ଖୋର୍ଦ୍ଧା ଅଫିସ, ୩୦।୯: ଖୋର୍ଦ୍ଧା ଜିଲା ବେଗୁନିଆ ଥାନା ଅଞ୍ଚଳରେ ମାନବବାଦ ସଙ୍ଗଠନର ସମର୍ଥକମାନେ ପୁଣି ଆତଙ୍କରାଜ ଚଳାଇଥିବା ଅଭିଯୋଗ ହୋଇଛି। ଏ ନେଇ ଏକ ଭିଡିଓ ଭାଇରାଲ ହେବା ପରେ ଏହି ସଙ୍ଗଠନ ପୁନର୍ବାର ସକ୍ରିୟ ହୋଇ ଉଠିଥିବା ସ୍ପଷ୍ଟ ହୋଇଛି। ଦୂଇଦିନ ତଳେ ଏହି ଥାନା ଅଧୀନ ଅଭିମାନପୁର ଗ୍ରାମରେ ମାନବବାଦ ସଙ୍ଗଠନର କେତେଜଣ ସମର୍ଥକ ଧମକଚମକ ଦେଉଥିବାବେଳେ ଗ୍ରାମବାସୀ ୨ଜଣଙ୍କୁ କାବୁ କରିନେଇଥିଲେ। ପରେ ଉଭୟଙ୍କୁ ପୋଲିସ ଜିମା ଦେଇଥିଲେ। ପୋଲିସ ସେମାନଙ୍କୁ ଅଟକ ରଖି ପଚରାଉଚରା ଚଳାଇଛି। ଗ୍ରାମର ଅଭି ନାୟକ ଓ ଆନନ୍ଦ ନାୟକ ପ୍ରମୁଖ ଗଣମାଧ୍ୟମ ଆଗରେ କହିଛନ୍ତି ଯେ, ଦୁଇଦିନ ତଳେ ମାନବବାଦ ସଙ୍ଗଠନର କେତେଜଣ ସମର୍ଥକ ମାରଣାସ୍ତ୍ର ଧରି ଅଭିମାନପୁର ଗ୍ରାମକୁ ଆସି ସଙ୍ଗଠନକୁ ବିରୋଧ କଲେ କିମ୍ବା ଏହା ବିରୋଧରେ ମୁହଁ ଖୋଲିଲେ ପରିଣାମ ଭୟଙ୍କର ହେବ ବୋଲି ଲୋକଙ୍କୁ ଧମକଚମକ ଦେଇଥିଲେ। ଏଥିରେ ଉତ୍କ୍ଷିପ୍ତ ହୋଇ ଗ୍ରାମବାସୀ ତାଙ୍କୁ ଘେରିଯାଇଥିଲେ। ଦୁଇଜଣଙ୍କୁ ଧରିଥିଲେ ମଧ୍ୟ ଅନ୍ୟମାନେ ମାରଣାସ୍ତ୍ର ଦେଖାଇ ଭୟଭୀତ କରାଇ ଚମ୍ପଟ ମାରିଥିଲେ। ପରେ ସମ୍ପୃକ୍ତ ଦୁଇଜଣଙ୍କୁ ପୋଲିସ ଜିମା ଦିଆଯିବା ସହ ଥାନାରେ ଅଭିଯୋଗ କରାଯାଇଛି। ଅଟକ ଦ୍ୱୟଙ୍କ ମଧ୍ୟରୁ ଜଣେ ବିଭିନ୍ନ ଆନ୍ଦୋଳନ ସମୟରେ ମାନବବାଦ ସଙ୍ଗଠନ ମୁଖ୍ୟ ମାନସ ଦାସ (ତଥାକଥିତ ଗୁରୁଜୀ)ଙ୍କ ସପକ୍ଷରେ ସ୍ଲୋଗାନ ଦେଉଥିବା ଦେଖିବାକୁ ମିଳିଥାଏ।
ସୂଚନାଯୋଗ୍ୟ, ସମ୍ପ୍ରତି ମାନସ ଦାସ ଜେଲ୍ରେ ଥିବାବେଳେ ତାଙ୍କ ପୁଅ ମନୋରଞ୍ଜନ ଜାମିନରେ ଆସି ଘରେ ରହିଛନ୍ତି। ତେଣୁ ପୁଅ ମାଧ୍ୟମରେ ମାନସ ପୁଣି ନିଜ ସଙ୍ଗଠନକୁ ସକ୍ରିୟ କରିବା ପାଇଁ ଉଦ୍ୟମ ଚଳାଇଥିବା ସାଧାରଣରେ ଆଲୋଚନା ହେଉଛି। ପୂର୍ବରୁ ୧୫ଟି ସଙ୍ଗଠନକୁ ନେଇ ଗଠିତ ମିଳିତ କ୍ରିୟାନୁଷ୍ଠାନ କମିଟି ମାନବବାଦ ସଙ୍ଗଠନ ତଥା ରାଷ୍ଟ୍ରୀୟ ସାମାଜିକ ନ୍ୟାୟ ମଞ୍ଚକୁ ଅସିଦ୍ଧ ଘୋଷଣା ଏବଂ ଏହି ସଙ୍ଗଠନ ସଦସ୍ୟଙ୍କୁ ଗିରଫ କରାଯିବାକୁ ଦାବି କରିଥିଲେ। ସେହିପରି ୪ଦିନ ତଳେ କମିଟି ପକ୍ଷରୁ ଜିଲା ପ୍ରଶାସନ ନିକଟରେ ଏହି ଦାବି କରାଯାଇଥିଲା। ଏବେ ପୁଣି ସେହି ଦାବି ଉଠିଛି। ଆଦିବାସୀ ନେତା ଦିବାକର ଭୋଇ ଏବଂ ବସ୍ତି ସୁରକ୍ଷା କମିଟି ସମ୍ପାଦକ ଜିତେନ୍ଦ୍ର ବେହେରା ତୁରନ୍ତ ସମ୍ପୃକ୍ତ ଅନୁଷ୍ଠାନକୁ ଅସିଦ୍ଧ ଘୋଷଣା କରାଯିବା ଏବଂ ଅଭିଯୁକ୍ତମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ସହ ଆଦିବାସୀଙ୍କ ସୁରକ୍ଷା ଦାବି କରିଛନ୍ତି। ନଚେତ ଆଦିବାସୀ ସଙ୍ଗଠନ ଏବଂ ଗ୍ରାମବାସୀ ରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି। ଅଭିଯୋଗର ତଦନ୍ତ ପରେ କାର୍ଯ୍ୟାନୁଷ୍ଠାନ ହେବ ବୋଲି ଏସ୍ପି ରାଜକିଶୋର ଦୋରା କହିଛନ୍ତି।
