଆହ୍ବାନ ଦେଇଛନ୍ତି। ନବୀନଙ୍କ ନୂଆପଡ଼ା ଗସ୍ତ ସମ୍ପର୍କରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ମନମୋହନ କହିଛନ୍ତି, ଗୋଟିଏ ଦଳର ସଭାପତି ଭାବେ ନବୀନ ପ୍ରଚାର କରିବାକୁ ଯିବା ସ୍ବାଭାବିକ। ବରଂ ସେ ନୂଆପଡ଼ାରେ ଯାଇ ରୁହନ୍ତୁ। ଦୀର୍ଘବର୍ଷ ଶାସନରେ ରହିବା ଭିତରେ କ’ଣ ସବୁ କରିଛନ୍ତି ସେକଥା ସେଠାରେ ଲୋକଙ୍କୁ କୁହନ୍ତୁ। କ୍ଷମତାରେ ଥିବା ଭିତରେ ନୂଆପଡ଼ାର ଯେଉଁସବୁ ଅଞ୍ଚଳକୁ ଯାଇପାରି ନାହାନ୍ତି ସେସବୁ ସ୍ଥାନକୁ ଏବେ ଯାଆନ୍ତୁ ବୋଲି ମନମୋହନ କହିଛନ୍ତି।
ମନମୋହନ ଆହୁରି କହିଛନ୍ତି, ୨୪ ବର୍ଷ ଧରି ବିଜେଡି କ୍ଷମତାରେ ରହିବା ପରେ ସାଧାରଣ ଲୋକ ସେମାନଙ୍କ ରାୟ ଦେଇସାରିଛନ୍ତି। ଲୋକପ୍ରିୟତା ଯଦି ଥିଲା ସରକାର କାହିଁକି ଚାଲିଗଲା। ଗତ ନିର୍ବାଚନରେ ବିଜେଡି ଆସନ ସଂଖ୍ୟାକୁ ଲୋକମାନେ ଅଧାରୁ ଆହୁରି କାହିଁକିି କମାଇଦେଲେ। ଆଦର୍ଶଗତ ଲଢ଼େଇରେ ଭାଜପା ସବୁବେଳେ ବିଶ୍ୱାସ କରେ, ବ୍ୟକ୍ତିଗତ ଟିପ୍ପଣୀରେ ତାଙ୍କ ଦଳ ଭରସା କରେନାହିଁ। ଏକ ବିଚାରଧାରାକୁ ନେଇ ଭାଜପା ଲମ୍ବା ସମୟ ପର୍ଯ୍ୟନ୍ତ କାମ କରିଆସୁଛି। ବ୍ୟକ୍ତିଗତ ତର୍କବିତର୍କରେ ଭାଜପା କେବେହେଲେ ରହେ ନାହିଁ ବୋଲି ମନମୋହନ କହିଛନ୍ତି।
Dharitri – Odisha’s No.1 Odia Daily
