ପୁରୀ,୨୧ା୬(ଅଜିତ୍ କୁମାର ମହାନ୍ତି): ପୁରୀ ସଦର ବ୍ଲକ ସମଙ୍ଗରା ପଞ୍ଚାୟତ ଅନ୍ତର୍ଗତ ଖଡ଼ିପଦା ଗ୍ରାମର ମେଳଣ ପଡ଼ିଆରେ ଗୁରୁବାର ସମାଜସେବୀ ସୂର୍ଯ୍ୟନାରାୟଣ ରଥଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଯାଇଛି। ମଙ୍ଗଳା ନଦୀ ଅପରିଷ୍କାର ହୋଇପଡ଼ିଥିବାରୁ ଏହାର ପୁନରୁଦ୍ଧାର ପାଇଁ ବୈଠକରେ ଦାବି କରାଯାଇଛି। ନଦୀ ଉଭୟ ପାଶର୍ବ ସଂଲଗ୍ନ ଗ୍ରାମଗୁଡ଼ିକର ଅଧିବାସୀମାନେ ଏକାଠି ହୋଇ ଏହି ଦାବି ଉଠାଇବା ସହ ଏକ କ୍ରିୟାନୁଷ୍ଠାନ କମିଟି ଗଠନ କରିଛନ୍ତି। ଶିକ୍ଷାବିତ ସୁକାନ୍ତ କୁମାର ମହାନ୍ତି ଉପସ୍ଥିତ ସଦସ୍ୟମାନଙ୍କୁ ‘ମଙ୍ଗଳା ନଈ ବଞ୍ଚାଅ’ ଅଭିଯାନକୁ ଆଗେଇନେବା ଦିଗରେ ପୂର୍ଣ୍ଣ ସହଯୋଗ ଅକ୍ଷୁଣ୍ଣ ରଖିବା ପାଇଁ ପରାମର୍ଶ ଦେଇଛନ୍ତି। ବୈଠକରେ ଗଠନ ହୋଇଥିବା ‘ମଙ୍ଗଳା ନଦୀ ସୁରକ୍ଷା କ୍ରିୟାନୁଷ୍ଠାନ କମିଟି’ର ସଦସ୍ୟ ଭାବେ ସୂର୍ଯ୍ୟନାରାୟଣ ରଥ, ସୁକାନ୍ତ କୁମାର ମହାନ୍ତି, ସୁଧାଂଶୁ କୁମାର ଜେନା, ଚନ୍ଦନ ବାରିକ, ଦୀପକ ସ୍ବାଇଁ, ମଧୁସୂଦନ ସାହୁ ଓ ଲୋକନାଥ ସାହୁଙ୍କୁ ମନୋନୀତ କରାଯାଇ ଆବଶ୍ୟକ କାର୍ଯ୍ୟକ୍ରମ ହାତକୁ ନେବା ପାଇଁ କୁହାଯାଇଛି।
ମଙ୍ଗଳା ନଦୀ ଅପରିଷ୍କାର ହୋଇ ପଡ଼ିଥିବା ନେଇ ବୈଠକରେ ସଦସ୍ୟମାନେ ଉଦ୍ବେଗ ପ୍ରକାଶ କରିଥିଲେ। ସେମାନେ କହିଥିଲେ ଯେ, ବହୁ ପୁରାତନ ମଙ୍ଗଳା ନଈ ଅପରିଷ୍କାର ହୋଇଥିବାରୁ ବ୍ୟବହାର ଅନୁପଯୋଗୀ ହୋଇପଡ଼ିଛି। ପୁରୀ ସହରର ଡ୍ରେନ୍ ପାଣି ସବୁ ସ୍ବେରେଜ ନାଳ ମାଧ୍ୟମରେ ଉକ୍ତ ନଈରେ ପଶୁଛି। ମୂଷା ନଈ ଭଳି ମଙ୍ଗଳା ନଈ ମଧ୍ୟ ଅନାବନା ଗଛଲତା ଓ ଦଳରେ ଭର୍ତ୍ତି ହୋଇଗଲାଣି। ନଈରେ ସର୍ପ ଓ ବିଭିନ୍ନ ରୋଗ ସୃଷ୍ଟିକାରୀ କୀଟ ସୃଷ୍ଟି ହେଲେଣି। ନଈପାଣି ବିଷାକ୍ତ ହୋଇଯାଇଛି। ଏଥିଯୋଗୁ ୫ ହଜାର ଲୋକ ପ୍ରଭାବିତ ହେଉଛନ୍ତି। ନଈର ଅନେକ ଜାଗା ଜବରଦଖଲ ହୋଇଛି। ଏ ସମ୍ପର୍କରେ ବିିଭିନ୍ନ ଦଳର ନେତାଙ୍କୁ ଅଭିଯୋଗ ଜଣାଇ ମଧ୍ୟ ନିରାଶ ହେବାକୁ ପଡ଼ିଛି। ତେଣୁ ଏହି ଐତିହାସିକ ନଈର ପୁନରୁଦ୍ଧାର ପାଇଁ ଗ୍ରାମବାସୀ ଅଣ୍ଟା ଭିଡ଼ିଛନ୍ତି। ସଂସ୍କୃତି ସହିତ ଅଙ୍ଗାଙ୍ଗୀ ଭାବେ ଜଡ଼ିତ ମଙ୍ଗଳା ନଦୀ। କୃଷ୍ଣ ଜନ୍ମ ଦିବସ ପରଦିନ ଏହି ନଈକୂଳରେ ଯମୁନା ଗାଧୁଆ ଉତ୍ସବ ମହାସମାରୋହରେ ପାଳନ କରାଯାଏ। ଲୋକଙ୍କ ଯାତାୟାତ ପାଇଁ ପୁରୀର ପ୍ରଥମ ଏମ୍ପି ଲୋକନାଥ ମିଶ୍ର ଓ ସ୍ଥାନୀୟ ନେତା ରାମହରି ରଥଙ୍କ ଦ୍ୱାରା ମଙ୍ଗଳାଘାଟ ସେତୁ ନିର୍ମାଣ ହୋଇଥିଲା। ମଙ୍ଗଳା ନଈକୁ ସ୍ବଚ୍ଛ ଓ ବ୍ୟବହାରଯୋଗ୍ୟ କରିବା ପାଇଁ ସରକାରଙ୍କ ନିକଟରେ ଗ୍ରାମବାସୀଙ୍କ ପକ୍ଷରୁ ଦାବି ଉପସ୍ଥାପନ କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି।
